पुन्हा एकदा भीषण विमान अपघात, हजारो फूट उंचीवर पंख तुटला; धावपट्टीवरून निघालेलं प्लेन जंगलात कोसळलं.

अहमदाबाद – लंडन विमान अपघातानंतर पुन्हा एकदा दोन विमान अपघात समोर आले आहेत. एका दुर्घटनेत विमानाचा पंख तुटला, तर दुसऱ्या अपघातात स्काईडायव्हिंग करताना एक विमान कोसळलं. जखमींवर उपचार सुरू आहेत.गेल्या महिन्यात अहमदाबादमध्ये विमान कोसळून भीषण अपघात झाला होता. यानंतर आता पुन्हा एकदा दोन विमान दुर्घटना समोर आल्या आहेत. नॉर्थ कॅरोलिनामध्ये हजारो फूट उंचीवर उडणाऱ्या विमानाचा पंख तुटून तो खाली रस्त्यावर पडला. मात्र यात मोठी दुर्घटना टळली. तर, दुसरीकडे न्यू जर्सीमध्ये स्कायडायव्हिंग विमान धावपट्टीवरून जंगलात कोसळल्याची घटना घडली असून या अपघातात १५ जण जखमी झाले आहेत.न्यू जर्सीमधील घटनेत, स्कायडायव्हिंग दरम्यान विमान कोसळल्याने १५ जण जखमी झाले. हे विमान क्रॉस कीज विमानतळावर दुर्घटनाग्रस्त झालं.

अधिकाऱ्यांनी दिलेल्या माहितीनुसार, फिलाडेल्फियापासून सुमारे ३३.८ किलोमीटर क्रॉस कीज विमानतळावर “सेसना 208 बी” विमान दुर्घटनाग्रस्त झालं.या विमानात १५ लोक होते. अपघाताची माहिती मिळताच अग्निशमन दलाच्या गाड्या आणि इतर आपत्कालीन सेवा घटनास्थळी दाखल झाल्या. त्यानंतर तातडीने बचावकार्य सुरू करण्यात आलं. जखमींना तातडीने रुग्णालयात दाखल करण्यात आलं. न्यू जर्सीमधील या विमान दुर्घटनेत जखमी झालेल्या लोकांवर रुग्णालयात उपचार सुरू आहेत.न्यू जर्सीमधील कॅम्डन येथील कूपर यूनिवर्सिटी रुग्णालयाच्या प्रवक्त्यांनी या अपघातात जखमी झालेल्यांबद्दल माहिती दिली. त्यांनी सांगितलं, की रुग्णालयाच्या ट्रॉमा सेंटरमध्ये तीन लोकांवर उपचार सुरू आहेत, तर इतर आठ लोकांवर आपत्कालीन विभागात उपचार सुरू आहेत, त्यांना किरकोळ दुखापत झाली आहे.

डॉक्टरांनी दिलेल्या माहितीनुसार, बहुतेक जखमींची प्रकृती स्थिर आहे. दुर्घटनाग्रस्त विमान जंगलात पडल्यानंतर त्याचं मोठ्या प्रमाणात नुकसान झालं आहे.नॉर्थ कॅरोलिनामध्ये विमानाचा पंख तुटल्याची घटना आणि स्कायडायव्हिंग विमान कोसळल्याच्या दोन्ही घटनांची चौकशी सुरू आहे. विमानाचा पंख तुटून पडण्याचं कारण आणि स्कायडायव्हिंग विमान धावपट्टीवरून जंगलात कसं कोसळलं, याचा तपास केला जात आहे.या दोन्ही घटनांमुळे अमेरिकेतील विमान प्रवासाच्या सुरक्षेबाबत प्रश्नचिन्ह निर्माण झालं आहे. विमान कंपन्या आणि विमानतळ प्रशासनाने या घटनांची गांभीर्याने दखल घेतली आहे.