Rajendra Nikam
मिरा-भाईंदर येथे मनसेने मोर्चा काढल्यानंतर चांगलाच गोंधळ माजला होता. पोलिसांनी परवानगी नाकारल्यानंतरही मनसेने मोर्चा काढल्याने पोलिसांनी आंदोलनकर्त्यांना ताब्यात घेतलं होतं. यावरुन सरकारवर मोठी टीका करण्यात आली होती.वसई-विरारचे पोलिस आयुक्त मधुकर पांडे यांची बुधवारी बदली करण्यात आली असून, त्यांच्या जागी निकेत कौशिक यांची नियुक्ती करण्यात आली आहे. मिरा-भाईंदरमध्ये मंगळवारी मराठीसाठी निघालेल्या मोर्चादरम्यान पोलिसांनी केलेल्या कारवाईमुळे तणाव निर्माण झाला होता. याच कारणास्तव पोलिस आयुक्त पांडे यांची उचलबांगडी करण्यात आल्याची चर्चा आहे.
पांडे यांनी डिसेंबर २०२२मध्ये मिरा-भाईंदर, वसई-विरार पोलिस आयुक्तपदाचा पदभार स्वीकारला होता. या पदावर ते अडीच वर्षांहून अधिक काळ कार्यरत होते. दोन महिन्यांपासून त्यांच्या बदलीच्या चर्चा सुरू होत्या. अखेर बुधवारी अपर पोलिस महासंचालकपदी ( प्रशासन) त्यांची बदली करण्यात आली. पांडे यांच्या जागी लाचलुचपत प्रतिबंधक विभागात अपर पोलिस महासंचालकपदी कार्यरत असणाऱ्या निकेत कौशिक यांची नियुक्ती करण्यात आली आहे.मिरा-भाईंदरमध्ये मंगळवारी मराठीसाठी मोर्चाची हाक देण्यात आली होती. त्याला पोलिसांकडून परवानगी नाकारण्यात आली. यावरून राज्य सरकारवर टीकेची झोड उठली होती. यामुळे मधुकर पांडे यांची बदली करण्यात आल्याचे बोलले जात आहे. परंतु, बदलीच्या आदेशात कोणतेही कारण देण्यात आलेले नाही.
मिरा-भाईंदरमध्ये अमराठी व्यापाऱ्यांच्या मोर्चाला उत्तर देण्यासाठी मंगळवारी मराठी बांधवांकडून मोर्चा काढण्यात आला होता.
