घाट परिसरात पावसाचा जोर वाढणार, पुढील दोन दिवस धो-धो बसरणार; ‘या’ भागांत रेड अलर्ट जारी.

 राज्यात मंगळवार, ८ जुलैपर्यंत कोकण तसेच घाट परिसरात काही ठिकाणी पावसाचा जोर वाढण्याची शक्यता आहे. पुणे घाट परिसरात रविवार आणि सोमवारी ‘रेड ॲलर्ट’ जारी करण्यात आला आहे. तर मुंबईत ‘यलो ॲलर्ट’ देण्यात आला आहे आणि ठाणे, पालघरला ‘ऑरेंज ॲलर्ट’ देण्यात आला आहे.राज्यात मंगळवार, ८ जुलैपर्यंत कोकण तसेच घाट परिसरात काही ठिकाणी पावसाचा जोर वाढण्याची शक्यता आहे.

घाट परिसरात काही ठिकाणी ६ आणि ७ जुलैला तीव्र अतिरिक्त पावसाचीही शक्यता वर्तवण्यात आली आहे. पुणे घाट परिसरात रविवार आणि सोमवारी ‘रेड ॲलर्ट’ जारी करण्यात आला आहे.पश्चिम बंगालच्या गंगेच्या प्रदेशात आणि लगतच्या भागात हवेच्या वरच्या थरात चक्रीय वातावरण निर्माण झाले आहे. गुजरातपासून पश्चिम बंगालच्या गंगेच्या प्रदेशाच्या उत्तर भागापर्यंत द्रोणीय स्थिती निर्माण झाली आहे. ही स्थिती मध्य प्रदेश, छत्तीसगड, झारखंड या राज्यांवरही आहे. महाराष्ट्र आणि कर्नाटकच्या किनारपट्टीवर द्रोणीय स्थिती निर्माण झाली आहे. या प्रणाली पश्चिमेकडे सरकत असल्याने महाराष्ट्राच्या काही भागांमध्ये मंगळवारपर्यंत पावसाचा जोर काहीसा वाढण्याची शक्यता असल्याचे शुक्रवारी प्रादेशिक हवामान विभागाने स्पष्ट केले. या कालावधीत कोकण आणि मध्य महाराष्ट्राच्या घाट परिसरात काही ठिकाणी मुसळधार ते अतिमुसळधार पावसाची शक्यता आहे. तर मध्य महाराष्ट्राच्या घाट परिसरात काही ठिकाणी आज, ६ जुलै आणि सोमवार, ७ जुलै रोजी अतितीव्र मुसळधार पाऊस पडू शकतो.मुंबईत ‘यलो ॲलर्ट’ देण्यात आला आहे. आज, रविवारी ठाणे आणि पालघरला ‘ऑरेंज ॲलर्ट’ देण्यात आला आहे. दक्षिण कोकणात रायगड, रत्नागिरी आणि सिंधुदुर्ग या जिल्ह्यांमध्ये रविवारी आणि सोमवारीही ‘ऑरेंज ॲलर्ट’ देण्यात आला आहे. रत्नागिरीत मंगळवारपर्यंत पावसाचा जोर अधिक राहील. नाशिक घाट परिसरात सोमवारपर्यंत ‘ऑरेंज ॲलर्ट’ देण्यात आला आहे. पुणे जिल्ह्यात मध्यम पाऊस असेल, तर पुणे घाट परिसरात मात्र अतितीव्र मुसळधार पावसाचीही शक्यता आहे. सातारा घाट परिसरातही मंगळवारपर्यंत ‘ऑरेंज ॲलर्ट’ देण्यात आला आहे. या कालावधीत पठारी प्रदेशात म्हणजे घाटमाथ्याच्या पलीकडच्या जिल्ह्यांमध्ये पावसाचा जोर मध्यम राहील असा अंदाज आहे. पुढील दोन दिवसांत मराठवाडा आणि विदर्भात मेघगर्जनेसह पावसाची शक्यता आहे.