पाच दिवसांपूर्वी महानगरप्रमुख केलं, त्यांनीच ठाकरेंना ‘मामा’ बनवलं; राजवाडे भाजपच्या वाटेवर.

शिवसेना ठाकरे गटाचे उपनेते सुनील बागुल आणि महानगरप्रमुख मामा राजवाडे यांच्यासह पाच माजी नगरसेवक भाजपमध्ये प्रवेश करणार आहेत शिवसेना (उद्धव बाळासाहेब ठाकरे) पक्षाला नाशिकमध्ये पुन्हा एकदा धक्का बसला आहे. सुधाकर बडगुजर, विलास शिंदे यांच्यानंतर आणखी एका बड्या नेत्याने शिवबंधन सोडले आहे. विशेष म्हणजे चारच दिवसांपूर्वी ठाकरेंनी ज्यांच्यावर महानगर प्रमुख पदाची जबाबदारी सोपवली, त्या मामा राजवाडे यांनीच शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांना झटका दिला आहे. ते भाजपचा झेंडा खांद्यावर घेणार आहेत.

शिवसेना ठाकरे गटाचे उपनेते सुनील बागुल आणि महानगरप्रमुख मामा राजवाडे यांच्यासह पाच माजी नगरसेवक भाजपमध्ये प्रवेश करणार आहेत. स्थायी समितीचे माजी सभापती गणेश गीते यांच्यासह कमलेश बोडके, प्रशांत दिवे, सचिन मराठे, सीमा ताजने यांचा आज भाजपात प्रवेश होणार आहे.याआधी, तत्कालीन महानगरप्रमुख विलास शिंदे यांच्या शिवसेना प्रवेशाची कुणकुण लागताच गेल्या आठवड्यात शुक्रवारीच मामा राजवाडे यांची त्याजागी नियुक्ती करण्यात आली होती. त्यामुळे ठाकरे गटाला मोठा झटका बसला आहे.दरम्यान, सध्या चार नगरसेवक आमच्यासोबत आहेत, असा दावा ठाकरे गटाचे नाशिक जिल्हाप्रमुख डी जी सुर्यवंशी यांनी केला आहे.

“नाशिकमध्ये धनशक्ती विरुद्ध जनशक्ती असा लढा सुरु आहे. मामा राजवाडे यांच्यावर दबाव टाकून भाजप प्रवेश करायला लावला आहे. भाजप दबावाचं राजकारण करुन फोडाफोडी करत आहे” असा आरोपही सुर्यवंशींनी पत्रकार परिषद घेत केला.चारच दिवसांपूर्वी ठाकरे गटाचे महानगरप्रमुख विलास शिंदे यांनी आठ माजी नगरसेवक, माजी जिल्हा परिषद सदस्य, सरपंच व पदाधिकाऱ्यांसह शक्तिप्रदर्शन करीत शिवसेनेत प्रवेश केला होता. त्यावेळी एकनाथ शिंदेंसह शिक्षणमंत्री दादा भुसे, खासदार नरेश म्हस्के, माजी खासदार हेमंत गोडसे, माजी आमदार नरेंद्र दराडे, भाऊसाहेब चौधरी, विजय करंजकर, महानगरप्रमुख प्रवीण तिदमे, विक्रम नागरे उपस्थित होते.