लासलगावी शेतकऱ्यांचा ठिय्या; 4 वर्षांपासून विम्याचा लाभ नाही, SBIने फसवणूक केल्याचा आरोप.

बँकेने आरोग्य विम्याच्या नावाखाली शेतकऱ्यांची फसवणूक केल्याचा आरोप आंदोलकांनी केला.भारतीय स्टेट बँक लासलगाव शाखा आणि ‘एसबीआय’ जनरल इन्शुरन्स कंपनीच्या निष्काळजी आणि मनमानी कारभाराविरोधात सामाजिक कार्यकर्ते मनोहर बोचरे यांच्या नेतृत्वाखाली शेतकऱ्यांनी सोमवारपासून (दि. २३) ठिय्या आंदोलन सुरू केले. बँकेने आरोग्य विम्याच्या नावाखाली शेतकऱ्यांची फसवणूक केल्याचा आरोप आंदोलकांनी केला.सन २०२२ मध्ये एसबीआय-जी आरोग्य प्लस योजने अंतर्गत शेतकऱ्यांच्या बँक खात्यांमधून ऑनलाइन रक्कम कपात करण्यात आली. बँकेच्या कर्मचाऱ्यांनी आरोग्य विम्याचे फायदे सांगून खातेदारांची सहमती घेतली. परंतु, प्रत्यक्षात त्यांचा विमा उतरवलाच गेला नाही. धक्कादायक बाब म्हणजे, चार वर्षे उलटूनही या शेतकऱ्यांना त्यांच्या विमा पॉलिसी मिळालेल्या नाहीत.

वारंवार संपर्क साधूनही बँकेकडून दाद दिली नसल्याचे बोचरे यांनी सांगितले. पीडित खातेदारांनी या गंभीर समस्येबाबत बँक आणि इन्शुरन्स कंपनीशी वारंवार संपर्क साधला. परंतु, त्यांना समाधानकारक उत्तर मिळाले नाही. यामुळे तातडीच्या आरोग्यविषयक गरजांच्या वेळी विम्याअभावी त्यांना आर्थिक भुर्दंड सहन करावा लागत आहे. अनेक शेतकऱ्यांना उपचारासाठी स्वतःच्या खिशातून पैसे खर्च करावे लागल्याने त्यांच्या आर्थिक अडचणीत भर पडली आहे.खासदार भास्कर भगरे यांनी आंदोलकांशी संपर्क साधून वरिष्ठ अधिकाऱ्यांशी चर्चा करण्याचे आश्वासन दिले. तसेच, सहाय्यक पोलिस निरीक्षक भास्कर शिंदे, पं. स. चे माजी सभापती शिवा सुरासे,

भाऊसाहेब बोचरे, राजाराम मेमाणे, धनंजय जोशी, डॉ. विकास चांदर, केशव जाधव, संतोष पानगव्हाणे आदींनी आंदोलनस्थळी भेट देऊन आंदोलकांना पाठिंबा दिला.देशातील राष्ट्रीयीकृत आणि नावाजलेल्या बँकेच्या शाखेतच जर ग्राहकांची अशा प्रकारे फसवणूक होत असेल, तर सामान्य नागरिकांनी विश्वास ठेवायचा तरी कुणावर? असा संतप्त सवाल आंदोलकांनी उपस्थित केला आहे. हे केवळ दुर्लक्ष नसून, यामागे मोठा आर्थिक गैर व्यवहार असण्याची भीतीही आंदोलकांनी व्यक्त केली.मी माझ्या वतीने वरिष्ठ कार्यालयास सर्व माहिती दिली असून, अद्याप त्यांच्याकडून मला कोणताही प्रतिसाद आलेला नाही.