चेहऱ्यावर ट्रिम केलेली दाढी, दक्षिणा म्हणून मागितली जेसीबी अन् थार गाडी, ‘शौकीन’ साधूला पैशाचा मोह सुटेना, अखेर….

चेहऱ्यावर ट्रिम केलेली दाढी, दक्षिणा म्हणून मागितली जेसीबी अन् थार गाडी, ‘शौकीन’ साधूला पैशाचा मोह सुटेना, अखेर….रायगड जिल्ह्यातील अलिबागमध्ये जादूटोणा आणि देवस्कीच्या नावाखाली एका व्यक्तीने लोकांना 40 लाखांचा गंडा घातला आहे. या प्रकरणी पोलिसांनी 4 जणांविरुद्ध गुन्हा दाखल केला आहे. महेश मोरे आणि त्याच्या साथीदारांनी संगनमत करून हा फ्रॉड केला. पोलिसांनी या प्रकरणी तपास सुरू केला आहे.अलिबाग पोलीस स्टेशनमध्ये या संदर्भात गुन्हा नोंदवण्यात आला आहे. आतापर्यंत 3 तक्रारी दाखल झाल्या आहेत. आरोपींनी आणखी काही जणांना फसवलं असण्याची शक्यता आहे. पोलिसांनी आरोपींना अटक केली आहे.महेश योगेश्वर मोरे (वय 53), मीर मांजरेकर उर्फ मिहीर मोरे (वय 24), सागर यशवंत कुंड (वय 34) आणि अपूर्वा महेश मोरे (वय 50) अशी आरोपींची नावे आहेत. हे सर्व अलिबागच्या ठिकरूळ नाक्याचे रहिवासी आहेत.

पोलिसांनी या चौघांविरुद्ध महाराष्ट्र नरबळी आणि जादूटोणा प्रतिबंधक अधिनियम 2013 अंतर्गत गुन्हा दाखल केला आहे. त्यांना कोर्टात हजर केले असता, न्यायालयाने त्यांना पोलिस कोठडी सुनावली आहे.पनवेलमधील बांधकाम व्यावसायिक असलेल्या तक्रारदाराची अलिबागमध्ये काही कामं सुरू होती. त्या कामाचे पैसे अडकले होते. फिर्यादीने पोलिसांना सांगितले की, “पैसे मिळवून देण्यासाठी मोरेंनी त्याला देवस्की आणि जादूटोणा करण्याचा सल्ला दिला. त्याने माझा विश्वास संपादन करून वेळोवेळी पैसे मागितले. आतापर्यंत मोरेने 38 लाख 50 हजार रुपये घेतले.” असे देखील फिर्यादीने सांगितले.दुसऱ्या एका कुटुंबाला घरातील वाद मिटवण्यासाठी आणि सुख-शांती मिळवण्यासाठी मोरेने मंतरलेले दगड घराभोवती फिरवण्यास सांगितले. यासाठी त्यांनी 2 लाख 25 हजार रुपये घेतले. याशिवाय आणखी एका व्यक्तीला 1 लाख 29 हजार रुपयांचा गंडा घातल्याचं उघडकीस आलं आहे. या मांत्रिकाने लोकांचा विश्वास संपादन करून एक जेसीबी आणि एक थार गाडी स्वतःसाठी मागून घेतली, अशी माहितीही समोर आली आहे.आरोपींना अलिबाग कोर्टात हजर केले. कोर्टाने महिला आरोपीला जामीन मंजूर केला आहे. उर्वरित तीन आरोपींना 3 जून 2025 पर्यंत पोलिस कोठडीत ठेवण्याचे आदेश दिले आहेत. अलिबाग पोलीस स्टेशनचे पोलीस निरीक्षक किशोर साळे या प्रकरणाचा पुढील तपास करत आहेत. “आरोपींकडून आणखी काही जणांची फसवणूक झाली असण्याची शक्यता आहे. त्यामुळे ज्यांची फसवणूक झाली आहे, त्यांनी पुढे येऊन तक्रार दाखल करावी,” असे आवाहन पोलिसांनी केले आहे.