भरधाव कार दुभाजक ओलांडून दुसऱ्या लेनमध्ये, दुचाकीला धडक; कारचा चक्काचूर, दोघांचा दुर्दैवी शेवट.

शिर्सुफळ फाट्याजवळ भीषण अपघात झाला, यात दुचाकी आणि कारची समोरासमोर धडक झाली. या दुर्घटनेत कार चालकाचा जागीच मृत्यू झाला. भरधाव वेगात असलेल्या कारने दुभाजक ओलांडून विरुद्ध दिशेने दुचाकीला धडक दिल्याने हा अपघात झाला.संत तुकाराम महाराज पालखी महामार्गावर खराडेवाडी नजीक शिर्सुफळ फाट्यावर १० जुलै रोजी रात्री साडेदहा दरम्यान अपघाताची भीषण घटना घडली. या घटनेत विशाल रामचंद्र कोकरे या दुचाकीस्वाराचा, तर चारचाकी चालक अजित लक्ष्मण लगड याचाही मृत्यू झाला. घटनास्थळावरून मिळालेल्या माहितीनुसार टाटा टिगोर कंपनीची कार दौंडकडून बारामतीकडे निघाली होती. कार अत्यंत वेगाने निघाली होती. या कारचालकाचं कारवरील नियंत्रण सुटलं आणि कार राष्ट्रीय महामार्गावरील मोठा दुभाजक ओलांडून डावीकडील बाजूला,

ज्या रस्त्याने बारामतीकडून दौंडला वाहनं जातात, त्या विरुद्ध बाजूला विरुद्ध दिशेने गेली.त्याच वेळी बारामतीकडून कुरकुंभच्या औद्योगिक वसाहतीत कामासाठी निघालेल्या दुचाकी चालकाला या कारने जोरात धडक दिली. ही धडक एवढी भयानक होती की, यात वाहनचालकाचं शीर धडापासून वेगळं झालं आणि त्याच्या शरीराचा चेंदामेंदा झाला. यात चारचाकी कार चालकाचाही जागीच मृत्यू झाला. अपघातात चारचाकी वाहन (MH42 BE 5866) पलटी झालं. अपघाताच्या जागेपासून जवळपास 300 फूट अंतरावर कार फरपटत जाऊन लोखंडी संरक्षित कठड्यावर आदळली.अपघात इतका भीषण होता, की दुचाकी चारचाकीमध्ये शिरली होती. खराडेवाडीच्या ग्रामस्थ आणि ग्रामसुरक्षा दलाच्या तरुणांनी तातडीची मदत करण्याचा प्रयत्न केला मात्र तोपर्यंत दोघांचाही मृत्यू झाला होता.

सुपा पोलीस ठाण्याचे सहाय्यक निरीक्षक मनोजकुमार नवसरे, सोमनाथ होले, पोलीस शिपाई सचिन कोकणे आदींनी घटनास्थळी पोहोचून मृतदेह ताब्यात घेतले, पंचनामा केल्यावर शवविच्छेदनासाठी पाठवण्यात आले.याप्रकरणी धुमाळवाडी, पणदरे (ता. बारामती) येथील हर्षद रामचंद्र कोकरे यांनी सुपा पोलीस ठाण्यात फिर्याद दिली. यानंतर मृत कार चालक अजित लक्ष्मण लगड (रा. गोपाळवाडी, दौंड) याच्यावर पोलिसांनी गुन्हा दाखल केला. लगड हा देखील राज्य राखीव पोलीस दलात कार्यरत होता, अशी माहिती आहे. सुपा पोलीस ठाण्याचे फौजदार कोळी पुढील तपास करत आहेत.