नाशिकमध्ये मोठा स्कॅम; नोकरीचे स्वप्न दाखवून ९० जणांची दीड कोटींना फसवणूक, नेमकं प्रकरण काय?

नाशिकमध्ये मोठा स्कॅम; नोकरीचे स्वप्न दाखवून ९० जणांची दीड कोटींना फसवणूक, नेमकं प्रकरण काय?आरोग्य विभागात कंत्राटी नोकरी मिळवून देण्याचे आमिष दाखवत शहरातील एका महिलेसह अलिबाग येथील संशयिताने धुळे जिल्ह्यातील नव्वद जणांकडून एक कोटी चाळीस लाख रुपये उकळल्याचा प्रकार उघड झाला आहे. त्यापैकी सुमारे अडीच लाख रुपये काही उमेदवारांना परत केले असले, तरी उर्वरित कोट्यवधी रुपयांसह दोघे पसार झाले आहेत. त्यापैकी सरकारवाडा पोलिस ठाण्यात दोघांविरुद्ध गुन्हा दाखल करण्यात आला आहे.साक्री तालुक्यातील रहिवाशी डॉ. कुणाल गुलाबराव भदाणे (वय ३८) यांच्या फिर्यादीनुसार, संशयित कविता प्रशांत भदाणे (रा. ध्रुवनगर) व वैभव विजय पोळ (रा. अलिबाग, रायगड) यांच्याविरोधात फसवणुकीचा गुन्हा दाखल आहे. संशयितांनी जुलै २०२३ पासून संबंधित उमेदवारांना गंडा घातला आहे. फिर्यादी कुणाल व संशयित कविता भदाणे हे नातलग असून, कविता यांनी धुळे जिल्ह्यातील आरोग्य खात्यासंदर्भात सफाई कामगार, शिपाई, चालक, पर्यवेक्षक, लॅब टेक्निशियन, नर्सिंग पदावर कंत्राटी पद्धतीने नोकरभरती असल्याचे सांगितले. तुमच्या ओळखीतील उमेदवारांना आमच्याशी संपर्क साधण्यास सांगा, असे कुणाल यांना सांगितले.

त्यानुसार धुळे जिल्ह्यातील ९० इच्छुक उमेदवारांनी कविता भदाणे यांच्या अशोक स्तंभाजवळील शिवांजली सोल्युशन्स या कार्यालयात संपर्क साधला.कविता यांनी उमेदवारांकडून १ कोटी ४० लाख रुपये घेतले. पैसे घेतल्यानंतर उमेदवारांना कोणतीही नोकरी लागली नाही. त्यामुळे उमेदवारांनी डॉ. कुणाल यांच्याकडे पैशांचा तगादा लावला. त्यामुळे डॉ. कुणाल यांनी काही उमेदवारांना ५७ लाख १५ हजार रुपये दिले. तर, संशयित कविता भदाणे व वैभव पोळ यांनी पैसे देण्यास टाळाटाळ केली. वारंवार पैशांची मागणी केल्यानंतर कविताने डॉ. कुणाल यांना ५० हजार रुपये, तर उमेदवारांना दोन लाख रुपये परत केले. मात्र, उर्वरित पैसे देण्यास टाळाटाळ केली. फसवणूक झाल्याचे लक्षात आल्यानंतर डॉ. कुणाल भदाणे यांनी सरकारवाडा पोलिस ठाण्यात दोघांविरोधात फसवणुकीची फिर्याद दाखल केली.डॉ. कुणाल यांच्या फिर्यादीनुसार, फसवणूक झालेल्यांची संख्या वाढण्याची शक्यता असून, २०० ते ३०० उमेदवारांनी पैसे जमा केले आहेत. उमेदवारांकडून गोळा केलेल्या १ कोटी ४० लाख रुपयांपैकी २९ लाख रुपये कविता यांनी कमिशन म्हणून स्वत:कडे ठेवले; तर उर्वरीत १ कोटी ११ लाख रुपये वैभव पोळ यास दिले आहेत. संशयितांनी धुळे, नंदुरबार जिल्ह्यातील सुमारे २०० ते ३०० उमेदवारांकडूनही पैसे घेतल्याचे डॉ. कुणाल यांनी फिर्यादीत म्हटले आहे.नाशिकः २९ मे रोजी सकाळी अकरा ते अडीच या वेळेत दिंडोरी रस्त्यावरील एका महाविद्यालयात टेट परीक्षा सुरू असताना पार्किंगमध्ये उभ्या वाहनांतून काही मोबाइलसह ‘एटीएम’ कार्ड लंपास झाले. त्यापैकी काही ‘एटीएम’ कार्डद्वारे काही पैसेदेखील चोरट्यांनी काढून घेतले. त्यानुसार ९१ हजार ४५० रुपयांची चोरी झाल्याप्रकरणी शुभम अनिल पगार (रा. अहिल्यानगर) व इतरांनी म्हसरूळ पोलिसांत फिर्याद दिली आहे