2 तास आहेत, वाचव तुझ्या बायको-पोरांना! युद्ध सुरु असताना इराणी अधिकाऱ्यांना फोन अन् मग…

इस्रायलने इराणविरुद्ध ‘ऑपरेशन रायजिंग लाईन’ सुरू केले. मोसादने इराणी अधिकाऱ्यांना फोनवरून धमक्या दिल्या. वरिष्ठ अधिकाऱ्यांनी अयातुल्ला अली खामेनेई यांना पाठिंबा देणे थांबवावे, अन्यथा गंभीर परिणाम भोगावे लागतील, असा इशारा देण्यात आला.तेल अवीव: इराणविरोधात इस्रायलनं १३ जूनला ऑपरेशन रायजिंग लाईन सुरु केलं. याचसोबत इस्रायलनं शत्रू देशाविरोधात एक गुप्त मोहिमदेखील हाती घेतली. या मोहिमेच्या अंतर्गत इस्रायलची गुप्तचर यंत्रणा असलेल्या मोसादनं इराणच्या काही वरिष्ठ अधिकाऱ्यांना फोन करुन धमकावलं. यरुशलम पोस्टनं याबद्दलचं एक वृत्त वॉशिंग्टन पोस्टच्या हवाल्यानं प्रसिद्ध केलं आहे. या ऑपरेशनशी संबंधित तीन व्यक्ती आणि एक रेकॉर्डिंग यांच्या आधारे वृत्त देण्यात आलेलं आहे.

इराणी शासन अस्थिर करण्यासाठी इस्रायलची गुप्तचर यंत्रणा इराणच्या लष्करी अधिकाऱ्यांना धमक्यांचे फोन करत होती, अशी माहिती वॉशिंग्टन पोस्टनं दिलेली आहे. इस्रायलच्या सुरक्षेसाठी काम करणारे पर्शियन भाषातज्ज्ञ इराणी अधिकाऱ्यांना फोन करत होते. अयातुल्ला अली खामेनेई यांना समर्थन देणं बंद करा, अन्यथा तुम्हालादेखील लक्ष्य करण्यात येईल, असा इशारा अधिकाऱ्यांना फोनवर दिला जात होता. या पद्धतीनं २० अधिकाऱ्यांना लक्ष्य करण्यात आलं.एका रेकॉर्डिंगमध्ये इस्रायलचा एक गुप्तचर अधिकारी एका वरिष्ठ इराणी जनरलसोबत बोलत असल्याचं रेकॉर्डिंग समोर आलेलं आहे. ‘मी आता तु्म्हाला एक सल्ला देतो. पत्नी, मुलांना सोबत घेऊन पळण्यासाठी तुमच्याकडे १२ तास आहेत. तुमचं नाव आमच्या टार्गेट लिस्टमध्ये आहे. तुमच्या मानेची नस जितकी जवळ आहे, त्याहून जास्त आम्ही तुमच्या जवळ आहोत. ही गोष्ट ध्यानात ठेवा. देव तुमची रक्षा करो,’ अशा शब्दांत इस्रायलच्या गुप्तचर अधिकाऱ्यानं इराणच्या अधिकाऱ्याला धमकावलं. इस्रायलच्या अधिकाऱ्यानं धमकी दिलेली इराणी अधिकारी युद्धात वाचला. पण इस्रायलच्या अधिकाऱ्यांनी केलेल्या दाव्यानुसार, लक्ष्य करण्यात आलेले अन्य अधिकारी त्यांचा जीव वाचवू शकले नाहीत. इराणच्या अण्वस्त्र तळांवर, शस्त्र कारखान्यांवर, क्षेपणास्त्र डागणाऱ्या तळांवर हल्ले सुरु असताना दुसरीकडे इस्रायल गुप्त कारवाया करत होता. या माध्यमातून युद्ध काळात शत्रू पक्षाच्या अधिकाऱ्यांवर मानसिक दबाव टाकला जात होता. त्यांचं मनोधैर्य खच्ची करण्याचे प्रयत्न केले गेले.इराणवर हल्ले सुरु करताच इस्रायलनं पहिल्या काही तासांमध्येच इराणी रिव्होल्युशरी गार्डचे कमांडर मेजर जनरल हुसेन सलामी आणि इराणी सशस्त्र दलांचे चीफ ऑफ स्टाफ मेजर जनरल मोहम्मद बाघेरी यांच्यासह अनेक बड्या अधिकाऱ्यांना संपवलं. यानंतर इस्रायलच्या गुप्तचर अधिकाऱ्यांनी अन्य वरिष्ठ अधिकाऱ्यांना फोन लावले. बड्या अधिकाऱ्यांच्या हत्यांचा संदर्भ देत टॉपच्या अधिकाऱ्यांना संपवलं आहे. पुढचा नंबर तुमचा आहे, अशा शब्दांत अनेकांना धमकावलं.