Rajendra Nikam
मध्य पूर्वेत तणाव वाढल्याने अमेरिकेचं अध्यक्षीय ‘डूम्सडे प्लेन’ वॉशिंग्टनमध्ये उतरलं आहे. अण्वस्त्र युद्धाच्या स्थितीत हे विमान वापरले जाते.वॉशिंग्टन डीसी: मध्य पूर्वेत इस्रायल आणि इराणमध्ये संघर्ष पेटलेला असताना अमेरिकेतही लक्षवेधी घडामोडी सुरु झाल्या आहेत. इराणच्या सर्वोच्च नेत्यांना अमेरिकेचे अध्यक्ष डोनाल्ड ट्रम्प यांनी थेट इशारा दिलेला आहे. यानंतर अमेरिकेचं अध्यक्षीय ‘डूम्सडे प्लेन’ म्हणजेच E-4B ‘नाइटवॉच’ मंगळवारी रात्री वॉशिंग्टन डीसीच्या जवळ असलेल्या जॉईंट बेस अँड्रूजवर उतरलं. या विमानाचा वापर अमेरिकेचे अध्यक्ष किंवा लष्कराच्या नेतृत्त्वाकडून केला जातो. अण्वस्त्र युद्ध किंवा जागतिक आपत्कालीन स्थिती निर्माण होण्याची शक्यता असल्यास या विमानाचा वापर केला जातो.
डूम्सडे प्लेन लुईसियानास्थित बार्क्सडेल हवाई तळावरुन एका असामान्य उड्डाण मार्गावर होतं. त्यामुळे सुरक्षा विश्लेषक, जाणकार आणि ऍव्हिएशन ट्रॅकर्सचं लक्ष वेधलं गेलं. नाईटवॉच विमानात अत्याधुनिक कम्युनिकेशन गीयर आहेत. या विमानात आकाशातच इंधन भरता येतं. त्यावर अण्वस्त्र हल्ल्यांचा कोणताही परिणाम होत नाही. इलेक्ट्रोमॅग्नेटिक हल्ल्यानंतरही डूम्सडे प्लेन सुरक्षित राहू शकतं.E-4B नाईटवॉचला अधिकृतपणे नॅशनल एअरबॉर्न ऑपरेशन्स सेंटर (एनएओसी) म्हटलं जातं. अण्वस्त्र स्फोट आणि इलेक्ट्रोमॅग्नेटिक हल्ले सहन करण्याची क्षमता या विमानात आहे. त्याच पद्धतीनं विमानाची रचना आणि निर्मिती करण्यात आलेली आहे. ११ सप्टेंबर २००१ रोजी झालेल्या दहशतवादी हल्ल्यावेळी या विमानाचा वापर करण्यात आला होता. तेव्हापासून या विमानाचा वापर अतिशय संवेदनशील परिस्थितीतच केला जातो.डूम्सडे प्लेनच्या उड्डाणामागील हेतू नेमका काय, याबद्दल अद्याप कोणतीही अधिकृत माहिती देण्यात आलेली नाही. या विमानात अमेरिकेचे अध्यक्ष ट्रम्प होते का, याचीही माहिती अद्याप समोर आलेली नाही. व्हर्जिनियाहून झेपावलेलं हे विमान वॉशिंग्टनला उतरलं आहे. सध्याच्या घडीला इराण आणि इस्रायल यांच्यातील संघर्ष टोकाला गेलेला आहे. परिस्थिती दिवसागणिक चिघळू लागलेली आहे. ती आणखी गंभीर होण्याची चिन्हं दिसू लागल्यानं अमेरिका हाय अलर्टवर आहे.अमेरिकेच्या डूम्सडे प्लेननं वॉशिंग्टन गाठल्यानं संपूर्ण जग सतर्क झालं आहे. मध्य पूर्वेतील परिस्थिती हाताबाहेर जाऊ लागल्यानं युद्धाचा धोका वाढला आहे. इराण आणि इस्रायलकडून एकमेकांवर हवाई हल्ले सुरु आहेत. क्षेपणास्त्रं डागली जात आहेत. अमेरिकेच्या अनेक युद्धनौका या परिसरात आधीपासूनच तैनात आहेत. त्यासोबतच एफ-१६ लढाऊ विमानंदेखील तैनात करण्यात आलेली आहेत.
