हुंड्याच्या छळापायी आणखी एका विवाहितेने आयुष्य संपवलं, दुसऱ्या मजल्यावर गेली अन्… पुणे हादरलं!

पुण्यात आणखी एका विवाहितेने हुंड्याच्या छळापायी आपल्या आयुष्याची अखेर केली आहे. या विवाहितेने इमारतीच्या दुसऱ्या मजल्यावर जात खाली उडी घेतली. त्यातच तिचा मृत्यू झाला. या घटनेने पुण्यात खळबळ उडाली आहे.पुण्यात सासरच्या मंडळीच्या छळापायी काहीच दिवसांपूर्वी वैष्णवी हगवणे या विवाहितेने आपल्या आयुष्याची अखेर केली होती. वैष्णवीसोबत ज्याप्रकारचा छळ आणि मानसिक जाच करण्यात आला त्याने संपूर्ण महाराष्ट्र संतापला होता. त्यानंतर आता पुण्यात हुंड्यासाठी होणाऱ्या छळाला कंटाळून एका विवाहितेने आपला जीव दिला आहे.पुण्याच्यावाघोली येथे हुंड्याच्या छळाला कंटाळून स्वाती सूरज पाठक (वय 23) या नवविवाहितेने आपल्या आयुष्याची अखेर केली आहे. तिने इमारतीच्या दुसऱ्या मजल्यावरून उडी मारून आपला जीव दिल्याची धक्कादायक घटना घडली आहे.

या प्रकरणी स्वातीच्या वडिलांनी वाघोली पोलीस ठाण्यात फिर्याद दाखल केली असून, पोलिसांनी स्वातीचा पती सूरज पाठक (वय 26) याला अटक केली आहे. तसेच, सासू सुनिता पाठक (वय 45), दीर नीरज पाठक (वय 23), मामा अरुण उपाध्याय आणि अरविंद उपाध्याय यांच्यावरही गुन्हा दाखल करण्यात आला आहे.याबाबत पोलिसांनी दिलेल्या अधिक माहितीनुसार, स्वाती आणि सूरज यांचा दीड वर्षांपूर्वी विवाह झाला होता. लग्नात सूरजच्या कुटुंबीयांनी 5 लाख रुपये आणि सोन्याच्या दागिन्यांची मागणी केली होती. यापैकी 1 लाख रुपये आणि 7 तोळे सोने हुंडा म्हणून घेण्यात आले.

मात्र, मागणीप्रमाणे पूर्ण हुंडा न मिळाल्याने स्वातीला शारीरिक आणि मानसिक छळाला सामोरे जावे लागले. तिच्या अंगावरील सोन्याचे दागिने पती आणि सासूने गहाण ठेवून पैसे घेतले.हे दागिने सोडवण्यासाठी स्वातीच्या वडिलांकडे 3 ते 4 लाख रुपयांची मागणी करण्यात आली. वडिलांनी 3 लाख रुपये दिले, तरीही स्वातीचा छळ थांबला नाही. घरगुती कारणांवरून वारंवार होणाऱ्या वादविवाद आणि मारहाणीमुळे ती कंटाळली होती. या सर्व छळाला वैतागून 7 जून रोजी मध्यरात्री साडेबारा वाजण्याच्या सुमारास स्वातीने दुसऱ्या मजल्यावरून उडी मारून आपले जीवन संपवले. वाघोली पोलिसांनी या प्रकरणी तपास सुरू केला आहे.