चोपडा शहरातील पहिली पिंक ऑटो रिक्षा चालक-मालक म्हणून योगिता ताई यांचा सन्मान जिल्हाधिकारी डॉ. आयुष प्रसाद यांच्या हस्ते पिंक रिक्षा चे वितरण.

जळगाव: महिलांच्या सक्षमीकरणाचा व आत्मनिर्भरतेचा दीपस्तंभ ठरणाऱ्या ऐतिहासिक उपक्रमात चोपडा शहरातील योगिता ताई या पहिल्या महिला पिंक ऑटो रिक्षा चालक-मालक ठरल्या आहेत. जिल्हाधिकारी डॉ. आयुष प्रसाद यांच्या हस्ते जिल्हाधिकारी कार्यालयाच्या आवारात त्यांना पिंक रिक्षा प्रदान करण्यात आली. या अनोख्या उपक्रमासाठी रोटरी क्लब जळगाव व मराठी प्रतिष्ठान यांचे विशेष सहकार्य लाभले. महिला सबलीकरण आणि उद्यमशीलता यांचे सशक्त उदाहरण ठरलेला हा उपक्रम मराठी प्रतिष्ठानतर्फे गेल्या पाच वर्षांपासून यशस्वीपणे राबविला जात आहे. महिलांना पिंक रिक्षा चालविण्यासाठी आवश्यक प्रशिक्षण देणे, उद्योजक व सामाजिक संस्थांच्या माध्यमातून डाऊन पेमेंट उपलब्ध करून देणे आणि महिलांना रिक्षा मालक बनविणे हे या उपक्रमाचे उद्दिष्ट आहे.

आजपर्यंत २२ महिलांनी शहरामध्ये पिंक रिक्षा चालक-मालक होण्याचा मान मिळवलेला असताना, ग्रामीण भागातून ही संधी मिळवणारी योगिता ही पहिलीच महिला ठरली आहे. त्या जिद्द, आत्मविश्वास आणि संघर्षातून इतर महिलांसाठी प्रेरणादायी उदाहरण ठरत आहेत. यावेळी जिल्हाधिकारी डॉ. आयुष प्रसाद यांनी योगिता ताई यांचे विशेष कौतुक करत “ही केवळ रिक्षा नसून महिलांच्या सक्षम भविष्यासाठी चाललेले एक चळवळीचे वाहन आहे. महिलांनी पुढे येऊन समाजात आपले स्थान निर्माण करावे हीच अपेक्षा,” असे उद्गार काढले. या उपक्रमामुळे ग्रामीण भागातील महिलांमध्ये आर्थिक स्वावलंबनाची नवी आशा निर्माण झाली असून, मराठी प्रतिष्ठान आणि रोटरी क्लब जळगाव यांनी समाजातील जबाबदार संस्था म्हणून दाखवलेली सामाजिक बांधिलकी निश्चितच उल्लेखनीय आहे. या प्रसंगी रोटरी क्लब जळगाव चे अध्यक्ष अ‍ॅड. सागर चित्रे,पराग अग्रवाल,माजी अध्यक्ष जितेंद्र ढाके,माजी डिस्ट्रिक्ट गव्हर्नर डॉ. चंद्रशेखर सिकची,रितेश जैन,प्रमोद नारखेडे माजी अध्यक्ष डॉ. शशिकांत गाजरे,जयवर्धन नेवे,सुभाष अमळनेरकर उद्योजक सुबोध चौधरी, डॉ.सृष्टी सुमोल चौधरी, अश्विन राणे, मराठी प्रतिष्ठानच्या डॉ. सविता नंदनवार,  निलोफर देशपांडे, हर्षाली चौधरी, खुशबू जुबेर देशपांडे, संदीप पाटील उपस्थित होते. या प्रसंगी मराठी प्रतिष्ठानचे अध्यक्ष ॲड. जमील देशपांडे यांनी जिल्हाधिकारी जळगाव व रोटरी क्लब जळगाव चे आभार मानले.