भास्कर जाधव यांची पक्षातील ‘बडव्यां’वर टीका; पहिल्या फळीतील नेत्यांच्या कार्यपद्धतीवर प्रश्नचिन्ह उपस्थित.

भास्कर जाधव यांनी मात्र पक्षाच्या एका बैठकीतच ‘बडव्यां’वर टीका केल्याचे खात्रीलायकरित्या समजते. नेतेपदाची जबाबदारी आपल्याकडे असताना एकाही उमेदवाराला एबी फॉर्म देताना आपल्याला विचारण्यात आले नसल्याची तक्रार त्यांनी यावेळी केली. राजकारणात पक्षातून बाहेर पडताना पक्षातील नेत्यांवर खापर फोडणारे अनेक नेते असतानाच, शिवसेना (उबाठा) पक्षाचे नेते भास्कर जाधव यांनी मात्र पक्षाच्या एका बैठकीतच ‘बडव्यां’वर टीका केल्याचे खात्रीलायकरित्या समजते. नेतेपदाची जबाबदारी आपल्याकडे असताना एकाही उमेदवाराला एबी फॉर्म देताना आपल्याला विचारण्यात आले नसल्याची तक्रार त्यांनी यावेळी केली. तसेच, आजूबाजूचे लोक फुटत असताना आपल्या नेत्यांना त्याचा पत्ता कसा लागत नाही, असा प्रश्न विचारत पक्षातील पहिल्या फळीतील नेत्यांच्या कार्यपद्धतीवरच एकप्रकारे प्रश्नचिन्ह उपस्थित केले.गेल्या आठवड्यात शिवसेनेच्या (उबाठा) जिल्हाप्रमुख आणि संपर्कप्रमुखांची बैठक आयोजित करण्यात आली होती. यात स्थानिक पातळीवर कोणासोबत युती करावी याचा आढावा घेण्यात आला.

यावेळी पक्षप्रमुख उद्धव ठाकरे यांनी जिल्हाप्रमुख तसेच संपर्कप्रमुखांशी संवाद साधला. तत्पूर्वी जाधव यांचे भाषण झाले. यावेळी त्यांनी पक्षातील ‘बडव्यां’वर बोट ठेवल्याचे समजते. ‘पक्षात अनेक नेत्यांकडे जबाबदाऱ्या दिल्या असताना, प्रत्यक्षात पक्षात काय घडते हेच त्यांना कळत नाही. माझ्याकडे विदर्भाची जबाबदारी आहे. विधानसभा निवडणुकीदरम्यान तिथल्या उमेदवारांना एबी फॉर्म दिले. मात्र मला ते दिल्यानंतर समजले. ते कोणी दिले, कशाप्रकारे दिले याची माझ्याकडे काहीच माहिती नाही. ज्या भागाची जबाबदारी आहे, तिथल्या गोष्टी समजायला हव्यात’, असे त्यांनी नमूद केल्याचे समजते.जाधव यांनी यावेळी पक्षातून फुटणाऱ्या पदाधिकाऱ्यांच्या मुद्द्यावरही भाष्य केल्याचे समजते. ‘आपल्या पक्षात असे अनेक नेते आहेत, ज्यांना आजूबाजूचे लोक फुटून दुसऱ्या पक्षात जात असताना शेवटपर्यंत माहिती नसते. हे लोक फुटतातच कसे, त्यांच्या काही व्यथा वा अडचणी आहेत तर त्या या संबंधित नेत्यांकडून कशा सोडवल्या जात नाहीत’, अशी विचारणा त्यांनी केल्याचे समजते.

यावेळी जाधव यांच्या शेजारी खासदार संजय राऊत बसले होते. ही बैठक संपल्यानंतर गेल्या काही दिवसांत भाऊ चौधरी, सुधाकर बडगुजर, चंद्रहार पाटील हे नेते कसे फुटले याची चर्चा पदाधिकाऱ्यांमध्ये रंगल्याचे सांगण्यात आले.२००९च्या निवडणुकीत शिवसेनेच्या रामदास कदम यांनी विजयासाठी अघोरी पूजा केल्याचा दावा शिवसेना (उबाठा) पक्षाचे नेते भास्कर जाधव यांनी केला होता. त्याला प्रत्युत्तर देताना, ‘भास्कर जाधव जे बोलले तेवढी त्यांची पात्रता नाही. १९९५ आणि २००० मध्ये मीच बाळासाहेबांना सांगून त्यांना तिकीट मिळवून दिले होते’, अशी टीका कदम यांनी केली. ‘शिंदेसोबत जाधवही सुरतला गेले होते. पण शिंदेंनी त्यांना सोबत येण्यास नकार दिला’, असा दावाही त्यांनी यावेळी केला.