भाजपचे महाराष्ट्रातील नवे उत्तराधिकारी कोण? प्रदेशाध्यक्षपदासाठी सर्वात आघाडीवर कोणाचं नाव?

भारतीय जनता पार्टी नवीन राष्ट्रीय अध्यक्ष निवडणार आहे. त्यासाठी महाराष्ट्र, पश्चिम बंगाल आणि उत्तराखंडमध्ये निवडणूक अधिकाऱ्यांची नियुक्ती झाली आहे. महाराष्ट्रात किरण रिजिजू यांची पर्यवेक्षक म्हणून नियुक्ती झाली आहे. प्रदेशाध्यक्षपदासाठी कोणाची वर्णी लागते हे पाहावं लागणार आहे. एक नाव सर्वाधिक चर्चेत आहे कोण ते जाणून घ्या.सक्रिय सदस्यसंख्या 14 कोटींपर्यंत पोहोचलेल्या केंद्रातील सत्तारूढ भाजपने शुक्रवारी महाराष्ट्र, पश्चिम बंगाल आणि उत्तराखंड या तीन राज्यांमधील निवडणूक अधिकाऱ्यांची नियुक्ती केली. तथापि गुजरात व त्यापेक्षाही उत्तर प्रदेशातील संघटनात्माक परिस्थिती अद्यापही अनिर्णित आहे. भाजपने पुढील महिनाभरात आपले नवीन राष्ट्रीय अध्यक्ष निवडण्याची तयारी केली आहे.महाराष्ट्रासाठी भाजपने केंद्रीय मंत्री किरन रिजिजू यांची नियुक्ती पर्यवेक्षक म्हणून केली आहे. राज्यात चंद्रशेखर बावनकुळे यांना देवेंद्र फडणवीस मंत्रिमंडळात समाविष्ट केल्यानंतर भाजपच्या केंद्रीय नेतृत्वाने प्रदेश कार्यकारी अध्यक्षपदी रवींद्र चव्हाण यांची नियुक्ती यंदाच्या जानेवारीत करण्यात आली. आता प्रदेशाध्यक्षपदाच्या शर्यतीत चव्हाण हे आघाडीवर आहेत.

चव्हाण हे डोंबिवली मतदारसंघाचे चार वेळा आमदार असून, एकनाथ शिंदे यांच्या सरकारमध्ये सार्वजनिक बांधकाम मंत्री म्हणून कार्यरत होते. बावनकुळे यांच्या तीन वर्षांच्या प्रदेशाध्यक्ष कार्यकाळाचा समारोप ऑगस्ट 2025 मध्ये होणार होता. त्यांच्या जागी चव्हाण यांची नियुक्ती होण्याची शक्यता आहे.भाजप राष्ट्रीय अध्यक्षांचा कार्यकाळ तीन वर्षांचा असतो. जे.पी. नड्डा यांनी जानेवारी 2020 मध्ये पदभार स्वीकारला होता, परंतु 2024 च्या लोकसभा निवडणुकीनंतर त्यांचा कार्यकाळ वारंवार वाढविण्यात आला आहे. भाजपच्या घटनेनुसार देशात एकूण 37 संघटनात्मक राज्ये असून राष्ट्रीय अध्यक्ष निवडीची अधिकृत प्रक्रिया सुरू होण्यापूर्वी किमान 19 राज्यांमध्ये निवडणूक प्रक्रिया पूर्ण करावी लागेल. आतापर्यंत 14 राज्यांमध्ये ही प्रक्रिया पूर्ण झाली आहे. उत्तर प्रदेश, मध्य प्रदेश, कर्नाटक आणि गुजरातसह अनेक महत्त्वाच्या राज्यांमध्ये भाजप प्रदेशाध्यक्षांची निवड झालेली नाही. यंदा जानेवारीमध्ये या राज्यांसाठी ‘राज्य निवडणूक अधिकाऱ्यांची’ नियुक्ती करण्यात आली होती.

भाजपचे पुढील राष्ट्रीय अध्यक्ष निवडण्याची प्रक्रिया गेल्या वर्षी सप्टेंबरमध्ये देशव्यापी सदस्यता मोहिमेने सुरू झाली होती आणि या वर्षाच्या सुरुवातीला ती पूर्ण होण्याची अपेक्षा होती. मात्र ही प्रक्रिया लांबत गेली त्यामागे भाजप नेतृत्व व राष्ट्रीय स्वयंसेवक संघ यांच्यात प्रस्तावित नावांबाबतची एकवाक्यता नसणे हे एक कारण सांगितले जाते.उत्तर प्रदेशचे मुख्यमंत्री योगी आदित्यनाथ यांच्यावर सारे लक्ष आहे, येथे प्रदेशाध्यक्ष भूपेंद्र चौधरी यांच्या उत्तराधिकाऱ्यांच्या निवडीसाठी पक्षनेत्यांनी अनेक बैठका घेतल्या आहेत. मात्र हा पेच सुटलेला नाही.माजी केंद्रीय मंत्री रविशंकर प्रसाद यांची पश्चिम बंगालसाठी निवडणूक अधिकारी म्हणून नियुक्ती करण्यात आली आहे, येथे पुढील वर्षी विधानसभा निवडणुका होणार आहेत. राज्य विधानसभेतील विरोधी पक्षनेते शुभेंदू अधिकारी हे प्रदेशाध्यक्ष सुकांत मजुमदार यांची जागा घेण्याची अपेक्षा करत असताना पक्षनेतृत्व दुसऱ्या कोणाची नियुक्ती करू शकते असे सांगण्यात येते.