ऑपरेशन सिंदूरनंतर पाकनं गियर बदलला; अमेरिका टप्प्यात, भारताला वाढता धोका, रिपोर्टनं खळबळ.

अमेरिकेच्या गुप्तचर यंत्रणांनी पाकिस्तानच्या क्षेपणास्त्र कार्यक्रमाबद्दल चिंता व्यक्त केली आहे. पाकिस्तान अमेरिकेपर्यंत मारा करू शकणारे अण्वस्त्र सज्ज क्षेपणास्त्र विकसित करत आहे. चीनकडून यासाठी पाकिस्तानला मदत मिळत असल्याचा दावा आहे.वॉशिंग्टन डीसी: अमेरिकेच्या गोपनीय यंत्रणांच्या एका अहवालातून चिंताजनक माहिती समोर आली आहे. पाकिस्तान गोपनीय पद्धतीनं एक अण्वस्त्रयुक्त आंतरखंडीय बॅलेस्टिक क्षेपणास्त्र (आयसीबीएम) विकसित करत असल्याची माहिती उघड झाली आहे. विशेष म्हणजे पाकिस्तान तयार करत असलेलं क्षेपणास्त्र थेट अमेरिकेपर्यंत हल्ला करु शकतं. अमेरिकेतील प्रतिष्ठित जर्नल ‘फॉरेन अफेअर्स’मध्ये याबद्दलचा अहवाल प्रसिद्ध झालेला आहे.भारताच्या ऑपरेशन सिंदूरनंतर पाकिस्तान त्यांच्या अण्वस्त्र शक्ती सातत्यानं वाढत आहे. यासाठी त्यांना चीनकडून मदत मिळत आहे. पाकिस्ताननं अण्वस्त्रयुक्त आंतरखंडीय बॅलेस्टिक क्षेपणास्त्र तयार केल्यास अमेरिका त्यांना अण्वस्त्र शत्रू घोषित करेल, अशी माहिती अहवालात अमेरिकन अधिकाऱ्यांच्या हवाल्यानं देण्यात आलेली आहे.

अण्वस्त्र असलेला कोणताही देश अमेरिकेसाठी धोका असल्यास त्या देशाला अण्वस्त्र विरोधी घोषित केलं जातं. सध्याच्या घडीला या यादीत चीन, अमेरिका , उत्तर कोरिया यांचा समावेश आहे.पाकिस्तान अण्वस्त्रयुक्त आंतरखंडीय बॅलेस्टिक क्षेपणास्त्र तयार करण्यात यशस्वी झाल्यास अमेरिका त्यांच्या टप्प्यात येईल. मग अशा परिस्थितीत अमेरिकेकडे पाकिस्तानला अण्वस्त्र शत्रू घोषित करण्याशिवाय कोणताही पर्याय नसेल. एखादा देश अमेरिकेपर्यंत मारा करणारं अण्वस्त्रयुक्त आंतरखंडीय बॅलेस्टिक क्षेपणास्त्र आपल्या ताफ्यात ठेवत असल्यास तो देश अमेरिकेचा मित्र असू शकत नाही, असा उल्लेख अमेरिकेच्या अधिकाऱ्याच्या हवाल्यानं अहवालात करण्यात आलेला आहे.आमचा अण्वस्त्र कार्यक्रम केवळ भारताला रोखण्यासाठी असल्याचं पाकिस्तान सातत्यानं सांगत आहे.

पाकिस्तान आतापर्यंत केवळ लघु आणि मध्यम टप्प्याच्या क्षेपणास्त्रापर्यंत लक्ष केंद्रित करत आलेला आहे. पाकिस्तानकडे सध्याच्या घडीला कोणतंही अण्वस्त्रयुक्त आंतरखंडीय बॅलेस्टिक क्षेपणास्त्र नाही. २०२२ मध्ये पाकिस्ताननं शाहीन-३ नावाच्या एका क्षेपणास्त्राची चाचणी केली. त्याची मारक क्षमता २७०० किलोमीटर आहे. भारताची अनेक शहरं या क्षेपणास्त्राच्या टप्प्यात येतात.अण्वस्त्रयुक्त आंतरखंडीय बॅलेस्टिक क्षेपणास्त्र (आयसीबीएम) अणू आणि पारंपारिक अशा दोन्ही प्रकारची असू शकतात. त्यांची मारक क्षमता प्रचंड असते. ती ५५०० किलोमीटरपेक्षा दूरवरील लक्ष्यावर प्रहार करु शकतात. सध्याच्या घडीला आपल्याकडे एकही अण्वस्त्रयुक्त आंतरखंडीय बॅलेस्टिक क्षेपणास्त्र नसल्याचा पाकिस्तानचा दावा आहे.