Rajendra Nikam
कॅनडातील मॅनिटोबा येथे झालेल्या विमान दुर्घटनेत श्रीहरी सुकेश नावाच्या एका भारतीय शिकाऊ पायलटचा दुर्दैवी मृत्यू झाला. स्टिनबॅकजवळ दोन प्रशिक्षण विमानांची हवेत टक्कर झाली, ज्यात हा अपघात घडला. टोरंटोमधील भारतीय दूतावासाने या घटनेची पुष्टी केली असून, मृताच्या कुटुंबियांना दूतावासाकडून शक्य ती मदत पुरवली जात आहे.टोरंटो: कॅनडाच्या मॅनिटोबामध्ये एका भीषण विमान दुर्घटनेत भारतीय तरुणाचा मृत्यू झाला आहे. श्रीहरी सुकेश असं मृत तरुणाचं आहे. सुकेश हा शिकाऊ पायलट होता. स्टिनबॅकजवळ हार्व्स एअर पायलट स्कूलच्या रनवेजवळ प्रशिक्षणासाठी वापरल्या जाणाऱ्या दोन विमानांची हवेत धडक झाली. टोरंटोमधील भारतीय दुतावासानं या अपघाताच्या वृत्ताला दुजोरा दिलेला आहे. मृताच्या कुटुंबाबद्दल दुतावासानं सहवेदना व्यक्त केल्या आहेत.
हार्व्स एयर पायलट स्कूलच्या दोन प्रशिक्षण विमानांनी एकमेकांना धडक दिली. दोन्ही विमानांची आकाशात धडक झाली. या अपघातात श्रीहरी सुकेशचा मृत्यू झाला. श्रीहरी अभ्यासात अतिशय हुशार होता. या अपघातात दुसऱ्या विमानाच्या पायलटचाही मृत्यू झाला. कॅनडाच्या अधिकाऱ्यांनी या अपघाताचा तपास सुरु केला आहे. अपघातामागील कारणाचा शोध घेतला जात आहे. तांत्रिक त्रुटींमुळे अपघात झाला की यामध्ये पायलटची चूक होती, याचा तपास केला जात आहे.श्रीहरी सुकेशच्या मृत्यूची माहिती टोरंटोमधील दूतावासानं दिली. एक्सवर पोस्ट करुन याबद्दलचा तपशील देण्यात आलेला आहे. ‘स्टिनबॅक, मॅनिटोबाच्या जवळ दोन विमानांची हवेत धडक झाली. त्यात तरुण भारतीय प्रशिक्षणार्थी पायलट श्रीहरी सुकेशचं दु:खद निधन झालं. आम्ही त्यांच्या कुटुंबाच्या संपर्कात आहोत. या कठीण काळात आम्ही त्यांना शक्य तितकी सर्व मदत करत आहोत,’ असं दूतावासानं पोस्टमध्ये म्हटलं आहे.श्रीहरी सुकेश एक महत्त्वाकांक्षी पायलट होता. तो कॅनडामध्ये प्रशिक्षण घेत होता. श्रीहरीच्या अपघाती निधनानं त्याच्या कुटुंबाला आणि मित्र परिवाराला मोठा धक्का बसला आहे. सोशल मीडियावर त्याच्या निधनाबद्दल शोक व्यक्त केला जात आहे. अनेकांनी श्रीहरीच्या मेहनती आणि चिकाटी वृत्तीचं कौतुक केलं आहे.
कॅनडाचं विमान उड्डाण प्राधिकरण आणि स्थानिक पोलीस अपघाताच्या कारणांचा शोध घेत आहे. त्यासाठी दोन्ही विमानांचे ब्लॅक बॉक्स ताब्यात घेण्यात आले आहेत. विमान अपघातांचं कारण अद्याप समजू शकलेलं नाही. प्रशिक्षण प्रक्रिया आणि हवामानाची स्थिती यांची समीक्षा केली जात आहे.
