हिमाचल प्रदेशात पावसाचं थैमान! दोन आठवड्यांत ४५ जणांचा मृत्यू; ३७ बेपत्ता, ‘या’ भागात ८ जुलैपर्यंत अलर्ट जारी.

मान्सून दाखल झाल्यापासून मागील दोन आठवड्यांत ढगफुटी, पूर, दरडी कोसळणे यांसारख्या आपत्तींमुळे ४५ जणांचा मृत्यू झाला आहे. तर ३७ जण बेपत्ता आहेत.हिमाचल प्रदेशात २० जून रोजी मान्सून दाखल झाल्यापासून मागील दोन आठवड्यांत ढगफुटी, पूर, दरडी कोसळणे यांसारख्या आपत्तींमुळे ४५ जणांचा मृत्यू झाला आहे. तर ३७ जण बेपत्ता आहेत. या कालावधीत अतिवृष्टीमुळे राज्यात पाच हजार कोटी रुपयांचे नुकसान झाले आहे, अशी माहिती अधिकाऱ्यांनी शुक्रवारी दिली.अतिवृष्टीमुळे झालेल्या १४ जणांचा मृत्यू ढगफुटीमुळे, आठ जणांचा अचानक आलेल्या पुरामुळे, तर एकाचा भूस्खलनामुळे झाला, तर सात जण वाहून गेले, असे अधिकाऱ्यांनी सांगितले.अतिवृष्टीचा सर्वाधिक तडाखा मंडी जिल्ह्याला बसला असून, मंगळवारी ढगफुटी, अचानक पूर आणि भूस्खलनाच्या १० घटनांमध्ये १७ जणांचा मृत्यू झाला.

केवळ मंडी जिल्ह्यात ३१ लोक बेपत्ता असून त्यांचा शोध सुरू आहे, अशी माहिती अधिकाऱ्यांनी दिली. राष्ट्रीय आपत्ती निवारण पथकाच्या जवानांनी शुक्रवारी भराड, देजी, पायला आणि रुकचुई या गावांत अडकलेल्या ६५ जणांची सुटका करून सुरक्षितस्थळी हलवले.अतिवृष्टीमुळे भूस्खलन, रस्ते वाहून जाणे आणि नद्यांना आलेले पूर यांमुळे अनेक गावांचा संपर्क तुटला असून वाहून आलेला राडारोडा लोकांची घरे तसेच शेतांमध्ये साचला आहे. राज्यात १५० घरे, १०६ गोठे, ३१ वाहने, १४ पूल आणि अनेक रस्त्यांची हानी झाली असून, १६४ गुरे वाहून गेली आहेत. सुटका केलेल्या ४०२ जणांसाठी पाच मदत शिबिरे उभारण्यात आली आहेत. यातील ३४८ जण एकट्या मंडी जिल्ह्यातील आहेत.

दरम्यान, हिमाचल प्रदेशातील २८० रस्ते वाहनांसाठी बंद करण्यात आल्याचे राज्य आपत्कालीन कामकाज केंद्राकडून जाहीर करण्यात आले आहे. यातील १५९ मंडी, ४९ सिरमौर आणि ३६ कुलू जिल्ह्यातील आहेत.राज्यात आज शनिवारपासून ते मंगळवारपर्यंतच्या कालावधीत काही ठिकाणी मुसळधार ते अति मुसळधार पावसाचा इशारा देत ‘ऑरेंज अॅलर्ट’ स्थानिक हवामान विभागाने जारी केला आहे.उत्तराखंडमध्ये अतिवृष्टीमुळे पाण्याची पातळी वाढलेल्या भीमताल तलावात हवाई दलाचे दोन जवान मृत्युमुखी पडल्याची माहिती अधिकाऱ्यांनी शुक्रवारी दिली. प्रिन्स यादव (२२, पठाणकोट, पंजाब) आणि साहिल कुमार (२३, मुझफ्फरपूर, बिहार) अशी त्यांची नावे आहेत.