Rajendra Nikam
तृप्ती देसाई यांनी अहिल्यानगर उत्तरचे भाजप जिल्हाध्यक्ष नितीन दिनकर यांच्यावर गंभीर आरोप केले आहेत. दिनकर पदाचा गैरवापर करून महिलांना त्रास देत असल्याचा आरोप आहे. महिलांना ढाब्यावर आणि बियरबारमध्ये बोलावून डान्स करायला लावल्याचा आरोप त्यांच्यावर करण्यात आला आहे.एकीकडे राज्यभरात महिलांवर अत्याचाराचे प्रमाण दिवसेंदिवस वाढताना पाहायला मिळत आहे. त्यामुळे महिला सुरक्षिततेचा प्रश्न पुन्हा एकदा ऐरणीवर आला आहे. अशातच आता अहिल्यानगर उत्तरचे भाजप जिल्हाध्यक्ष नितीन दिनकर यांच्यावर भूमता ब्रिगेडच्या अध्यक्षा तृप्ती देसाई यांनी गंभीर आरोप केले आहेत. तसंच नितीन दिनकर यांची पक्षातून हकालपट्टी करण्याची मागणी सुद्धा तृप्ती देसाई यांनी केली आहे.
अहिल्यानगर उत्तरचे जिल्हाध्यक्ष नितीन दिनकर हे पदाचे आमिष देऊन महिलांना ढाब्यावर बोलवणे, बियरबारमध्ये बोलवणे, स्वतः दारू पिऊन महिलांना डान्स करायला लावणे अशाप्रकारे पदाचा गैरवापर करून महिलांना त्रास देत आहेत, अशा पद्धतीची लेखी तक्रार भूमाता ब्रिगेडच्या कार्यालयात दिनकर यांच्या विरोधात काही महिलांनी दिली असल्याचं देसाई यांनी म्हटलं आहे. दिनकर यांना पोलीस प्रोटेक्शन असल्यामुळे त्याची दहशत माजवून इतरांवर अनेक खोटे गुन्हे सुद्धा त्यांनी दाखल केले आहेत, अशीही तक्रार महिलांनी भूमाता ब्रिगेडकडे दिली असल्याचं देखील तृप्ती देसाई म्हणाल्या आहेत.राधाकृष्ण विखे पाटील यांच्या जवळची ही व्यक्ती असल्यामुळे त्यांच्याविरोधात जाहीरपणे कोणी बोलत नाही, बोलल्यास ते एखाद्या गुन्ह्यात अडकवतात. श्रीरामपूर येथे एका माजी मंत्र्यांच्या बंगल्यात दिनकर यांचे वास्तव्य असून तिथे अनेक गैरप्रकार चालतात असे महिलांनी सांगितल्याचा दावा देसाई यांनी केला आहे.महिलांनी याबाबतचा जून महिन्यातील श्रीरामपूर जवळील ढाब्यामधील दारू पिऊन मित्रांबरोबर डान्स करताना तसेच पदासाठी बोलावलेल्या महिला पदाधिकाऱ्यांनाही जबरदस्ती डान्स करायला लावत आहेत, असा एक व्हिडिओ सुद्धा आता समोर आला असल्याचं देसाई यांनी म्हटलं आहे.
अहिल्यानगर येथील भारतीय जनता पार्टीचे जिल्हाध्यक्ष महिलांबाबतीत असे चुकीचे कृत्य प्रकार करत असतील तर त्याला आळा घालणे गरजेचे आहे. त्यामुळे मुख्यमंत्री आणि प्रदेशाध्यक्षांनी तातडीने नितीन दिनकर यांचा राजीनामा घेऊन त्यांचे पक्षातून हकालपट्टी करावी, अशी मागणी तृप्ती देसाई यांनी मुख्यमंत्र्यांकडे मेलद्वारे केली आहे. तसेच मंत्री राधाकृष्ण विखे पाटील, भाजप प्रदेशाध्यक्ष, विधानपरिषदेचे सभापती राम शिंदे यांनाही सदर तक्रार मेलद्वारे केली आहे. मुख्यमंत्र्यांनी स्थानिक पदाधिकाऱ्यांकडून याची पूर्णपणे माहिती घ्यावी असेही त्यांनी तक्रारीत म्हटले आहे.या व्हिडिओवर आणि तृप्ती देसाई यांच्या या तक्रारीवर नितीन दिनकर यांनी स्पष्टीकरण दिलं आहे. “हा व्हिडिओ 14 महिन्यापूर्वी माझ्या एका घरगुती कार्यक्रमाचा आहे. त्यावेळेस मी भाजपचा जिल्हाध्यक्ष सुद्धा नव्हतो. या कार्यक्रमाला जिल्ह्यातील अनेक प्रतिष्ठित व्यक्ती सुद्धा उपस्थित होते. तर त्या संदर्भातली एक पोस्ट मी माझ्या समाजमाध्यमावर 14 महिन्यापूर्वीच केलेली आहे. हे केवळ माझ्या बदनामीच षडयंत्र आहे,” असं दिनकर यांनी म्हटलं आहे. तर श्रीरामपूरमधील माजी मंत्र्याच्या बंगल्यावर गैरकारभार चालतात यावर सुद्धा नितीन दिनकर यांनी स्पष्टीकरण दिलं आहे. त्या बंगल्याच्या चारही बाजूने सीसीटीव्ही कॅमेरे आहेत तरीसुद्धा अशा प्रकारचे आरोप करताना त्यांच्याकडे काही पुरावे असतील तर ते त्यांनी सादर करावेत असं आव्हान नितीन दिनकर यांनी तृप्ती देसाई यांना दिलं आहे.
