तीन वर्षापूर्वी मुलाची हत्या, आता वडिलांचा खून; नांदेडमधील ‘त्या’ हत्येचा अखेर उलगडा.

विशेष म्हणजे तीन वर्षापूर्वी मयत किशन खोसे यांच्या मुलाचा देखील अशाच प्रकारे खून करण्यात आला होता. प्रेम प्रकरणातून मयताच्या भाच्यानेच खून केला होता. त्या दिशेने देखील पोलिसांनी तपास सुरु केला. नांदेडमधील उस्माननगर पोलीस ठाण्याच्या हद्दीत घडलेल्या एका ६७ वर्षीय व्यक्तीच्या खुनाचा पोलिसांनी उलघडा केला आहे. घटनेच्या सात दिवसानंतर पोलिसांनी गावातीलच मदन अंबादास हंबर्डे या युवकास अटक केली आहे. ”अनैतिक संबंधाचा संशय आणि पूर्व वैमनस्यातून कोणी तरी मला मारून टाकेल” या धास्तीने आरोपीने खून केल्याचं तपासादरम्यान समोर आलं आहे.

४ डिसेंबर रोजी सकाळी साडेसहा वाजेच्या सुमारास वाका गावातील किशन हरी खोसे (वय ६७, रा. वाका) हे शेतात जाण्यासाठी घरातून निघाले होते. गावातून दिड किलोमीटर दूर असलेल्या वाका फाटा येथे किशन खोसे यांचा मृतदेह आढळला होता. आरोपीने मानेवर कत्तीने वार करून त्यांचा खून केला. या प्रकरणी उस्माननगर पोलीस ठाण्यात आरोपी विरोधात खूनाचा गुन्हा दाखल करण्यात आला होता. या घटनेने गावात खळबळ उडाली होती. दुसरीकडे पोलिसांना आरोपीचा शोध घेण्यासाठी मोठी कसरत करावी लागली. आरोपीच्या शोधासाठी पोलीस अधीक्षक अबिनाश कुमार यांनी स्थानिक गुन्हे शाखा आणि उस्माननगर पोलिसांची चार पथके तयार आली होती. पोलीस गावात तळ ठोकून होते. विशेष म्हणजे तीन वर्षापूर्वी मयत किशन खोसे यांच्या मुलाचा देखील अशाच प्रकारे खून करण्यात आला होता. प्रेम प्रकरणातून मयताच्या भाच्यानेच खून केला होता. त्या दिशेने देखील पोलिसांनी तपास सुरु केला. पण कुठलाच सुगावा लागत नव्हता. पोलिसांकडून साध्या वेशभूषेत गावातील लोकांची चौकशी करण्यात आली. चौकशी दरम्यान पोलिसांना गावातील ३६ वर्षीय मदन हंबर्डे यावर संशय आला. घटनेच्या दिवशी सकाळी चार वाजता आरोपी हा त्याच मार्गावरून गेल्याची माहिती पोलिसांना मिळाली. पोलिसांनी त्याला ताब्यात घेऊन चौकशी केली असता अनैतिक संबंधाच्या कारणावरून आणि पूर्ववैमनस्यातून खून केल्याची कबुली आरोपी मदन हंबर्डे याने दिली. मयत आणि आरोपीच्या कुटुंबातील सदस्यामध्ये अनैतिक संबंध असल्याचा संशय मदन हंबर्डे याला होता. याच संशयावरून ”मला कोणी मारून टाकेल” याची धास्ती देखील त्याला होती, त्यामुळे आरोपीने किशन खोसे याचा खून केल्याचं पोलिसांनी सांगितले. विशेष म्हणजे संशय येऊ नये म्हणून आरोपी मदन हंबर्डे हा नेहमीप्रमाणे वागायचा. स्थानिक गुन्हे शाखा आणि उस्माननगर पोलिसांनी हा गुन्हा उघडकीस आणला.