भाजप आमदार परिणय फुके यांच्यावर संपत्ती आणि मानसिक छळासंदर्भातील गंभीर आरोप; पोलिसांवर दुर्लक्षाचा ठपका.

 आमदार परिणय फुके आणि त्यांच्या कुटुंबीयांवर प्रिया फुके यांनी गंभीर आरोप केले आहेत, ज्यामुळे राजकीय वर्तुळात खळबळ उडाली आहे. पतीच्या निधनानंतर संपत्तीच्या वाटणीवरून वाद सुरू असून, मानसिक आणि शारीरिक त्रास दिला जात असल्याचा आरोप प्रिया यांनी केला आहे.भाजपचे आमदार परिणय फुके यांच्यावर आणि त्यांच्या कुटुंबीयांविरुद्ध त्यांच्या भावाच्या पत्नीने प्रिया फुके यांनी गंभीर आरोप करत संपूर्ण राज्याचे लक्ष वेधून घेतले आहे. बुधवारी नागपूर येथे घेतलेल्या पत्रकार परिषदेमध्ये प्रिया फुके यांनी आपली व्यथा मांडताना अनेक धक्कादायक बाबी समोर आणल्या. त्यांनी सांगितले की, 2022 मध्ये पती संकेत फुके यांचे निधन झाल्यानंतर त्यांच्या आयुष्यात संघर्षांची मालिका सुरू झाली असून, परिणय फुके व इतरांकडून मानसिक छळ केला जात असल्याचा दावा त्यांनी केला आहे. प्रिया फुके यांनी 2012 मध्ये संकेत फुके यांच्याशी विवाह केला होता. त्यानंतर काही वर्षांनी संकेत यांना किडनीचा गंभीर आजार असल्याचे समजले. त्या म्हणाल्या, “लग्नाच्या वेळी संकेत यांना किडनीचा आजार असल्याची बाब माझ्याकडून लपवली गेली. दोन वर्षांनंतर त्यांचे किडनी ट्रान्सप्लांट झाल्याचं प्रिया फुके म्हणाल्या.

संकेत फुके यांचे निधन झाल्यानंतर, त्यांच्या संपत्तीच्या वाटपावरून वाद सुरू झाला. प्रिया फुके यांचा आरोप आहे की, त्यांनी पतीच्या संपत्तीतून मुलांच्या हक्कासाठी हिस्सा मागितला, आणि त्यानंतर त्यांच्यावर खोटे गुन्हे दाखल करून, मानसिक त्रास देण्यास सुरुवात झाली. “अ‍ॅट्रोसिटीसारखे खोटे गुन्हे मागील दीड वर्षांपासून दाखल केले जात आहेत. मला सतत पोलिस स्टेशनमध्ये बोलावलं जातं. दोन लहान मुलांसह मला तासंतास बसवलं जातं, हे अमानवी आहे,” असं त्यांनी सांगितलं.

विशेष बाब म्हणजे, प्रिया फुके यांनी काही ठोस पुरावे सादर केल्याचा दावा केला आहे. “परिनय फुके यांच्या विरोधात मी दस्तऐवज, व्हिडीओ क्लिप्स आणि इतर पुरावे दिले. तरीसुद्धा पोलिसांनी कोणतीही ठोस कारवाई केली नाही. यंत्रणांवर राजकीय दबाव आहे, हे स्पष्ट आहे,” असे त्या म्हणाल्या.प्रिया फुके यांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि राज्य महिला आयोगाकडेही तक्रार केली आहे. पण, अद्याप त्यांना न्याय मिळालेला नाही. “मी फक्त न्याय मागते आहे. माझ्या मुलांना सुरक्षित आयुष्य हवं आहे. मला कोणत्याही राजकीय लढाईत रस नाही, पण सत्य सांगणे माझं कर्तव्य आहे,” असे त्यांनी भावनिक आवाहन करत सांगितले.सुषमा अंधारे यांनी महिला आयोगाच्या अध्यक्ष रूपाली चाकणकर यांच्यावर टीका करत महिला आयोग पक्षाच्या कामात व्यस्त असल्याचा आरोप केला. प्रिया फुके प्रकरणी पोलिसांवर गंभीर आरोप असून, चौकशीसाठी पाठवलेल्या पत्रांनंतरही आयोगाने दखल घेतली नसल्याचे अंधारे म्हणाल्या. भाजप सत्ताधारी कुटुंबातील प्रिया फुके यांना पक्षात घेऊन राजकारण सुरू आहे. “परिनय फुके हे फडणवीस यांचे निकटवर्तीय आहेत, लोक त्यांच्याकडून आदर्श घेतात,” असे त्यांनी नमूद केले. मुख्यमंत्री आणि अजित पवार यांना उद्देशून, चौकशीच्या नावाखाली होणारा त्रास थांबवावा आणि महिला आयोगाने पक्षनिष्ठेपेक्षा जबाबदारीने काम करावे, अशी मागणी त्यांनी केली.प्रिया फुके यांना समर्थन देण्यासाठी आमदार रोहिणी खडसे नागपुरात दाखल झाल्या. “हे प्रकरण राजकारणाचं नाही, आम्ही बहिणीसाठी आलो आहोत,” असे त्या म्हणाल्या. खडसे यांनी आरोप केला की, सत्ताधारी पक्षातील लोकांवर गुन्हे दाखल होत नाहीत आणि पोलीस कारवाईस टाळाटाळ करतात. “सरकारने प्रिया फुके यांना ‘लाडकी बहीण’ समजून मदत करावी,” अशी मागणी करत त्यांनी महिला आयोगाकडून अधिक सक्रिय भूमिकेची अपेक्षा व्यक्त केली.