Rajendra Nikam
शाहदराचे डीएसपी यांनी या हत्येबाबत माहिती देताना सांगितले की, शनिवारी सकाळी यमुना स्पोर्ट्स कॉम्प्लेक्समध्ये भांडी व्यावसायिक सुनील हे त्यांचे साथीदार सुमितसोबत फिरायला गेले असताना ही घटना घडली. यावेळी त्याच्यावर गोळीबार करण्यात आला. या घटनेबाबत दिल्ली पोलिसांना पीसीआर कॉल आला होता. दुचाकीवरून आलेल्या दोन हल्लेखोरांनी त्याच्यावर गोळी झाडली असे तपासात समोर आले आहे. एका भांडी व्यापाऱ्याची गोळ्या झाडून हत्या करण्यात आल्याची घटना शनिवारी दिल्लीतील फ्लोर मार्केट परिसरात घडली होती. या हत्येप्रकरणी पोलिसांनी गोळीबार करणाऱ्या दोघांची ओळख पटवली असून, दोन्ही शूटर गँगस्टर हाशिम बाबा टोळीशी संबंधित असल्याची माहिती समोर आली आहे. या गुन्ह्यामागच्या पार्श्वभूमीचा छडा लावण्यात पोलिसांना यश आले आहे. पोलीस सूत्रांनी दिलेल्या माहितीनुसार, तिहार तुरुंगात बंद असलेला कुख्यात गुंड हाशिम बाबा याच्या टोळीने हा खून केला असल्याचा प्राथमिक अंदाज आहे.
पोलिसांनी दिलेल्या माहितीनुसार, शूटर विराट नावाच्या एका व्यक्तीला मारण्यासाठी आले होते. मात्र, चुकून त्यांनी सुनील जैन यांना मारलं. गोळीबार करणाऱ्या दोन्ही आरोपींवर यापूर्वीही अनेक गुन्हे दाखल आहेत. दोन्ही शूटर यमुनापार येथील रहिवासी असून, ते हाशिम बाबा टोळीशी बऱ्याच काळापासून संबंधित आहेत. जहीर आणि गोलू अशी त्यांची नावं असून त्यांच्यावर हत्येचा संशय आहे. दोघांनाही लवकरच अटक होऊ शकते. या हत्याकांडात ९ एमएम आणि ७.६१ एमएमच्या पिस्तुलांचा वापर करण्यात आला होता. दिवाळीदरम्यान झालेल्या दुहेरी हत्याकांडाचा बदला घेण्यासाठी आलेल्या हल्लेखोरांनी सुनील जैन यांची चुकून हत्या केल्याचे पोलिस तपासात समोर आले आहे. गेल्या दिवाळीत ३१ ऑक्टोबर रोजी फ्लोर मार्केट पोलीस ठाण्याच्या हद्दीत काका-पुतण्या असलेले आकाश शर्मा आणि ऋषभ यांची हत्या झाल्याचे तपासात समोर आले आहे. एका अल्पवयीन मुलालाही दिल्ली पोलिसांनी हत्येप्रकरणी पकडले होते, या अल्पवयीन मुलाच्या वडिलांचे नाव विराट आहे. अशा स्थितीत अल्पवयीन मुलाचे वडील विराट यांची हत्या करण्यासाठी आलेल्या हाशिम बाबा टोळीतील दोघांनी गैरसमजूतीतून सुनील जैन यांची हत्या केल्याचा पोलिसांना संशय आहे सुनील जैन यांची हत्या झाली त्यावेळेस त्यांच्यासोबत सुमित नावाची व्यक्तीही त्यांच्या स्कूटरवर होती. घटनेनंतर सुमितने पोलिसांना जे सांगितले आहे त्याने पोलिसही आश्चर्यात पडले आहेत.
