Rajendra Nikam
राजा रघुवंशी हत्या प्रकरणात आता नवा ट्विस्ट येताना दिसत आहे. याप्रकरणात एका 10 रुपयांच्या फाटलेल्या नोटेवरुन आता या प्रकरणाचा गुंता वाढला चालला आहे. मेघालयात हनिमूनला गेलेल्या इंदूरमधील व्यापारी राजा रघुवंशीची हत्या प्रेमप्रकरणातून झाल्याचं मानलं जात आहे. पण, आता या प्रकरणात ट्विस्ट येण्याची शक्यता आहे. सोनमचा भाऊ गोविंद रघुवंशी सध्या संशयाच्या भोवऱ्यात सापडला आहे. या प्रकरणात इंदूर गुन्हे शाखेने अचानक गोविंदला चौकशीसाठी बोलावल्याने प्रकरणाला दुसरं वळण मिळण्याची शक्यता आहे. याबाबत सूत्रांच्या माहितीनुसार, हे संपूर्ण प्रकरण हवाला व्यवसायाशी संबंधित आहे, सध्या पोलीस त्याचा तपास करत आहेत. परंतु यामुळे हे हत्येचे गूढ अधिक गुंतागुंतीचे होत असल्याचे दिसून येत आहे.
एका वृत्तवाहिनीच्या वृत्तानुसार, पोलिसांना सोनम रघुवंशीचा प्रियकर राज कुशवाहाच्या मोबाईलमधून फाटलेल्या 10 रुपयांच्या नोटांचे फोटो सापडले होते, जे हवाला व्यवहारात पुरावा म्हणून वापरले जात होते. सूत्रांच्या माहितीनुसार, हे फोटो हवाला नेटवर्कच्या कोडवर्डचा भाग होते, ज्याद्वारे लाखो रुपयांचे बेकायदेशीर व्यवहार केले जात होते.राज कुशवाहाने चौकशीदरम्यान हे देखील कबूल केले की तो सोनम आणि गोविंद रघुवंशीसोबत हवाला व्यवसायात सहभागी होता. या नोटांच्या फोटोंमुळे केवळ हवाला कनेक्शनबाबातच नाही, तर खोलवर रुजलेल्या आर्थिक गुन्ह्यांपर्यंत पोहोचण्याचा प्रयत्न पोलीस करत आहेत. सूत्रांनी दिलेल्या माहितीनुसार, तपासात असे दिसून आले आहे की सोनम आणि गोविंद यांनी त्यांचे नातेवाईक जितेंद्र रघुवंशी यांच्या बँक खात्यांमधून मोठ्या प्रमाणात व्यवहार केले. काही खात्यांमध्ये 14 लाख रुपयांपर्यंतच्या ठेवी आणि पैसे काढल्याचे पुरावे सापडले आहेत.इंदूर गुन्हे शाखेने हवालाशी संबंधित कागदपत्रे, डिजिटल डेटा आणि रोख व्यवहारांचे तपशील अंमलबजावणी संचालनालयाकडे (ED) सोपवले आहेत. ईडी आता मनी लाँड्रिंगच्या अँगलने प्रकरणाच्या खोलवर जाण्याची तयारी करत आहे. इंदूर गुन्हे शाखेने गोविंद रघुवंशी याला चौकशीसाठी बोलावले आहे. गोविंदचा प्लायवूड आणि लॅमिनेशनचा व्यवसाय हा श्री बालाजी अॅक्टोरियो हा हवालाचे पैसे लपवण्यासाठीचं माध्यम मानलं जातं.पोलिसांनी गोविंदच्या कार्यालयाची आणि गोदामाची झडती घेतली आहे. पोलिसांना तिथून काही संशयास्पद कागदपत्रं सापडली आहेत. याशिवाय, गोविंदच्या कर्मचाऱ्यांचीही चौकशी सुरू आहे. जेणेकरून हवाला नेटवर्कमधील त्याची भूमिका काय होती हे कळू शकेल.
