Rajendra Nikam
या प्रकरणातील बाळ घेऊन जाणारी संशयित महिला बाळंतीण महिलेच्या पतीच्या संपर्कात चार ते पाच दिवसांपासून होती. इतर वॉर्डमध्ये आपले नातलग असल्याचे कारण सांगत हिंदी व मराठीतून या दाम्पत्याशी तिने संवाद साधत ओळख वाढविली.ccc‘कोई तो मेरा बच्चा मुझे लौटा दो…कुछ तो करो…मैं बच्चे के बिना नही रह सकती..!’, मन विदीर्ण करणारा हा आक्रोश आहे सुमन अब्दुल मोहम्मद कलीम खान या २३ वर्षीय मातेचा. पोटाची खळगी भरण्यासाठी उत्तर प्रदेशातून सटाणा तालुक्यातील ठेंगोडा येथे मोलमजुरीसाठी आलेल्या या मातेसाठी उजाडलेला शनिवार हा त्यांच्या आयुष्यातील काळा दिवस ठरला. जिल्हा रुग्णालयात प्रसूतीपश्चात उपचार घेताना नव्याने तोंडओळख झालेल्या एका महिलेने तीन दिवस बाळास लळा लावण्याचे नाटक करून नवजात मातेचा विश्वास संपादन केला अन् डिस्चार्ज मिळण्याच्या घाईगडबडीच्या क्षणी नेमकी वेळ साधत अवघ्या सात दिवसांचा मुलगा घेऊन रुग्णालयाच्या आवारातून पोबारा केला. या घटनेने सर्वत्र हळहळ व्यक्त होत आहे.तोंडओळख झालेली महिला आपले बाळ पतीच्या हाती देण्याचा बहाणा करून आपल्या हातून घेऊन गेली पण तिने पतीच्या हाती बाळाला सोपविलेच नसल्याचा प्रकार उघड झाल्यानंतर नवजात माता सुमन खान यांच्या पायाखालची जमीनच सरकली. ज्या बाळाच्या हालचाली नऊ महिने गर्भात अनुभविल्या त्या बाळाला उराशी कवटाळण्याचे भाग्य लाभल्याचा आनंद या दुर्भागी मातेसाठी औटघटकेचा ठरला. नऊ महिने पोटात जपलेला गोळा कुणीतरी अनोळखी घेऊन गेल्याच्या जाणीवेनंतर रुग्णालयाचे आवार आक्रोशाने भेदून टाकणाऱ्या या मातेचे सांत्वन करणारेही कुणी नव्हते, इतकी करूण अवस्था बघताना कर्मचारी आणि इतर रुग्णांसह पोलिसांचेही मन हेलावले.
बाळास पळवून नेणाऱ्या महिलेचे हे कृत्य जिल्हा रुग्णालयाच्या आवारातील काही सीसीटीव्ही कॅमेऱ्यात कैद झाले आहे, तर काही सीसीटीव्हीत बिघाड असल्याने संशयित महिलेची ओळख पटविण्यातील अडसर वाढला आहे. सुमन अब्दुल खान ही महिला ठेंगोडा (ता. सटाणा) येथून २८ डिसेंबर २०२४ रोजी रात्री ११ वाजून २० मिनीटांनी रुग्णालयात दाखल झाली. येथे त्यांना ३१ डिसेंबरपर्यंत अतिदक्षता कक्षात दाखल करण्यात आले. सिझेरियन प्रसूती पश्चात तिच्यावर उपचार सुरू होते. जन्म झालेल्या मुलाचे वजन कमी असल्याने व त्याची माता अतिदक्षता कक्षात दाखल असल्याने बाळालाही अतिदक्षता कक्षात दाखल करण्यात आले होते. या कक्षातून बाळाला शनिवारी (दि.