अपहरणानंतर एका तासाच्या आतच सतीश वाघ यांची हत्या.

 वाघ यांचा खून सुपारी देऊन केला असण्याची दाट शक्यता पोलिस व्यक्त करीत आहेत. दरम्यान, दोन संशयितांना ताब्यात घेण्यात आले आहे. मात्र, खुनामागील उद्देश अद्याप स्पष्ट झालेला नाही. मामा सतीश वाघ यांच्या खून प्रकरणी विधान परिषदेचे आमदार योगेश टिळेकर यांनी मंगळवारी माध्यम प्रतिनिधींशी संवाद साधला. ते म्हणाले, ‘पोलिस यंत्रणा सक्षमपणे तपास करीत असून, यंत्रणेवर माझा विश्वास आहे. मुख्यमंत्री, उपमुख्यमंत्री यांचे फोन आले असून, तुमच्या कुटुंबाच्या पाठीशी आहोत, असे त्यांनी सांगितले.’ विधान परिषदेचे आमदार योगेश टिळेकर यांचे मामा सतीश वाघ यांचा अपहरणानंतर धावत्या गाडीतच त्यांचा खून केला असण्याची शक्यता पोलिसांनी वर्तवली आहे. वाघ यांचे अपहरण व खून या घटना अवघ्या तासाच्या आत घडल्याचे समोर आले आहे. सकाळी साडेसहाला अपहरण झाले आणि ती कार मृतदेह टाकून सकाळी साडेसातला परत उरुळी कांचनमध्ये आल्याचे ‘सीसीटीव्ही’ फुटेजवरून स्पष्ट झाले आहे.

वाघ यांचा खून सुपारी देऊन केला असण्याची दाट शक्यता पोलिस व्यक्त करीत आहेत. दरम्यान, दोन संशयितांना ताब्यात घेण्यात आले आहे. मात्र, खुनामागील उद्देश अद्याप स्पष्ट झालेला नाही. गुन्हे शाखेची आणि स्थानिक पोलिसांची मिळून २० पथके तपास करीत आहेत. नवनाथ गुराल आणि पवन शर्मा अशी ताब्यात घेतलेल्या संशयितांची नावे आहेत. एकूण पाच आरोपी असल्याचे प्राथमिक तपासात समोर आले आहे. या प्रकरणी हडपसर पोलिस ठाण्यात सतीश वाघ यांचे अपहरण व खून प्रकरणी गुन्हा दाखल आहे. त्यांचा मुलगा ओंकार सतीश वाघ (वय २७, रा. फुरसुंगी फाटा, मांजरी) यांनी तक्रार दिली आहे.

वाघ यांना मारल्यानंतर मृतदेह शिंदवणे घाटातील एका अडगळीच्या ठिकाणी टाकला. बहुंताश नागरिक येथे पार्टी करण्यासाठी जातात. काही तरुण दुपारी दीडच्या सुमारास शिंदवणे घाट परिसरात पार्टीसाठी आले होते. तेथून जात असताना, एक व्यक्ती पडल्याचे दिसून आले. मात्र, या भागात अनेक जण दारू पिऊन पडलेले असतात, त्यामुळे संबंधित तरुणांनी त्याकडे दुर्लक्ष केले. तरुण चार तासांनी परत निघाले असता, ती व्यक्ती त्याच ठिकाणी असल्याचे दिसून आले. त्यामुळे त्यांनी जवळ जाऊन पाहिले असता खुनाचा प्रकार समोर आला.