दारुगोळा निर्मिती कारखान्यातील भीषण स्फोटात 8 जणांचा मृत्यू, जखमींवर उपचार सुरू.

भंडारा जवाहरनगर येथे शुक्रवारी सकाळी आयुधनिर्माणीमध्ये झालेल्या भीषण स्फोटात आठ कर्मचारी मृत्यूमुखी आणि पाच जण गंभीर जखमी झाले. स्फोटामुळे मोठा खड्डा पडला आणि सुमारे पंधरा किलोमीटरच्या परिघातील गावांना हादरे बसले.जवाहरनगर आयुधनिर्माणीतील कमी तापमानाच्या प्लास्टिक स्फोटक विभागात शुक्रवारी सकाळी दहाच्या सुमारास भीषण स्फोट झाला. यात आठ कर्मचारी मृत्युमुखी पडले, तर पाच जण गंभीर जखमी आहेत. हा स्फोट इतका शक्तिशाली होता, की त्यामुळे मोठा खड्डा पडला. त्यात संपूर्ण इमारत कोसळली. सुमारे पंधरा किलोमीटरच्या परिघातील गावांना या स्फोटाचे हादरे बसले.

जवाहरनगर आयुधनिर्माणीत संरक्षण विभागाकरिता ‘आरडीएक्स’ हे स्फोटक तयार केले जाते. त्याच्याशी संबंधित ‘टी-२३ एलटीपी’ विभागाच्या इमारतीत सकाळच्या पाळीत १३ कर्मचारी कार्यरत होते. सकाळी १०च्या सुमारास अचानक स्फोट झाला. स्फोटाने इमारत कोसळल्याने कामगार ढिगाऱ्याखाली दबले. दुपारपर्यंत एनडीआरएफचे पथक घटनास्थळी दाखल झाले आणि त्यानंतर बचावकार्याला वेग आला. ढिगाऱ्याखालून कर्मचाऱ्यांना बाहेर काढण्यासाठी जेसीबी, एक ब्रेकर मशीन वापरण्यात आली. पोलिस आणि एनडीआरएफच्या पथकांनी मिळून जखमींना वाचवण्याचे प्रयत्न केले.या स्फोटानंतर इमारतीचे पत्रे उडून शेतशिवारात पडले. स्फोटानंतर सर्वत्र धूर दिसत होता. या स्फोटामध्ये मृत्यू झालेल्यांची नावे चंद्रशेखर गोस्वामी (वय ४९), मनोज मेश्राम (५५), अजय नामदेवे (५१), अंकित बारई (२०), लक्ष्मण केलवडे (३८), अभिषेक चाैरसिया (३५), धर्मा रंगारी (३५), संजय कारेमोरे (३२) अशी आहेत. या घटनेनंतर राज्याचे मुख्यमंत्री देवेंद्र फडणवीस यांनीही शोक व्यक्त केला. या घटनेनंतर मोठी हळहळ व्यक्त केली जात आहे. सुरूवातीला ज्यावेळी या स्फोटाची घटना घडली, त्यावेळी लोकांना वाटले की, भूंकप आलाय.त्यानंतर स्फोटाची माहिती मिळाली. या स्फोटाचे अनेक फोटो आणि व्हिडीओही सोशल मीडियावर व्हायरल होताना दिसत आहेत. प्राथमिक माहितीमध्ये स्फोटातील मृतांचा आकडा हा 5 असल्याचे सांगितले गेले. मात्र, त्यानंतर हा आकडा वाढला. स्फोटाची माहिती मिळताच कारखान्यातील मोठे अधिकारी आणि पोलिस कर्मचारी घटनास्थळी दाखल झाले. त्यानंतर मदतकार्यास सुरूवात करण्यात आली. स्फोटानंतर हवेत बराचवेळ धूर दिसत होता. सर्व जखमींवर सध्या रूग्णालयात उपचार सुरू आहेत.