Rajendra Nikam
भरधाव वेगात असलेल्या ट्रकने दुचाकीला जोरात धडक दिल्याने झालेल्या अपघातात दुचाकीस्वाराचा जागीच मृत्यू झाला आहे. ही दुर्दैवी घटना तेलगाव माजलगाव रस्त्यावर टालेवाडी फाट्या नजीक घडल्याची माहिती आहे. तेलगाव माजलगाव रस्त्यावर ठिकठिकाणी रस्त्याला मोठमोठ्या भेगा पडल्या असून, या भेगांमध्ये दुचाकी अडकून अनेकांचा बळी गेला आहे. हा अपघातही भेगा चूकवताना झाल्याची माहिती आहे. त्यामुळे या रस्त्याने आणखी एक बळी घेतल्याची चर्चा घटनास्थळी चालू होती. मयत हा तेलगाव येथील साखर कारखान्यात नोकरीला असल्याची माहिती आहे.
या घटनेने त्यांच्या कुटुंबावर दु:खाचा डोंगर कोसळला आहे.यासंदर्भात समजलेली अधिक माहिती अशी की, तेलगाव तालुका धारूर येथील लोकनेते सुंदररावजी सोळंके सहकारी साखर कारखान्यात नोकरी असलेले महारूद्र भिमराव लोंढे (रा. खालापुरी ता. जि. बीड ह. मु. सुंदरनगर तेलगाव) हे दुचाकी क्र. एम. एच. 23- 7424 ने रविवार (1 जून 2025) रोजी दुपारी तेलगावकडून माजलगावकडे जात असताना तेलगाव- माजलगाव रस्त्यावर टालेवाडी नजीक रोडला पडलेल्या भेगा चुकवताना समोरून भरधाव वेगात येत असलेल्या ट्रक क्र. एम. एच. 44- 7371 जोराची धडक दिली.
ही धडक इतकी भीषण होती की महारूद्र लोंढे यांची गाडी ट्रकच्या समोरच्या भागात अडकली, तर या अपघातात महारूद्र लोंढे यांचा जागीच मृत्यू झाला आहे.अपघात झाल्यानंतर कांही वेळ या मार्गावर मोठी वाहतुक कोंडी झाली होती. अपघाताची माहिती मिळताच दिंद्रुड पोलीस घटनास्थळी दाखल झाले होते. महारूद्र लोंढे हे गेल्या काही वर्षांपासून तेलगाव येथील लोकनेते सुंदररावजी सोळंके सहकारी साखर कारखान्यात डिस्लरी विभागात नोकरीस होते. ते कारखाना परिसरात वसाहतीत राहत होते. त्यांच्या अशा अपघाती निधनाबद्दल तेलगाव कारखाना परिसरासह खालापुरी परिसरात हळहळ व्यक्त होत आहे.