४) त्याचे वडील अब्दुल खान यांच्या ताब्यात देण्यात आले, तर बाळाच्या मातेची म्हणजे सुमन यांना सकाळी साडेनऊ वाजेच्या सुमारास डिस्चार्ज देण्यात आल्याचा दावा जिल्हा रुग्णालयाने केला. बाळ चोरून पोबारा करणाऱ्या महिलेचा चेहरा जिल्हा रुग्णालयाच्या सीसीटीव्ही कॅमेऱ्यात स्पष्ट दिसत नाही. काही सीसीटीव्हींमध्ये तांत्रिक बिघाड असल्याचा दावा पीडित दाम्पत्याने केला. या घटनेमुळे जिल्हा रुग्णालयाच्या सुरक्षा व्यवस्थेचे धिंडवडे निघाले आहेत.या घटनेची माहिती कळताच परिमंडळ एकचे उपायुक्त किरणकुमार चव्हाण, सहायक आयुक्त नितीन जाधव, सरकारवाडा पोलिस ठाण्याचे वरिष्ठ निरीक्षक सुरेश आव्हाड व गुन्हेशाखा युनिट एकचे पथक यांनी चौकशी करून बाळाचा व महिलेचा शोध सुरू केला.या प्रकरणातील बाळ घेऊन जाणारी संशयित महिला बाळंतीण महिलेच्या पतीच्या संपर्कात चार ते पाच दिवसांपासून होती. इतर वॉर्डमध्ये आपले नातलग असल्याचे कारण सांगत हिंदी व मराठीतून या दाम्पत्याशी तिने संवाद साधत ओळख वाढविली. दरम्यान बाळ व मातेची प्रकृती चांगली असल्याने त्यांना शनिवारी सकाळी डिस्चार्ज देण्यात येणार होता. यासाठी बाळाचे वडील रुग्णालयात कागदपत्रांची पूर्तता करण्यात गुंतले असताना संशयित महिला बाळाच्या आईजवळ येऊन संवाद साधू लागली. ‘तुम्ही आवरासावर करा. मी बाळाला परिसरात सांभाळते व फिरविते’, असे सांगून दगा देत तिने बाळासह पळ काढला.रुग्णालयातून डिस्चार्ज मिळालेल्या मातेला घरी जाण्यासाठी गावाच्या मार्गावर जाणारी रुग्णवाहिका मिळण्यास अवकाश होता. त्यामुळे डिस्चार्ज मिळाल्यानंतरही तिला रुग्णालयात थांबून रहावे लागले. यामुळे ही घटना घडल्याचा दावा आवारात उपस्थित इतर रुग्णांच्या आप्तेष्टांनी चर्चेदरम्यान केला. मात्र, या घटनेबाबत व बाळाच्या चोरीबाबतचे सर्व दावे, प्रतिदावे फेटाळून लावत अतिरिक्त जिल्हा शल्य चिकीत्सकांनी महिला रुग्णालयात दाखल झाल्यापासून तर डिस्चार्ज मिळेपर्यंतचा घटनाक्रम कथन करीत बाळ चोरीस गेले नसून, महिलेने फसवून नेल्याचे सांगितले.जिल्हा रुग्णालयाच्या व्यवस्थापनाचा अधिकार सुमारे दीड वर्षांपासून जिल्हा शल्य चिकित्सकांकडे सोपविण्यात आला आहे. त्या अगोदर काही काळ वैद्यकीय महाविद्यालयाकडे काही विभागांचे व्यवस्थापन होते. पुढील एक ते दीड महिन्यात या जबाबदाऱ्यांमध्ये पुन्हा बदल होण्याची शक्यता आहे. गेल्या काही वर्षांमध्ये अनेक कटू प्रसंगांमुळे जिल्हा रुग्णालयाची अब्रू वेशीला टांगली गेली आहे. यात बनावट परिचारिका, बनावट सुरक्षा रक्षक प्रकरण, बाळ चोरी होण्याचे प्रकरण, नोंदवहीत नवजात अर्भकाची नोंद मुलगा म्हणून करून प्रत्यक्ष मुलगी हाती देण्याचा प्रकार, आठ दिवसांपूर्वीच जिल्हा रुग्णालयात नोकरीस लावून देण्याच्या आमिषाने उमेदवाराची झालेली फसवणूक व या मालिकेत शनिवारच्या घटनेची भर यामुळे जिल्हा रुग्णालयाच्या भोंगळ कारभाराची लक्तरे वेशीला टांगली जात आहेत.
