भडगाव ग्रामीण रुग्णालयाच्या छतावर ‘डॉक्टरी मलमपट्टी’; ऑपरेशन थिएटरमध्ये पाणी गळतीनं उघड केली यंत्रणेची गळती!

भडगाव ग्रामीण रुग्णालयाच्या छतावर ‘डॉक्टरी मलमपट्टी’; ऑपरेशन थिएटरमध्ये पाणी गळतीनं उघड केली यंत्रणेची गळती!भडगाव : “जिथं जीव वाचवले जातात, तिथंच आज जीव धोक्यात आहे!” – अशी परिस्थिती भडगाव ग्रामीण रुग्णालयाची सध्या झाली आहे. गोरगरीब आणि ग्रामीण भागातील रुग्णांसाठी आशेचा किरण असलेलं हे रुग्णालय सध्या स्वतःच गंभीर ‘आजारी’ पडल्याचं विदारक चित्र समोर आलं आहे.ऑपरेशन थिएटरच्या छतामधून सातत्याने पाणी गळत आहे आणि ते थेट ऑपरेशन थिएटरमध्ये पडत आहे. या प्रकारामुळे रुग्णांच्या जीविताला धोका निर्माण झाला आहे, तर डॉक्टर आणि आरोग्य कर्मचाऱ्यांच्या नैतिकतेवरही प्रश्नचिन्ह निर्माण झालं आहे.

फक्त ऑपरेशन थिएटरच नाही, तर संपूर्ण रुग्णालयच पाणीगळी, भिंतींच्या ओलसरपणामुळे खराब झालेली अवस्था, शौचालयांची दुरवस्था आणि स्वच्छतेचा अभाव यामध्ये अडकलेलं आहे. येथे उपचारासाठी येणाऱ्या रुग्णांची अक्षरशः फरपट सुरू आहे. सर्वात धक्कादायक बाब म्हणजे, या परिस्थितीकडे लक्ष वेधण्यासाठी रुग्णालय प्रशासनाने अनेक वेळा सार्वजनिक बांधकाम विभागाला लेखी तक्रारी केल्या आहेत.

मात्र, त्यांच्या निदर्शनास आलेली ही गंभीर समस्या ‘तात्पुरत्या मलमपट्टी’वर सोडवण्यात आली – छतावर केवळ कागद लावून पाणी थांबवण्याचा प्रयत्न करण्यात आला आहे!आज या रुग्णालयाच्या दयनीय अवस्थेबद्दल भडगाव तालुक्यातील नागरिकांमध्ये तीव्र नाराजी व्यक्त होत आहे. ‘आमचं आरोग्य रामभरोशे!’ अशी चर्चा सर्वसामान्यांमध्ये रंगू लागली आहे.आता प्रश्न असा आहे – रुग्णालयात रुग्ण सुरक्षित असतील का? की यंत्रणांमध्येच उपचारांची गरज निर्माण झाली आहे?