बाबांचे नवाबांशी कौटुंबिक नातं, भुमरेंचा काय संबंध? 150 कोटींच्या जमीन गिफ्ट प्रकरणात ड्रायव्हरची प्रतिक्रिया.

खासदार संदिपान भुमरे, आमदार विलास भुमरे यांचा या प्रकरणाशी कुठलाही संबंध नाही. फक्त मी भुमरे यांच्याकडे कामाला असल्यामुळे जमीन घेतल्याचा बाऊ केला गेला, अशी वाहनचालक जावेद रसूल शेख याने प्रतिक्रिया दिली.निजामाचे तत्कालीन पंतप्रधान सालारजंग यांच्या मूळ मालकीची, छत्रपती संभाजीनगर शहरातील बागशेरजंग-दाऊदपूर येथील कोट्यवधी रुपयांची जमीन खासदार संदीपान भुमरे आणि आमदार विलास भुमरे यांचे वाहनचालक जावेद रसूल शेख यास बक्षीसपत्र म्हणून देण्यात आल्याचा आरोप ॲड. मुजाहिद खान यांनी केला आहे.ही जमीन आपली असल्याचा दावा केल्याने संदीपान भुमरे यांच्या नावाने धमकाविण्यात आल्याचा आरोपही त्यांनी केला आहे. तशी तक्रार त्यांनी पोलिसांकडे केली आहे. दरम्यान, या तक्रारी अर्जाच्या अनुषंगाने आर्थिक गुन्हे शाखा तपास करीत आहे. या प्रकरणात वाहनचालक जावेद यांचा जबाब नोंदविण्यात आला असून, त्यांना काही कागदपत्रे सादर करावीत, अशा सूचना दिल्या असल्याचे पोलिस निरीक्षक संभाजी पवार यांनी ‘मटा’शी बोलताना सांगितले. तसेच अद्याप या प्रकरणात गुन्हा घडला आहे काय, याबाबत कोणतेही निष्कर्ष काढलेले नसल्याचेही त्यांनी नमूद केले.शहरातील बागशेरजंग, दाऊदपुरा येथील नऊ एकरचा ‘फेर’ चेनमल पन्नालाला कोठारी व त्यांच्या परिवाराच्या नावे आहे.

तर जमिनीवर सालारजंगचे वारस म्हणून मीर महेमूद अलीखान व अन्य काही जणांचा दावा आहे. या प्रकरणाचा खटला लढण्यासाठी मीर महेमूद यांनी परभणी येथील ॲड. मुजाहिद खान यांना वकीलपत्र दिले आहे. ‘खटला लढण्यासाठी पैसे नाहीत. जमिनीच्या ‘पीआर कार्ड’वर नाव लागल्यानंतर त्यातील तीन एकर जमीन देऊ, असे सांगत मीर महेमूद यांनी २७ जानेवारी, २०१५ रोजी नऊपैकी तीन एकर जमीन प्रति एकर ९० लाख ४५ हजार रुपये या प्रमाणे ‘ॲग्रीमेट टू सेल’ नोटरी करून दिले, तसेच काही रक्कमदेखील घेतली,’ असे ॲड. मुजाहिद खान यांनी तक्रारीत नमूद केले आहे. तसेच खटला लढण्यासाठी महेमूद यांनी वेळोवेळी रक्कम घेऊन त्या बदल्यात ‘ॲग्रीमेंट टू सेल’ रजिस्टर्ड जीपीए व ‘हिबानामा’ करून दिला आहे. पैसा व वेळ खर्च करून खटला लढलो आणि अखेर ३० जानेवारी, २०२३ रोजी या जमिनीच्या ‘पीआर कार्ड’वर मीर महेमूद अली खान यांचे नाव लागले. त्यानंतर ॲड. मुजाहिद हे बक्षीसपत्राची जमीन पाहण्यासाठी गेले असता, वाहनचालक जावेद रसुल शेख यांच्या नावे या जमिनीचा हिबानामा करण्यात आल्याचे त्यांना समजले.

भुमरे यांनी ही जमीन विकत घेतली आहे. इकडे फिरकूही नको, या जमिनीच्या भानगडीत पडू नको, अन्यथा तुझीही कबर खणू, असे धमकावल्याची तक्रार अॅड. खान यांनी पोलिसांमध्ये केली. जावेद यांच्याकडील करारनामा हा ९ फेब्रुवारी, २०२३ रोजी केल्याचे दिसून आल्याचेही त्यांनी तक्रारीत नमूद केले आहे.दरम्यान, या तक्रारीच्या अनुषंगाने माध्यमांशी बोलताना पैठणचे आमदार विलास संदीपान भुमरे म्हणाले, की आमचा वाहनचालक असेल, तर गाडी चालविणे हेच त्याचे काम. त्याच्या व्यक्तिगत आयुष्याशी आमचा संबंध नाही. त्याने काय करावे, हे माझ्या हातात नाही.माझ्या वडिलांचे नवाबंचे कौटुंबिक संबंध आहेत. आम्ही हैदराबादला जात होतो, ते संभाजीनगरला आले तर आमच्याकडे थांबत होते. यामुळे आमचे कौटुंबिक संबंध आहे. छत्रपती संभाजीनगरमध्ये त्यांचं कुणी नाही, येथे त्यांची काम मी करुन दिली. माझं वय आता 38 आहे, मी लहानपणापासून त्यांच्या सहवासात लहानसा मोठा झाला.यामुळे त्यांनी मला जमीन गिफ्ट केली आहे. खासदार संदिपान भुमरे आमदार विलास भुमरे यांचा या प्रकरणाशी कुठलाही संबंध नाही. फक्त मी भुमरे यांच्याकडे कामाला असल्यामुळे जमीन घेतल्याचा बाऊ केला गेला.