कोकणात पावसाचा कहर, वरुणराजा कोपला, वीज पडून तरुणाचा मृत्यू, दापोलीत एकजण सायकलसह वाहून गेला.

रायगड जिल्ह्यातील तुफान पाऊस सुरू असून श्रीवर्धन मुरुड परिसरात काही ठिकाणी पाणी भरले आहे. महाड येथून रायगड किल्ल्याकडे जाणारा रस्ता खचला आहे. रायगड रत्नागिरी व सिंधुदुर्ग जिल्ह्यात प्रशासनाकडून पावसाचा ऑरेंज अलर्ट देण्यात आला असून कामाशिवाय नागरिकांनी बाहेर पडू नये, असा सावधानतेचा इशारा देण्यात आला आहे.कोकणात रत्नागिरी व रायगड जिल्ह्यात मे महिन्यातच जुलै महिन्यातील आषाढ सारखा तुफान पाऊस सुरू आहे. त्यामुळे आता मान्सूनपूर्व पावसाने आर्थिक दणका दिल्यानंतर आता कोकणासमोर ऐन मे महिन्यातच जलसंकट उभ राहिल आहे. त्यामुळे रायगड रत्नागिरी व सिंधुदुर्ग जिल्ह्यात तीनही जिल्ह्यात अनेक ठिकाणी सखल भाग पाण्याखाली गेले आहेत. तर, काही ठिकाणी पुरसदृश्य परिस्थिती निर्माण झाली आहे. ग्रामीण भागातील रस्ते पाण्याखाली गेले आहेत.पहिल्याच पावसात रत्नागिरी जिल्ह्यातील दापोली वणंद येथील 48 वर्षे वयाचा इसम नदी ओलांडताना सायकलसह वाहून गेल्याची दुर्दैवी घटना घडली आहे. या बेपत्ता इसमाचा दापोली प्रशासनाकडून युद्धपातळीवर शोध सुरू आहे. कर्जत रायगड नेरळ पोलीस ठाणे हद्दीतील मौजे बिरदोले गावातील तरुणाचा अंगावर विज पडून मृत्यू झाला आहे.

रोशन कचरू कालेकर (वय 25 वर्ष) हा शेतावर काम करीत असताना विज पडून मृत्यू झाला आहे.दापोली येथे इसम वाहून गेल्याची ही दुर्दैवी घटना सोमवारी सकाळच्या सुमारास घडली आहे. दापोली तालुक्यातील वणंद येथील नदीला पूर आल्याने पुलावरुन पाणी वाहत होतं. याच कोंडीच्या पुलावरुन ड्युटीवरुन घरी परतत असताना राजेंद्र कोळंबे (45) हे त्यांच्या सायकलसह वाहून गेले. दापोली पोलीस प्रशासन, महसूल विभाग, गावकरी नदीपात्रात त्यांचा शोध घेत आहेत.सिंधुदुर्ग जिल्ह्यात काल रात्री पावसाची रिपरिप सुरू होती. मात्र, आज सकाळपासून पावसाने विश्रांती घेतल्याचे दिसत आहे. मागील आठवडाभर पाऊस असल्याने नद्यांच्या पाण्याच्या पातळीत वाढ झाली आहे. हवामान खात्याचा कोकण किनारपट्टीला ऑरेंज अलर्ट जारी करण्यात आला असून काही ठिकाणी मुसळधार पाऊस होण्याची शक्यता देखील हवामान खात्याने वर्तवली आहे.पावसाने रविवारीही रत्नागिरीत धूमाकूळ घातला आहे.

रविवारी दिवसभर मुसळधार पडल्यानंतर सोमवारी सकाळपासूनही रत्नागिरी व रायगड जिल्ह्यात पावसाची संत:धार सुरू आहे. दापोली-खेड प्रमुख राज्य मार्गाचे गेले काही महिने काम सुरू आहे. याच मार्गावर खेड तालुक्यातील फुरुस गावाजवळ पुलाचे काम सुरू असून, त्यासाठी पर्यायी मार्ग करण्यात आला होता. मात्र, या रस्त्यावर पावसामुळे चिखल झाल्याने या मार्गावरून वाहतूक बंद करण्यात आली आहे. दापोली- खेड मार्गावरील वाहतूक आता दस्तुरीवरून पालगडमार्गे वळवण्यात आली आहे.जिल्ह्यात आज सोमवार दिनांक 26 मे रोजी सकाळी आठ वाजेपर्यंत 2249 मि.मी. पाऊस पडला आहे. सर्वाधिक पाऊस हा मुरुड तालुक्यातील 371 मि.मी. पाऊस त्या खालोखाल श्रीवर्धन तालुक्यात 307 मि.मी. पाऊस, तर सर्वात कमी पेण तालुक्यात 50 मि.मी. पाऊस पडला. जिल्ह्यात सरासरी 140.56 मि.मी. पाऊस पडला आहे.