शरीरावर दातांच्या खुणा, जबरदस्ती संबंध; कोलकाता पीडितेच्या मेडिकल रिपोर्टमध्ये धक्कादायक माहिती.

कोलकाता शहरातल्या लॉ कॉलेजमध्ये एका विद्यार्थिनीवर भयानक सामूहिक अत्याचार झाला आहे. पोलिसांनी या प्रकरणी तीन आरोपींना अटक केली आहे. पीडितेच्या वैद्यकीय तपासात अत्याचाराची पुष्टी झाली आहे.साऊथ कोलकाता लॉ कॉलेजमध्ये एका विद्यार्थिनीवर झालेल्या सामूहिक अत्याचारामुळे एकच खळबळ उडाली आहे. 24 वर्षीय विद्यार्थिनीने कॉलेजमधील माजी विद्यार्थी आणि दोन विद्यार्थ्यांवर अत्याचाराचा आरोप केला आहे. पोलिसांनी तीनही आरोपींना अटक केली असून, पीडितेची वैद्यकीय तपासणी करण्यात आली आहे. ज्याचा अत्यंत धक्कादायक अहवाल आता समोर आला आहे. या घटनेमुळे राजकीय वातावरणही तापले असून, दोषींना कठोर शिक्षा देण्याची मागणी जोर धरू लागली आहे.

पोलिसांनी दिलेल्या अधिक माहितीनुसार, वैद्यकीय तपासणीत जबरदस्तीने शारीरिक संबंध प्रस्थापित करणे, शरीरावर चाव्याचे आणि नखांचे व्रण आढळून आले आहेत. मुख्य आरोपी कॉलेजचा माजी विद्यार्थी असून तो वकिली करतो, त्याने अत्याचार केला आणि तर इतर दोघे बाहेर पहारा देत होते, असंही पोलिसांनी सांगितले.या घटनेनंतर पोलिसांनी घटनास्थळाची पाहणी केली. कोलकाता पोलीस आयुक्त मनोज वर्मा आणि संयुक्त सीपी (गुन्हे) रूपेश कुमार यांनी कसबा पोलीस स्टेशनला भेट देऊन तपासकार्याची पाहणी केली. त्यांनी साऊथ कलकत्ता लॉ कॉलेजला भेट देऊन प्रकरणाची सखोल चौकशी केली.राज्य सरकारनेही या प्रकरणावर प्रतिक्रिया दिली आहे.

पश्चिम बंगालच्या मंत्री शशी पंजा यांनी सांगितले की, पोलिसांना तक्रार मिळताच 12 तासांच्या आत तीनही आरोपींना अटक करण्यात आली. पीडितेचा जबाब नोंदवण्यात आला आहे आणि तिच्यावर उपचार सुरू आहेत. राज्य सरकार आणि पोलीस हे प्रकरण खूप गांभीर्याने घेत आहेत आणि अशा प्रकरणांमध्ये कोणतेही राजकारण होऊ नये, असंही त्या म्हणाल्या. तसेच, आरोपींचा कोणतंही नाव, धर्म, जात किंवा संघटना असली तरीही कायदा सर्वांसाठी समान आहे. ज्या आरोपींना टीएमसी छात्र परिषदेशी जोडले जात आहे ते सध्या कोणत्याही अधिकृत संघटनेशी संबंधित नाहीत, असंही त्यांनी स्पष्ट केलं.