अंगापेक्षा बोंगा जड! चोरी तर केली, पण वजन तोलवेना; रस्त्यात तिजोरी फेकून चोराने ठोकली धूम.

बालेवाडीतील व्यावसायिक संकुलातील परदेशी चलन विनिमय कार्यालयात दोन जुलै रोजी ही चोरीची घटना घडली होती.एका चोरट्याने व्यावसायिक संकुलातील कार्यालयातून सुमारे २० लाख रुपयांचे परदेशी चलन असलेली तिजोरी चोरली. मात्र, दुचाकीवरून ती तिजोरी घेऊन जाणे अवघड झाल्याने तीनशे मीटर अंतरावरच ती फेकूनही दिल्याचे पोलिस तपसात समोर आले. पोलिसांनी सीसीटीव्हीच्या माध्यमातून केलेल्या तपासात ही गोष्ट उघड झाली. त्यानुसार पोलिसांनी तिजोरीचा शोध घेऊन, ती ताब्यात घेतली.बालेवाडीतील व्यावसायिक संकुलातील परदेशी चलन विनिमय कार्यालयात दोन जुलै रोजी ही चोरीची घटना घडली होती. फॉरेक्स व्यापारी रोहित मालुसरे (वय ४०, रा. सोमवार पेठ) यांनी बाणेर पोलिसांत तक्रार नोंदवली.

बाणेर पोलिस ठाण्याचे वरिष्ठ निरीक्षक चंद्रशेखर सावंत यांनी सांगितले, ‘आम्हाला बालेवाडीतील यशदा चौकात एका मोकळ्या जागेत सर्व परदेशी चलनाच्या नोटांसह तिजोरी सापडली. आम्ही तिजोरीतील सर्व परदेशी चलन जप्त केले.’ मालुसरे बुधवारी सकाळी नऊ वाजण्याच्या सुमारास कार्यालयात गेले, तेव्हा चोरीची घटना उघड झाली. त्यांनी तातडीने आमच्याशी संपर्क साधला. एका पथकाने मालुसरेंचा जबाब नोंदवून गुन्हा दाखल केला.दुसऱ्या पथकाने मालुसरेंच्या कार्यालयातील, इमारतीतील आणि रस्त्यावरील व्यावसायिक आस्थापनांमधील सीसीटीव्ही फुटेज गोळा केले.

त्या फुटेजची बारकाईने तपासणी केल्यावर, एक चोर दुचाकीस्वार व्यावसायिक इमारतीत पोहोचल्याचे दिसले. मालुसरेंच्या कार्यालयात घुसून तो तिजोरीपर्यंत पोहोचला. त्याने ती अवजड तिजोरी मोठ्या कष्टाने त्याच्या दुचाकीपर्यंत नेली. मात्र, तिजोरीच्या मोठ्या आकारामुळे चोराला ती दुचाकीवरून घेऊन जाण्यात अडचणी आल्या; तरीही त्याच अवस्थेत तो दुचाकी सुरू करून निघाला. त्या वेळी तिथे सुरक्षारक्षक नव्हता, अशी माहिती सावंत यांनी दिली.चोरी झालेले परकीय चलन आम्ही पूर्णपणे हस्तगत केले आहे. आता आम्ही चोराचा शोध घेत आहोत. लवकरच आम्ही त्याच्यापर्यंत पोचू.