बाबा आणायला गेलेत, मग… अपर्णा महाडिकांच्या लेकीचा ‘तो’ प्रश्न, आदिती तटकरेंसह सगळेच हेलावले.

डीएनए सॅम्पलचा अहवाल येऊन औपचारिकता पूर्ण होत नाही, तोपर्यंत अपर्णा महाडिक यांच्या मुलीला या घटनेबद्दल सांगणार नसल्याचे त्यांच्या नणंद आणि महिला व बालकल्याण मंत्री आदिती तटकरे यांनी सांगितले.‘आईने परत येणार सांगितले आहे आणि बाबाही आईला आणायला गेला आहे,’ असे महाडिक कुटुंबीयांनी अपर्णा महाडिक यांच्या मुलीला सांगितले आहे. त्यामुळे अपर्णा महाडिक यांची कन्या शुक्रवारी सातत्याने आईच्या आणि बाबांच्या फोनवर संपर्क साधण्याचा प्रयत्न करत होती. वडिलांनाही तिचे व्हिडिओ कॉल सुरू होते.
डीएनए सॅम्पलचा अहवाल येऊन औपचारिकता पूर्ण होत नाही, तोपर्यंत तिला या घटनेबद्दल सांगणार नसल्याचे अपर्णा महाडिक यांच्या नणंद आणि राज्याच्या महिला व बालकल्याण मंत्री आदिती तटकरे यांनी सांगितले. अपर्णा महाडिक या सुनील तटकरेंच्या भाच्याच्या पत्नी आहेत.अलीकडेच अपर्णा महाडिक, अमोल महाडिक, आदिती तटकरे आणि त्यांच्या सगळ्या भावंडांनी एकत्र येऊन मजा केली होती. ‘खूप वर्षांनी भावंडे एकत्र आली होती.

गुरुवारी या सगळ्या भावंडांच्या ग्रुपवर एका भाचीला वाढदिवसाच्या शुभेच्छाही देण्यात आल्या होत्या. असे प्रफुल्ल वातावरण असताना अचानकच अहमदाबाद-लंडन विमान अपघाताची बातमी आली आणि होत्याचे नव्हते झाले’ असे अदिती तटकरे यांनी सांगितले.‘मीडियाच्या ग्रुपवर या अपघाताच्या बातम्या सुरू झाल्या, तेव्हा त्या विमानामध्ये भावाची बायकोच असेल असे त्या क्षणी लक्षात आले नाही, मात्र नंतर मेसेज येऊ लागले आणि परिस्थिती आपल्याच घरच्यांसाठी अधिक बिकट होणार असल्याचे जाणवले’, असे अदिती तटकरे यांनी सांगितले.‘अपर्णा स्वयंभू होत्या. मंत्री म्हणून वावरताना नैसर्गिक आपत्ती, दुर्घटना समोर पाहत असतो. मात्र आता घरातल्यांवरच ओढवलेली स्थिती पाहता नऊ-दहा वर्षांच्या मुलीला हे सांगणे कठीण असेल’, असेही त्या म्हणाल्या.अपर्णा यांचे वडील लहानपणी वारल्याने आईने त्यांना आणि त्यांच्या बहिणीला स्वबळावर मोठे केले. बेंगळुरूमध्ये त्या लहानाच्या मोठ्या झाल्या.

त्यानंतर दक्षिण भारतीय संस्कृतीसोबतच त्यांनी अमोल महाडिक यांच्याशी लग्न झाल्यावर महाराष्ट्राच्या संस्कृतीलाही सहज स्वीकारले. पुढील काही महिन्यांमध्ये प्रशिक्षणानंतर त्यांना आणखी वरचे पद मिळाले असते.त्यांचे कुटुंबीय, नातेवाईकांसोबतच पाळीव प्राण्यांवरही खूप प्रेम होते. त्यांच्या विमानाला झालेल्या अपघातानंतर घरातील अस्वस्थता त्यांच्या लॅब्रेडोरपर्यंतही पोहोचली असून तोही अस्वस्थ आहे’, असे आदिती यांनी सांगितले. लंडनला जाऊन लवकरच परत येईन, असे त्यांनी मुलीला सांगितले होते. मात्र आता त्यांच्या पार्थिवाची ओळख पटवण्यासाठी आणि डीएनएसाठी त्यांचे पती आणि त्यांची बहीण अहमदाबादला रवाना झाले आहेत. बॅजसारख्या काही वस्तूंवरून त्यांची ओळख पटली आहे, मात्र या बाबी मनाने स्वीकारण्यासाठी अहवाल हाती लागल्यानंतरही किती वेळ लागेल, हे सांगता येत नाही.‘अपर्णा या विमानाच्या क्रू हेड होत्या. त्यांचे काही महिन्यांपूर्वी प्रमोशन झाले होते. काम सांभाळताना त्या अत्यंत आवडीने घराचीही जबाबदारी सांभाळत होत्या. त्यामुळे सून म्हणून त्यांच्या कामगिरीचा सगळ्यांनाच अभिमान होता.