पाचोरा – भडगाव विधानसभा मतदारसंघामधून आमदार किशोर पाटलांना तिसऱ्यांदा मिळालं तिकीट

पाचोरा – भडगाव विधानसभा मतदारसंघामधून आमदार किशोर पाटलांना तिसऱ्यांदा मिळालं तिकीट शिवसेना शिंदे गटाची ४५ उमेदवारांची पहिली यादी जाहीर.

भडगाव तालुका प्रतिनिधी : यशकुमार पाटील. पाचोरा : महाराष्ट्र विधानसभा निवडणुकीसाठी शिवसेनेची (शिंदे गट) पहिली यादी नुकतीच जाहीर करण्यात आली असून यामध्ये ४५ जणांना उमेदवारी देण्यात आली आहे. पाचोऱ्यातून विद्यमान आमदार किशोर आप्पा पाटील यांना तिसऱ्यांदा उमेदवारी जाहीर करण्यात आली आहे. दरम्यान, उमेदवारी जाहीर होण्याआधीच आमदार किशोर आप्पांनी अर्ज दाखल करण्याची तारीख जाहीर केल्यानुसार उद्या २४ ऑक्टोबर रोजी ते आपला उमेदवारी अर्ज दाखल करणार असल्याचे सांगल जात आहे.

गेल्या दहा वर्षांपासून पाचोरा-भडगाव विधानसभा मतदारसंघाचे प्रतिनिधित्व विद्यमान आमदार किशोर आप्पा पाटील करत आहेत. याठिकाणी मागच्या विधानसभा निवडणुकीत अपक्ष म्हणून लढलेले आणि आता सध्या भाजपचे पाचोरा तालुकाध्यक्ष अमोल शिंदे हे देखील भाजपकडून निवडणूक लढविण्यासाठी इच्छुक असल्याने ही जागा नेमकी कुणाला मिळणार असा प्रश्न उपस्थित केला जात होता. मात्र, शिवसेनेने आमदार किशोर आप्पा पाटील यांना तिसऱ्यांदा संधी देत रात्री त्यांच्या नावासह एकूण ४५ उमेदवारांची घोषणा केली. दरम्यान, आमदार किशोर पाटील हे आता आमदारकीच्या हॅट्रिकसाठी निवडणुकीच्या रिंगणात आहेत.