मुख्यमंत्री फडणवीस रविवारी नाशिकमध्ये; सिंहस्थ नियोजनाचा घेणार आढावा, तारखाही होणार जाहीर.

मुख्यमंत्री देवेंद्र फडणवीस रविवारी १ जून रोजी नाशिक दौऱ्यावर येत आहेत. या दौऱ्यात साधू-महंत आणि सिंहस्थाशी संबंधित १३ आखाड्यांच्या उपस्थितीत महापालिकेत बैठक होणार आहे.नाशिक आणि त्र्यंबकेश्वर येथे २०२७ मध्ये होणाऱ्या सिंहस्थ मेळ्याच्या पर्वस्नानांच्या तारखा निश्चितीसह तयारीचा आढावा घेण्यासाठी मुख्यमंत्री देवेंद्र फडणवीस रविवारी १ जून रोजी नाशिक दौऱ्यावर येत आहेत. या दौऱ्यात साधू-महंत आणि सिंहस्थाशी संबंधित १३ आखाड्यांच्या उपस्थितीत महापालिकेत बैठक होणार आहे. या बैठकीनंतर तारखांची घोषणा केली जाईल. सोबतच मुख्यमंत्री फडणवीस यांनी फेब्रुवारीत सर्व यंत्रणांना दिलेल्या निर्देशांनुसार तयारीचा आढावा घेतला जाईल. त्यामुळे जिल्हाधिकारी कार्यालयासह महापालिकेची यंत्रणा कामाला लागली आहे.सन २०२७ मध्ये नाशिकमध्ये होणाऱ्या सिंहस्थासाठी प्रशासकीय पातळीवर तयारी सुरू असली तरी, गत सिंहस्थाच्या तुलनेत यंदाची तयारी संथगतीने सुरू आहे. त्यामुळे साधू-महंतासह नाशिककरांमध्ये नाराजी आहे. ही नाराजी दूर करण्यासाठी मुख्यमंत्री देवेंद्र फडणवीस उतरले आहेत. सिंहस्थाच्या नियोजनासह साधू-महंताशी चर्चा करून सिंहस्थ तारखांची घोषणा करण्यासाठी मुख्यमंत्री फडणवीस नाशिक दौऱ्यावर येत आहेत.

प्रशासनाला सूचना मिळाल्यानंतर प्रशासकीय तयारी सुरू झाली आहे. महापालिकेच्या राजीव गांधी मुख्यालयात स्थायी समितीच्या सभागृहात ही बैठक होईल. या बैठकीस अखिल भारतीय आखाडा परिषदेतील तेरा आखाड्यांचे प्रत्येकी दोन असे २६ प्रतिनिधी, तसेच नाशिक व त्र्यंबकेश्वर येथील साधू-महंत आणि पुरोहित संघाचे प्रतिनिधी उपस्थित राहतील. शाही स्नान आणि पर्वस्नानांच्या तारखा या बैठकीत जाहीर केल्या जाणार आहेत. त्यामुळे या बैठकीसाठी प्रशासन आणि धार्मिक संस्थांनी नियोजन सुरू केले आहे.या बैठकीसाठी भारतीय आखाडा परिषदेचे पंचायती श्री निर्वाणी आराखडा, श्री निर्मोही आखाडा, श्री दिंगबर आखाडा, श्री जुना आखाडा, श्री आवाहन आखाडा, श्री अग्नी आखाडा, श्री निरंजनी आखाडा, श्री आनंद आखाडा, श्री महानिर्वाणी आखाडा, श्री अटल आखाडा, श्री बडा उदासीन आखाडा, नया उदासीन आखाडा, श्री निर्मल आखाडा या आखाड्यांना निमंत्रण देण्यात आले असून, प्रत्येकी दोन सदस्य उपस्थित राहण्याच्या सूचना प्रशासनाने केल्या आहेत.प्रयागराज महाकुंभनंतर २०२७ मध्ये नाशिक-त्र्यंबकेश्वर सिंहस्थमेळा होणार आहे. त्यासाठीची तयारी तीन वर्ष आधीपासून होणे अपेक्षित आहे. परंतु, महायुती सरकारमध्ये नाशिकच्या पालकमंत्रिपदाची नियुक्ती रखडल्यामुळे सिंहस्थ नियोजनही रखडले आहे. सिंहस्थ नियोजनसाठी नाशिकमधून जवळपास २४ हजार कोटींचा आराखडा शासनाला सादर करण्यात आला आहे. त्याला अद्याप मंजुरी मिळाली नसल्याने प्रशासकीय पातळीवर गोंधळ आहे. सिंहस्थ कामे करण्याबाबत तोंडी सूचना करण्यात आल्या आहेत. एकीकडे निधी नाही, तर दुसरीकडे कामांसाठी वेळ कमी असल्यामुळे प्रशासनाची कोंडी झाली आहे.सिंहस्थाच्या तयारीसाठी मुख्यमंत्री फडणवीस यांनी २० फेब्रुवारीला मुंबईत बैठक घेतली होती. या बैठकीत विविध विभागांशी संबंधित कामे करण्यासाठी त्यांनी सूचना केल्या होत्या. त्यात बाह्य रस्ते, अंतर्गत रस्ते, साधुग्राम, अतिक्रमण अशा विविध विषयांसंदर्भात फडणवीस यांनी निर्देश दिले होते. यानुसार वस्तुस्थिती अहवाल सादर करण्याचे निर्देश मुख्यमंत्री कार्यालयाकडून प्राप्त झाले आहेत. त्यामुळे या कामांचा आढावा तयार करण्यासाठी प्रशासकीय पातळीवर सध्या लगबग आहे.