मुंबईसह ठाणे, कल्याण, वसई उपनगरात मुसळधार पाऊस, लोकल ट्रेन 15 ते 20 मिनिटं उशिरा

मुंबई आणि उपनगरात जोरदार पाऊस सुरू आहे. ठाणे जिल्ह्यातील बदलापूर, अंबरनाथ, कल्याण-डोंबिवलीतही पावसाचा जोर आहे. रेल्वे वाहतूक काही प्रमाणात उशिराने सुरू आहे. हवामान विभागाने मुंबई, कोकण, पुणे आणि घाट परिसरात मुसळधार पावसाचा अंदाज वर्तवला आहे.मुंबईसह उपनगरात बुधवारी रात्रीपासून मुसळधार पाऊस सुरू आहे. ठाणे जिल्ह्यातील बदलापूर, अंबरनाथ, कल्याण-डोंबिवलीत पावसाचा चांगलाच जोर आहे. कोकण किनाऱ्यावर मान्सूनचे ढग अरबी समुद्रापासून पसरले आहेत. त्यामुळे पुढील काही तास मुंबईसह कल्याण-डोंबिवली, बदलापूर, अंबरनाथ आणि परिसरात बहुतेक भागात मुसळधार पाऊस पडण्याची शक्यता आहे. मेघगर्जनेसह वेगवान वाऱ्यांसह पावासाचा अंदाज आहे. वसई-विरार, बोरिवली, अंधेरी, चर्चगेट या भागातही पावसाचा जोर रात्रीपासून कायम आहे.मुसळधार पावसाचा रस्ते वाहतुकीसह रेल्वे वाहतुकीवरही काही प्रमाणात परिणाम झाला आहे. मुंबईसह उपनगरातील अनेक सखल भागात पावसाच्या कोसळधारांनी रस्त्यांवर पाणी साचलं आहे.

त्यामुळे वाहतूक धिम्या गतीने सुरू आहे. दुसरीकडे रात्रीपासून अधून-मधून तर पहाटेपासून सुरू असलेल्या पावसाच्या संततधारेमुळे रेल्वे वाहतुकीवरही त्याचा पावसाचा परिणाम झाला आहे. मध्य रेल्वेची वाहतूक काही मिनिटं उशिराने सुरू आहे. बदलापूर, कर्जतकडून मुंबईकडे जाणाऱ्या लोकल ट्रेन १५ ते २० मिनिटं उशिराने धावत आहेत.दरम्यान, मुंबईसह कोकण, पालघर, रायगड, पुणे, नाशिकच्या घाट भागात मुसळधार पावसाची शक्यता आहे. उत्तर कोकणातील काही जिल्ह्यांमध्ये मुसळधार ते अतिमुसळधार पाऊस पडण्याची शक्यता आहे. दक्षिण कोकण-गोवा आणि दक्षिण मध्य महाराष्ट्रातील घाट परिसरातील काही ठिकाणी मुसळधार ते अतिमुसळधार पावासाचा अंदाज आहे.

IMD अर्थात भारतीय हवामानशास्त्र विभागाने महाराष्ट्रात मान्सून हंगामात पावसाचा सरासरीपेक्षा जास्त अंदाज वर्तवला आहे. यावर्षी जून ते सप्टेंबर या काळात सरासरीच्या १०६ टक्के पावसाची शक्यता वर्तवली आहे. राज्यासह देशाच्या बहुतांश भागांतही चांगल्या पावासाचा अंदाज आहे. याआधी हवामान विभागाने एप्रिलच्या पहिल्या टप्प्यात अंदाज वर्तवला होता. त्यात १०५ टक्के पावसाची शक्यता सांगितली होती.. मात्र त्यानंतर त्यात सुधारणा करत हवामान विभागाने आता सरासरीच्या १०६ टक्के पावसाचा अंदाज वर्तवला आहे.