Rajendra Nikam
पुण्यात एका तरुणीने बलात्काराची तक्रार दाखल केली. तक्रारीत कुरिअर बॉयने स्प्रे मारून बलात्कार केल्याचा आरोप होता. पोलिसांनी तपास केला. तपासात अनेक गोष्टी खोट्या असल्याचे समोर आले. तरुणीने तरुणाला ओळखत असल्याचे मान्य केले. स्प्रे वापरल्याचा पुरावा नाही. पोलिसांनी आरोपीला अटक न करता नोटीस दिली. अधिक तपास सुरू आहे.कोंढव्यातील एका उच्चभ्रू सोसायटीतील संगणक अभियंता तरुणीने केलेल्या बलात्काराच्या तक्रारीत नवीन तपशील समोर येत असून, पोलिसांनी या प्रकरणातील संशयित आरोपी तरुणाला अटक न करता नोटीस बजावली आहे. तपासात सहकार्य करणे आणि पोलिसांनी बोलावल्यास ठाण्यात हजर राहण्याच्या अटीसह ही नोटीस देण्यात आल्याची माहिती उपायुक्त डॉ. राजकुमार शिंदे यांनी दिली.
तरुणीच्या तक्रारीनुसार, आरोपी कुरिअर बॉय असल्याचे सांगून घरात शिरला व तोंडावर स्प्रे फवारून बलात्कार केला, असा आरोप केला होता. मात्र, तपासात वेगळ्याच बाबी उघड झाल्या. सुरुवातीला तरुणीने संबंधित तरुणाला ओळखत नसल्याचे सांगितले. मात्र, पोलिसांनी सादर केलेल्या पुराव्यांवरून ती त्याला ओळखत असल्याचे तिने मान्य केले.पुणे पोलिसांना तपासात स्प्रेचा वापर झाल्याचे पुरावे आढळले नाहीत. तरुणाने फोटो काढून ‘मी परत येईन,’ असा मजकूर लिहिल्याचा दावाही खोटा ठरला. तो फोटो तरुणीनेच अँपद्वारे एडिट केल्याचे स्पष्ट झाले. गुन्हा दाखल करण्यात आलेल्या तरुणाने पोलिसांना दिलेल्या माहितीनुसार, त्याला तरुणीनेच घरी बोलावले होते. या प्रकरणाचे गांभीर्य लक्षात घेऊन पोलिसांनी सुमारे ५०० सीसीटीव्ही फुटेज तपासून आरोपीची ओळख पटवली. शुक्रवारी (४ जुलै) त्याला एका लग्नसमारंभातून ताब्यात घेऊन कोंढवा पोलिस ठाण्यात चौकशीसाठी आणले गेले. त्यानंतर पोलिसांनी तरुणी व आरोपीची समोरासमोर चौकशी केली. त्यांच्या पालकांनाही याबाबत माहिती दिली.प्रकरणातील गुंतागुंत लक्षात घेऊन पोलिसांनी सध्या आरोपीला अटक न करता नोटीस देऊन सोडले आहे. तरुणीनेही काही गोष्टी चुकीच्या सांगितल्याचे मान्य केले, तरी आरोपीने जबरदस्तीचा केल्याचा तिचा दावा आहे.कोंढवा येथील घटनेसंदर्भात पोलिसांनी तपास केला. या तपासादरम्यान वेगळ्याच गोष्टी समोर आल्या आहेत. संबंधित तरुण-तरुणी गेल्या अनेक दिवसांपासून मित्र आहेत. ते नियमित एकमेकांना भेटायचे, दोघांमध्ये संभाषण असायचे. तरुणीनेच त्याला फोन करून घरी बोलावले होते, कुठलाही स्प्रे मारला नाही,’ असे तपासात समोर आले; परंतु समाजात वेगळीच माहिती गेली असून, पोलिस आयुक्तांना पत्रकार परिषद घेऊन वस्तुस्थिती समोर मांडण्याच्या सूचना केल्या आहेत, तर या तरुणीने तक्रार करण्याचे कारण काय? याबाबतही तपास करण्याबाबत आदेश दिल्याचे पवार यांनी सांगितले.
