मुंबईचा समुद्र खवळणार! पुढील पाच दिवस मोठ्या भरतीचे, समुद्रकिनाऱ्यापासून दूर राहण्याच्या सूचना.

समुद्राच्या भरतीवेळी मोठा पाऊस झाल्यास अनेक ठिकाणे जलमय होण्याची शक्यता असल्याने काळजी घेण्याचे आवाहन करण्यात आले.समुद्राला २४ जून ते २८ जूनपर्यंत सलग पाच दिवस मोठी भरती येणार आहे. तर यंदाच्या पावसाळ्यात जून ते सप्टेंबर या चार महिन्यांच्या कालावधीत १९ वेळा समुद्राला मोठी भरती असेल, अशी माहिती मुंबई महापालिकेकडून देण्यात आली. यामध्ये साडेचार मीटरपेक्षा अधिक उंचीच्या लाटा उसळणार आहे. समुद्राच्या भरतीवेळी मोठा पाऊस झाल्यास अनेक ठिकाणे जलमय होण्याची शक्यता असल्याने काळजी घेण्याचे आवाहन करण्यात आले.मुंबईत गेल्याकाही दिवसांपासून पावसाचा जोर वाढला आहे. रायगड, रत्नागिरी, सिंधुदुर्ग, पुणे, सातारा घाटात ऑरेंज अलर्ट हवामान खात्याकडून देण्यात आला आहे. नागरिकांनी समुद्रकिनाऱ्याजवळ न जाण्याचे मुंबई पालिकेचे आवाहन.

लहान होड्यांना समुद्रात न जाण्याचे आवाहन प्रशासनाकडून करण्यात आले आहे.गेल्या दोन आठवड्यांपासून सुरू असलेल्या पावसामुळे नवी मुंबई महानगरपालिकेच्या मालकीच्या मोरबे धरणाच्या पाणी पातळीत वाढ झाली आहे. मुसळधार पाऊसामुळे धरणाची पातळी ही ७५.९८ मीटर झाली आहे. हे धरण सध्या ४६.७८ टक्के भरलेले आहे. त्यामुळे नवी मुंबईला १९ ऑक्टबरपर्यंत पुरेल इतका पाणीसाठा झाला आहे.पालघर जिल्ह्यात गेले तीन दिवस सतत कोसळणाऱ्या पावसामुळे जिल्ह्यातील आदिवासी दुर्गम भागांतील तलासरी व विक्रमगड तालुक्यांतील नद्यांना पूर आल्याने पुलारून पाणी वाहू लागले आहे. त्यामुळे येथील वाहतूक बंद करण्यात आली आहे.

जिल्ह्यात गेल्या २४ तासांत ६३.७ मिमी पाऊस झाला असून, आत्तापर्यंत जिल्ह्यात ४०७.४ मिमी पावसाची नोंद झाली आहे.पालघर-मनोर या राष्ट्रीय महामार्गावर सलग दोन दिवस वादळीवारे आणि पावसामुळे दोन ठिकाणी झाडे पडल्याने हा महामार्ग दोन दिवस बंद पडला. त्यामुळे या महामार्गावरून मुंबई व गुजरातकडे जाणारी वाहतूक पूर्ण ठप्प झाली आहे. राष्ट्रीय महामार्ग प्राधिकरणातर्फे झाड कापून बाजूला सारण्याच काम करण्यात येत आहे. झाड कापून वाहतूक पूर्ववत करण्यासाठी रविवारी व सोमवारीदेखील जवळपास साडेतीन तासांहून अधिक कालावधी लागल्याने वाहनांच्या रांगा लागल्या होत्या