भरदुपारी रस्त्यात गाठलं, कमरेचा चाकू काढला अन् काही कळायच्या आत..

कल्याणमध्ये पुन्हा एकदा भयंकर घटना घडली आहे. येथे एका तरुणाला भररस्त्यात गाठून त्याच्यावर चाकूने सपासप वार करण्यात आलं आहे.कल्याणमध्ये पुन्हा एकदा धक्कादायक घटना घडली आहे. येथे एका तरुणाला रस्त्यात गाठून त्याच्यावर वार केले आहे. भरदिवसा ही घटना घडल्याने परिसरात दहशत माजली आहे. तर, घटनेनंतर परिसरातील लोकांनी हल्लेखोराला पकडून पोलिसांच्या ताब्यात दिलं आहे. 
कल्याण पश्चिमेकडे असलेल्या बैलबाजार चौकात एका तरूणाला गाठून त्याच्यावर चाकूने सपासप वार केल्याची धक्कादायक घटना घडली आहे. पूर्ववैमनस्यातून अरूण तिवारी याने दिलीप चौधरी नावाच्या तरुणावर हल्ला चढविला. एकीकडे घटनास्थळी असलेल्या काही लोकांनी हल्लेखोरापासून या तरूणाला वाचविले. तर दुसरीकडे लोकांनी हल्लेखोराला पकडून पोलिसांच्या ताब्यात दिले. हा सारा घटनाक्रम सीसीटीव्ही कॅमेऱ्यात कैद झाला आहे.

या घटनेची माहिती कळताच महात्मा फुले चौक पोलिसांनी घटनास्थळी दाखल होत चाकू हल्ला करणाऱ्या अरूण तिवारी या हल्लेखोराला ताब्यात घेतले आहे. या प्रकरणी ताब्यात घेतलेला आरोपी अरूण तिवारी आणि जखमी झालेल्या दिलीप चौधरी याच्याकडून अधिक माहिती जाणून घेत असल्याचे वरिष्ठ पोलिस निरीक्षक ज्ञानेश्वर साबळे यांनी सांगितले. बैलबाजार चौकात शनिवारी दुपारच्या सुमारास दिलीप चौधरी हा काही कामानिमित्त आला होता. त्याच्या मागावर अरूण तिवारी कमरेला चाकू लावून आला. काही कळण्याच्या आतच त्याने कमरेला खोचलेला चाकू बाहेर काढून दिलीपवर हल्ला चढविला. चाकूचे वार पोटावर केल्याने दिलीप रक्तबंबाळ झाला. हा प्रकार पाहून चौकातील काही लोकांनी हल्लेखोर अरूण तिवारी याला पकडले आणि घटनास्थळी दाखल झालेल्या पोलिसांच्या हवाली केले. हा सारा घटनाक्रम सीसीटीव्ही कॅमेऱ्यात कैद झाला असून पोलिसांनी फुटेज ताब्यात घेतले आहे. याच दरम्यान काहींनी दिलीपला उचलून केडीएमसीच्या रूक्मिणीबाई हॉस्पिटलमध्ये हलविले. वेळीच उपचार मिळाल्यामुळे जखमी दिलीप चौधरी याचे प्राण वाचले आहेत. सध्या त्याची प्रकृती स्थिर असल्याचे हॉस्पिटल सूत्रांकडून सांगण्यात आले. मात्र हा हल्ला कोणत्या कारणामुळे झाला? याचा चौकस तपास ताब्यात घेतलेला हल्लेखोर अरूण तिवारी याच्याकडून करण्यात येत आहे.