शशांक हगवणेचे पाय आणखी खोलात, शस्त्र परवाना मिळवण्यासाठी पुणे पोलीस आयुक्तांना खोटी माहिती दिली, अर्जात नेमकं काय?

वैष्णवी हगवणे आत्महत्या प्रकरणात शशांक हगवणे याच्या अडचणी वाढल्या आहेत. शशांक हगवणे याने शस्त्र परवाना मिळवण्यासाठी खोट्या पत्त्याचा वापर केला. त्यामुळे त्याच्यावर आणखी एक गुन्हा दाखल झाला आहे. त्याने 17 ऑक्टोबर 2022 रोजी पुणे पोलीस आयुक्तांकडे शस्त्र परवान्यासाठी अर्ज केला होता.शशांक हगवणे याने शस्त्र परवाना मिळवण्यासाठी चुकीची माहिती दिली. त्याने अर्जात पुण्याच्या कर्वेनगरमधील पत्ता दिला होता. फ्लॅट क्रमांक 203, दुसरा मजला, बिल्डिंग क्रमांक 04, सरगम कॉलनी, स.नंबर 15, लेन नंबर 01, कर्वेनगर येथे तो 10 वर्षांपासून राहत आहेत, असे त्याने सांगितले.

मात्र, ही माहिती खोटी असल्याचे उघड झाले आहे. या प्रकरणी शशांक हगवणे याच्यावर विविध कलमांनुसार गुन्हा दाखल करण्यात आला आहे. “शस्र अधिनियम 1959 चे कलम 30 अंतर्गत नियमांचे उल्लंघन” केल्याचा आरोप आहे. तसेच “आर्म्स रुल 2016 चे कलम 11 (8) अन्वये शस्र परवाना मिळण्याकरता केलेल्या अर्जामध्ये खोटी माहिती सादर केली” म्हणून गुन्हा दाखल झाला आहे.त्याच्यावर भारतीय दंड संहिता 1860 चे कलम 177, 191,192, 193, 417, 420 अंतर्गत गुन्हे दाखल झाले आहेत. यासोबतच शस्र अधिनियम 1959 चे कलम 30 आणि आर्म्स रुल 2016 चे कलम 11(8) नुसारही कारवाई करण्यात आली आहे.

शशांक हगवणे याने स्वतःच्या संरक्षणासाठी शस्त्र परवाना मागितला होता. त्यासाठी त्याने पत्त्याचा पुरावा म्हणून खोटी माहिती सादर केली. त्यामुळे आता तो अधिक अडचणीत आला आहेत. पोलीस या प्रकरणाचा अधिक तपास करत आहेत.दरम्यान, काही दिवसांपूर्वी शशांक हगवणेचा आणखी एक कारनामा समोर आला होता. शशांक हगवणेने जेसीबी व्यवहारप्रकरणी ११ लाख ७० हजार रुपयांची फसवणूक केल्याचा आरोप खेड तालुक्यातील प्रशांत येळवंडे यांनी केला आहे. याप्रकरणी महाळुंगे चाकण पोलीस ठाण्यात तक्रार दिली असून शशांक आणि त्याच्या आईविरोधात गुन्हा दाखल करण्यात आला आहे.