नवीन संसाराल पालवी फुटण्याआधीच सर्व संपलं, पतीच्या डोळ्यासमोर पत्नीच्या डोक्यावरून गेलं चाक, सांगलीमध्ये हळहळ.

सांगलीमध्ये एका हृदयद्रावक घटनेत, पतीसोबत दुचाकीवरून कामावर निघालेल्या पत्नीला डंपरने धडक दिल्याने तिचा जागीच मृत्यू झाला. विश्रामबाग उड्डाणपुलावर घडलेल्या या दुर्घटनेत पती गंभीर जखमी झाले आहेत.पतीसोबत दुचाकीवरून कामावर जाण्यासाठी निघालेल्या पत्नीवर आज काळाने घाला घातला. भरधाव डंपरने त्या दामपत्याच्या दुचाकीला धडक दिल्याने पत्नीचा जागीच मृत्यू झाला. ही ह्रदयद्रावक घटना पतीच्या डोळ्यासमोर झाली. आज सकाळी साडेदहाच्या सुमारास विश्रामबाग उड्डाणपुलावर ही घटना घडली आहे.पूनम सुशांत जाधव (२५, रा. कवलापूर, ता. मिरज) असे त्या मृत विवाहितेचे नाव आहे. या अपघातात पती सुशांत जाधव हे जखमी झाले असून खासगी रुग्णालयात उपचार सुरू आहेत. या अपघातानंतर संतप्त नागरीकांनी डंपर चालकास पकडून चोप दिला.

संजयनगर पोलिसांनी घटनास्थळी धाव घेत चालक श्रीकांत नंदकुमार लमाण (रा. मूळ जत सध्या सांगली) याला ताब्यात घेतले. सायंकाळी उशीरा घटनेची नोंद करण्यात आली आहे.पोलिसांनी व घटनास्थळावरून मिळालेली माहिती अशी, की दीड वर्षापुर्वी पूनम आणि सुशांत यांचा विवाह झाला होता. पूनम या विश्रामबाग येथील कल्लोळी रुग्णालयात काम करत होत्या. तर सुशांत हे एका कंन्‍ट्रक्शन कंपनीत कामाला आहे. दोघेही दुचाकी (क्र. एमएच १० डीएन ५१००) वरून कामासाठी यायचे. आज देखील दहाच्या सुमारास ते घरातून निघाले. त्यावेळी साडेदहाच्या सुमारास कुपवाडकडून विश्रामबागकडे येत होते. त्यावेळी पुल चढतानाच मागून भरधाववेगाने काँक्रीट मिक्सर डंपर ( क्र. एमएच १७ बिडी ९१२२ ) येत होता.

त्याने पाठीमागून जोराची धडक जाधव दांमप्त्यांना दिली. त्यावेळी पूनम या चाकाखाली सापडल्या. त्यांच्या अंगावरून चाक गेल्याने जागीच त्यांचा मृत्यू झाला.सुशांत हे जखमी अवस्थेत पडले. दरम्यान, हा थरारक प्रकार पाहून नागरिकांनी धाव घेतली. काही अंतरावर डंपरचालकाला अडवून संतप्त नागरिकांनी चांगलाच चोप दिला. यावेळी संजयनगर पोलिसांनी घटनास्थळी धाव घेतली. दोघांना रुग्णवाहिकेतून खासगी रुग्णालयात पाठवण्यात आले. उपचारापुर्वीच पूनम यांचा मृत्यू झाल्याचे डॉक्टरांनी घोषित केले. घटनास्थळावरून डंपर चालकास पोलिसांनी ताब्यात घेतले. त्याच्याविरोधात सायंकाळी उशीरा संजयनगर पोलिस ठाण्यात गुन्हा नोंद करण्यात आला.