गृहमंत्रिपद सोडा तुम्हाला ही दोन खाती देतो, शिंदेंसमोर भाजपचा नवा प्रस्ताव.

विधानसभेच्या निवडणुकीचा निकाल लागल्यानंतर महायुतीचं सरकार स्थापन होणार हे निश्चित झालं होतं. पण, अद्यापही सरकार स्थापन झालेलं नाही. ५ डिसेंबरला मुख्यमंत्रिपदाचा शपथविधी सोहळा पार पडणार आहे. तरी, मुख्यमंत्री कोण होणार यावर शिक्कामोर्तब झालेलं नाही. आज, भाजपच्या कोअर कमिटीच्या बैठक होत आहे. या बैठकीनंतर विधीमंडळाची बैठक पार पडेल. त्यामध्ये विधीमंडळ नेत्याची निवड केली जाईल. शपथविधीला अवघे काही तास शिल्लक असल्याने राज्यात राजकीय घडामोडींना मोठा वेग आलेला दिसत आहे. यादरम्यान, एकनाथ शिंदे आणि देवेंद्र फडणवीस यांची बैठक पार पडली. फडणवीसांनी थेट वर्षा बंगला गाठत शिंदेंची भेट घेतली. पाऊण तास या दोन नेत्यांमध्ये बैठक झाली. त्यानंतर राज्याचं गृहखातं हे फडणवीसांकडेच राहणार हे ठरल्याचं सूत्रांच्या माहितीने समोर आलं आहे.

शिंदे-फडणवीसांच्या बैठकीतही मंत्रिपदाचा तिढा काही सुटलेला दिसत नाही. त्यामुळे आज बुधवारी पुन्हा बैठक होण्याची शक्यता आहे. गृहमंत्रिपद हे फडणवीसांकडे राहावं अशी भाजपची इच्छा आहे. त्याबदल्यात शिंदेंना उपमुख्यमंत्रिपद आणि त्यासह नगरविकास खातं आणि आणखी एक खात्याची ऑफर दिल्याची सूत्रांची माहिती आहे. तसा प्रस्ताव एकनाथ शिंदेंपुढे ठेवण्यात आला आहे. आता यावर शिंदे काय निर्णय घेतात हे अद्याप समोर आलेलं नाही. 
शपथविधी सोहळा आता काही तासांवर आला आहे. त्यामुळे आज मंत्रिपदाच्या तिढ्यावर आज निर्णय होणे अपेक्षित आहे. दरम्यान, भाजपकडून आज विधीमंडळ पक्षाच्या बैठकीत मुख्यमंत्रिपदाचाय नावावर शिक्कामोर्तब होणार आहे.