Rajendra Nikam
हिंगोली जिल्ह्यातील वसमत तालुक्यातील दोन महिला भाविकांचा गाणगापूर येथे दर्शनासाठी जात असताना भीषण अपघात झाला. गुरुपौर्णिमेनिमित्त दत्तगुरूंच्या दर्शनासाठी आलेल्या महिलांच्या ऑटोला बसने धडक दिल्याने त्यांचा दुर्दैवी मृत्यू झाला. या घटनेमुळे वसमत परिसरात शोककळा पसरली आहे.गुरुपौर्णिमेच्या निमित्ताने गाणगापूरला दत्तगुरुंच्या दर्शनासाठी अनेक भाविक दाखल झाले होते. अशाच एका दत्तगुरुंच्या दर्शनासाठी निघालेल्या भाविकांवर काळाने घाला घातला आहे. हिंगोलीच्या वसमत तालुक्यातील वसमत आणि बाबुळगाव येथील महिलांचा दर्शनाला पोहोचण्याआधीच भीषण अपघातात मृत्यू झाल्याची दुर्दैवी घटना घडली आहे. तर या अपघातात एक महिला भाविक गंभीर जखमी झाली आहे.
गुरुपौर्णिमेच्या निमित्ताने गाणगापूर (कर्नाटक) दत्त मंदिरामध्ये भाविकांनी मोठ्या प्रमाणावर दत्तगुरूंच्या दर्शनासाठी गर्दी केली होती. याचवेळी काही महिला दत्तगुरुंच्या दर्शनासाठी जात असताना अपघात झाला आणि दोन महिला भाविकांचा दुर्दैवी मृत्यू झाला. तर एक महिला गंभीर जखमी झाली आहे. बुधवारी रात्री दहा वाजण्याच्या सुमारास ही घटना घडली आहे.वसमत येथून चार ते पाच भाविक महिला गाणगापूर येथे दर्शनासाठी आल्या होत्या. सकाळी अक्कलकोटमध्ये पोहोचल्यानंतर रात्रीच्या सुमारास त्या गाणगापूरला पोहोचल्या. तिथे मंदिरात दर्शनासाठी पोहोचण्याआधीच भीषण अपघात झाला. एका खाजगी ऑटोत बसून दत्तगुरूंच्या दर्शनासाठी मंदिराकडे निघालेल्या महिलांना बसने धडक दिली. एससी बस समोरून आल्याने ऑटो आणि बसची जोरदार धडक झाली.रात्रीची वेळ असल्याने एकच गोंधळ उडाला होता. या घटनेची माहिती गाणगापूर पोलीस स्टेशनला तात्ताळ देण्यात आली. पोलिसांनी घटनास्थळी धाव घेत ऑटोमधील जखमी महिलांना उपचारासाठी रुग्णालयात हलवलं, मात्र यावेळी दोन महिलांचा उपचारावेळी मृत्यू झालाचं वैद्यकीय अधिकाऱ्यांनी सांगितलं.वसमत येथील कुसुमताई विठ्ठल जाधव (55) आणि बाबुळगाव येथील रुक्मिणी बाई विठ्ठल ढोरे (45) यांचा या अपघातात मृत्यू झाला आहे. तर गंभीर जखमी झालेल्या लक्ष्मीबाई ढोरे यांना पुढील उपचारासाठी रुग्णालयात पाठवण्यात आलं आहे. या घटनेची माहिती मिळताच नातेवाईकांनी गाणगापुराकडे धाव घेतली. मृत महिलांचे मृतदेह वसमत येथे आणण्यात आले असल्याची माहिती आहे, त्यांच्यावर अंत्यसंस्कार होणार आहेत. या घटनेमुळे वसमत तालुक्यासह परिसरात शोककळा पसरली आहे.
