लेक बेपत्ता, बापाला 3 शंका; CCTV तपासून दृश्यम स्टाईल खुनाचा उलगडा, 12 फूट खड्ड्यात बॉडी.

हुंड्यासाठी सतत होणाऱ्या छळाला कंटाळलेल्या सुनेची हत्या करून मृतदेह घरासमोर पुरणाऱ्या सासऱ्याला फरीदाबाद पोलिसांनी अटक केली. मृत विवाहितेच्या वडिलांनी केलेल्या सतर्क तपासामुळे हा गुन्हा उघडकीस आला.फरिदाबाद: सुनेची हत्या करुन तिचा मृतदेह घरासमोर असलेल्या गल्लीत खड्डा खणून गाडणाऱ्या सासऱ्याला पोलिसांनी अटक केली आहे. मृत विवाहितेच्या वडिलांनी केलेल्या तपासामुळे मारेकरी सासरा गजाआड गेला आहे. पोलिसांची तपासातील ढिलाई पाहता विवाहितेच्या वडिलांनीच शोधाशोध सुरु केली. त्यावेळी त्यांच्या मनात ३ शंका आल्या. त्यावरुन तपास करत त्यांनी मर्डर मिस्ट्री सोडवली.उत्तर प्रदेशच्या फिरोजाबादमध्ये राहणाऱ्या तनूचा विवाह २०२३ मध्ये फरीदाबादमध्ये वास्तव्यास असलेल्या अरुण सोबत झाला. तनूच्या वडिलांनी लग्नात अरुण हुंडा दिला होता. त्याची बरीच चर्चा पंचक्रोशीत होती. लग्नानंतर काही दिवस चांगले गेले. पण त्यानंतर तनूचा सासरी छळ सुरु झाला. सासरच्यांना आणखी हुंडा हवा होता. या छळाला कंटाळून तनू माहेरी गेली. तिथे ती जवळपास वर्षभर होती. त्यानंतर प्रकरण पंचायतीकडे गेलं. त्यांनी दोन्ही कुटुंबाची समजूत काढली. यानंतर तनू पुन्हा सासरी गेली. पण काही दिवसांतच ती छळाला कंटाळून पुन्हा माहेरी गेली. प्रकरण पुन्हा जात पंचायतीकडे गेलं.

                                               0

तिथे मार्ग निघाला आणि तनू सासरी नांदायला गेली.यानंतर तनूच्या सासरच्या मंडळींचं वर्तन एकाएकी बदललं. एप्रिल २०२५ पासून तनूच्या सासरच्या मंडळी तिच्याशी चांगली वागू लागली. सासू, सासरे, पती, नणंद सगळेच छान वागू लागल्यानं तनू आणि तिच्या माहेरच्या व्यक्तींचा जीव भांड्यात पडला. पण यानंतर तनू २१ जूनच्या रात्री एकाएकी बेपत्ता झाली. तनू घर सोडून गेल्याची माहिती तिचे सासरे भूप सिंह यांनी तनूच्या कुटुंबियांनी दिली. दोन्ही कुटुंबियांनी तनूचा शोध सुरु केला. तनूच्या सासऱ्यांनी अनेक ठिकाणी तनूचा फोटो असलेले पोस्टर लावले. पोलिसांत तक्रार दाखल केली.तनूचा शोध घेत असताना तिच्या वडिलांना सासरच्या व्यक्तींवर काहीसा संशय आला. कित्येक महिने हुंड्यासाठी तनूचा छळ करणारी सासरची मंडळी अचानक तनूशी चांगली कशी वागू लागली, याचा शोध त्यांना सुरु केला. शेजाऱ्यांकडे चौकशी केली. तनूच्या घरी काही संशयास्पद दिसलं का, याची माहिती ते घेत होते. पण त्यांना वर्तणुकीबद्दल काहीच संशयास्पद आढळलं नाही.तनूचा शोध घेत असताना तिच्या वडिलांना तिच्या शेजाऱ्यांकडून मिळालेल्या माहितीनं मात्र संशय वाढला. तनूच्या सासऱ्यांनी काही दिवसांपूर्वीच घराच्या समोर खड्डा खणला होता. मलनिस्सारण वाहिनी टाकण्यासाठी १२ फूट खोल आणि ४ फूट लांबीचा खड्डा खणल्याचं त्यांनी शेजाऱ्यांना सांगितलं होतं. पण तनूच्या सासरी आधीच मलनिस्सारण वाहिनी होती. त्यामुळे तनूच्या वडिलांचा संशय वाढला. तनू बेपत्ता झाल्याची आणि तिचे सासरे भूप सिंह यांनी खड्डा खणल्याची तारीख सारखीच असल्याचं त्यांच्या लक्षात आलं.यानंतर तनू यांनी आसपासच्या भागातील सीसीटीव्ही फुटेज तपासले. ते अनेक दिवस १०-१० तास बसून सीसीटीव्ही तपासत होते. सासऱ्यांनी तनू गायब होण्याची तारीख २१ जून सांगितली. त्या दिवसाचे परिसरातील सगळे सीसीटीव्ही फुटेज तनूच्या वडिलांनी काळजीपूर्वक तपासले. पण कोणत्याच फुटेजमध्ये तनू दिसत नव्हती. त्यामुळे तनू आसपासच असल्याची खात्री त्यांना पटली.सासरच्या मंडळींचं अचानक बदललेलं वर्तन, घरासमोर विनाकारण खणण्यात आलेला खड्डा आणि सीसीटीव्हीत कुठेच दिसत नसलेली तनू हा घटनाक्रम वडिलांना संशयास्पद वाटला. तेव्हा त्यांनी पोलिसांत धाव घेत घरासमोर खोदकाम करण्याची विनंती केली. यानंतर खड्डा खणण्यात आला. तेव्हा त्यात तनूचा मृतदेह सापडला. पोलीस चौकशीत भूप सिंह यांनी गुन्ह्याची कबुली दिली.तनू सातत्यानं घर सोडून जात असल्यानं आमची बदनामी सुरु होती. तनू अतिशय भांडखोर होती. तिच्यामुळे घरातील शांतता भंग पावली. त्यामुळेच तिचा खून केल्याचं भूप सिंह यांनी पोलिसांना सांगितलं. तनूचा खून कट रचून केला. त्याआधी पत्नीला लग्नासाठी नातेवाईकांकडे पाठवलं. मुलगा ऑफिसला गेल्यावर आणि मुलगी झोपल्यावर तनूचा खून केल्याची माहिती भूप सिंह यांनी दिली.