‘स्मार्ट सिटी’च्या नावाखाली 70000 लोकांना गंडा, कोट्यवधी रुपये घेऊन पसार; दोन भावांनी ‘असा’ केला स्कॅम.

नोकरदार सर्वसामान्य लोक आपल्या आयुष्यभराची कमाई वाचवून घर घ्यायचं स्वप्न पूर्ण करतात. काही कर्ज घेतात तर काही घरासाठी प्रत्येक पैसे वाचवतात पण, सुभाष बिजाराणी आणि रणवीर बिजाराणी सारखे लोक त्या स्वप्नांना धुळीस मिळवतात. राजस्थानमधील दोन भावांनी स्मार्ट सिटीच्या नावाखाली 70 हजार लोकांना 2676 कोटी रुपयांची फसवणूक करून सर्वात मोठा रिअल इस्टेट घोटाळा केला आहे.राजस्थानमधून 2,676 कोटी रुपयांच्या फसवणुकीचा एक प्रकार समोर आला आहे. एवढी मोठी फसवणूक करण्यासाठी दोन भावांनी बनावट कंपनी उभी केली आणि सुमारे 70000 लोकांना जाळ्यात अडकवले. सुभाष बिजाराणी आणि रणवीर बिजाराणी या दोन भावांनी कोणत्याही अडथळ्याशिवाय एवढी मोठी फसवणूक केली. या दोघांनी नेक्सा एव्हरग्रीन नावाची कंपनी स्थापन केली आणि गुजरातमधील ‘धोलेरा स्मार्ट सिटी’मध्ये उच्च परतावा आणि जमिनीचे भूखंड देण्याचे आश्वासन देऊन गुंतवणूकदारांना फसवल्याचा आरोप करण्यात आला आहे.

राजस्थानातील सिकर शहरातील दोन भावांनी – सुभाष बिजाराणी आणि रणवीर बिजाराणी – धोलेरा स्मार्ट सिटीच्या नावाखाली 70 हजार लोकांकडून कोट्यवधी रुपये लुबाडले. रणवीर बिजाराणीने 2014 मध्ये धोलेरा येथे जमीन खरेदी केली होती आणि भाऊ सुभाषने सैन्यातून निवृत्त होऊन परतल्यावर त्याच्याकडील 30 लाख रुपये धोलेरा येथे जमिनीत गुंतवले.इथपर्यंत सर्व काही ठीक होतं पण, 2021 मध्ये दोघांनी अहमदाबादमध्ये नेक्सा एव्हरग्रीन नावाची कंपनी रजिस्टर केली. दोघांनी आपल्या कंपनीद्वारे धोलेरा स्मार्ट सिटी प्रकल्पाचा एक भाग असल्याचा दावा केला आणि त्यांच्याकडे 1300 बिघा जमीन व त्यावर जागतिक दर्जाचा गृहनिर्माण प्रकल्प बांधणार असल्याचं लोकांना भासून दिलं.दोघांनी लोकांना भूखंड, फ्लॅट, जमीन आणि चांगल्या परताव्याच्या नावाखाली या स्मार्ट सिटीमध्ये गुंतवणूक करायला भाव पाडले. लोकांना या योजनेचा भाग बनवण्यासाठी भावांनी 1500 कोटी रुपये कमिशन म्हणून वाटले. लोकांचा विश्वास संपादन करण्यासाठी निवृत्त लष्करी जवानांना ऑफिस ऑपरेटर बनवले. संपूर्ण घोटाळा राबवण्यासाठी त्यांनी 15 हून अधिक शेल कंपन्या तयार केल्या. एजंटना कमिशन आणि भेटवस्तू देऊन त्यांनी 70 हजार लोकांना त्यांच्या बनावट स्मार्ट सिटीमध्ये गुंतवणूक करायला लावले.दोन्ही भावांनी लोकांना आलिशान घरांची स्वप्ने दाखवली आणि राजस्थान व गोव्यात स्वतःसाठी हॉटेल्स, फ्लॅट्स, खाणी, रिसॉर्ट्स खरेदी करू लागले. त्यांनी गुंतवणूकदारांचे पैसे वेगवेगळ्या ठिकाणी गुंतवले, ज्यामध्ये 26 शेल कंपन्यांचा वापर केला.कंपनीने हळूहळू आपली कार्यालये बंद करण्यास सुरुवात केली आणि कंपनीची कार्यालये एका रात्रीत गायब होऊ लागली. कंपनीविरुद्ध वेगवेगळ्या पोलिस ठाण्यात तक्रारी दाखल होऊ लागल्या आणि प्रकरण उघडकीस येताच ईडीने झुंझुनू, सिकर, जयपूर आणि अहमदाबादमधील 25 ठिकाणांवर छापे टाकले. छाप्यादरम्यान कोट्यवधी रुपयांची रोकड आणि क्रिप्टो खाती जप्त करण्यात आली पण, घोटाळ्याच्या रकमेच्या तुलनेत ही वसुली खूपच कमी आहे.केंद्र आणि गुजरात सरकार संयुक्तपणे गुजरातमधील धोलेरा येथे ग्रीनफिल्ड स्मार्ट सिटी बांधत आहेत. या स्मार्ट सिटीचा आकार दिल्लीच्या दुप्पट असून या स्मार्ट सिटीमध्ये अनेक सुविधा असतील. विमानतळापासून हे प्रकल्प बहुराष्ट्रीय कंपन्या, मॉल, शाळा इत्यादी सर्व काही असेल. हा प्रकल्प 2024 पर्यंत पूर्ण होण्याची अपेक्षा होती.