Rajendra Nikam
अकोल्यातील अकोटमध्ये एका नऊ वर्षाच्या मुलाची त्याच्या सावत्र बापाने हत्या केली. दर्शन पळसकार असे मुलाचे नाव आहे. आरोपी आकाश कान्हेकर आणि त्याचा मित्र गौरव गायगोले यांना अटक करण्यात आली आहे. मुलाच्या आईने चार महिन्यांपूर्वी दुसरे लग्न केले होते. संपत्तीच्या संशयातून हत्या झाल्याचा पोलिसांचा अंदाज आहे. पोलिसांनी सीसीटीव्हीच्या मदतीने आरोपींना पकडले. अधिक तपास सुरू आहे.अकोल्यातील अकोटमध्ये एका सावत्र बापाने आपल्या नऊ वर्षाच्या चिमुकल्या मुलाची हत्या केल्याची धक्कादायक घटना घडली आहे. दर्शन वैभव पळसकार असं हत्या करण्यात आलेल्या मुलाचे नाव आहे. दरम्यान या घटनेने सर्वांनाच मोठा धक्का बसला. दर्शनच्या आईने चार महिन्यांपूर्वीच दुसरे लग्न केले होते. दर्शनला एक अकरा वर्षाची मोठी बहिण देखील आहे, सावत्र वडिलाने दर्शनची हत्या का केली याचं कारण अद्यापही समोर आलं नसून अकोट पोलीस याचा अधिक तपास करीत आहेत. हत्या केल्यानंतर आरोपीने दर्शनचा मृतदेह जंगलात फेकून दिला होता. सूत्रांनी दिलेल्या माहितीनुसार, सावत्र मुलगा भविष्यात संपत्तीत हिस्सा मागणार, या संशयातून सावत्र वडिलांनी त्याच्या मित्राच्या मदतीने हत्या केल्याची माहिती मिळत आहे.
आकाश साहेबराव कान्हेरकर असं मारेकरी सावत्र वडिलांचे नाव आहे. याशिवाय गौरव वसंतराव गायगोले असं मारेकऱ्याला मदत करणाऱ्या साथीदाराचे नाव आहे. अकोट पोलिसांनी दोघांनाही अटक करून त्यांच्याविरुद्ध खुनाचे गुन्हे दाखल केले आहे. मुले देवा घरची फुल अशी म्हण आहे. मात्र, ही फक्त आई-वडील असतानाच खरी आहे, याची प्रचिती अकोल्याच्या अकोट येथील घटनेनंतर आली आहे. कारण सावत्र बापानेच नऊ वर्षाच्या चिमुकल्या दर्शनचा खून केल्याची घटना घडली आहे.दर्शन हा 02 जुलैला बेपत्ता झाला होता. दर्शनच्या आईने याबाबत अकोट पोलिसात तक्रार दाखल केली. बेपत्ता झाल्याची तक्रार मिळताच अकोट शहर आणि अकोट ग्रामीण पोलिसांनी बेपत्ता दर्शनला शोधण्याचे शर्तीचे प्रयत्न केले. रात्रभर गस्त घालून हाती काहीच सापडलं नसल्याने, सकाळी पुन्हा शोध मोहीम सुरू केल्यानंतर, अकोट ग्रामीण भागातील चिचोना शेतशिवारात दर्शनचा मृतदेह आढळला. चिमुकल्याचा मृतदेह आढळल्याने खळबळ उडाली आहे.
