पुण्यातील खराडी फेक कॉल सेंटरचं महिन्याचं भाडं ९ लाख अन् इन्कम… आकडा ऐकून तुव्हीही व्हाल अवाक.

पुणे पोलिसांनी खराडीमध्ये एका बनावट कॉल सेंटरचा भांडाफोड केला. हे कॉल सेंटर अमेरिकेतील नागरिकांना डिजिटल अटक करण्याची धमकी देऊन पैसे उकळत होते. या कॉल सेंटरबाबत मोठी माहिती समोर आली आहे.अमेरिकेतील नागरिकांना ‘डिजिटल अरेस्ट’ची भीती घालून त्यांच्याकडून दररोज लाखो रुपये उकळणाऱ्या खराडीतील बनावट कॉल सेंटरचा पुणे पोलिसांनी पर्दाफाश केला. खराडी-मुंढवा रस्त्यावरील प्राइड आयकॉन या इमारतीच्या नवव्या मजल्यावर ‘मॅग्नटेल बीपीएस अँड कन्सल्टंस’ या नावाने हे कॉल सेंटर सुरू होते. या ठिकाणी १२३ कर्मचारी काम करीत होते. दररोज सायबर फसवणुकीच्या माध्यमातून ३० ते ४० हजार डॉलर्स (सुमारे २५ ते ३५ लाख रुपये) अमेरिकन नागरिकांकडून उकळले जात होते. हा पैसा हवालाच्या माध्यमातून भारतात येत होता. पुणे पोलिसांच्या गुन्हे शाखेने या प्रकरणी पाच जणांना अटक केली आहे. या रॅकेटच्या मुख्य सूत्रधारासह तीन जण फरारी आहेत. सरजितसिंग गिरावतसिंह शेखावत (सध्या रा. खराडी, मूळ रा. राजस्थान), अभिषेक अजयकुमार पांडे, श्रीमय परेश शहा, लक्ष्मण अमरसिंग शेखावत आणि अॅरोन अरुमन खिश्चन (चौघेही मूळ रा. अहमदाबाद) अशी अटक केलेल्यांची नावे आहेत. करण शेखावत (रा. अहमदाबाद), संजय मोरे आणि केतन रवाणी हे तिघे फरारी झाले आहेत. यातील शेखावत मुख्य सूत्रधार असल्याचा पोलिसांना संशय आहे. सरजितसिंग शेखावत व्यवस्थापक म्हणून काम करायचा. सायबर चोरट्यांच्या एवढ्या मोठ्या प्रमाणात सुरू असलेल्या कॉलसेंटरमुळे खळबळ उडाली आहे.जून २०२४मध्ये १० हजार चौरस फुटाच्या क्षेत्रफळात हे कॉल सेंटर सुरू झाले. या जागेसाठी महिन्याला नऊ लाख रुपये भाडे होते. अमेरिकन नागरिकांना फोन करण्यासाठी नेमलेले कर्मचारी हे सर्व गुजरात, राजस्थान, दिल्ली या राज्यांतील असून, त्यांचे शिक्षण दहावी, बारावीपर्यंत झाले आहे. पोलिस या प्रत्येकाची चौकशी करीत आहेत. येथे सायंकाळी सहा ते मध्यरात्री दोनपर्यंत काम चालायचे. मोबाइल, चार राउटर जप्त केले. येथून पोलिसांनी ६४ लॅपटॉप, ४१ मोबाईल, चार राऊटर जप्त केले.अमेरिकी नागरिकांना फोन करून वेगवेगळ्या प्रकारची भीती घातली जात होती.पोलिस कारवाईपासून बचावासाठी क्रिप्टो करन्सी किंवा अॅमेझॉन गिफ्ट व्हाउचर्सच्या स्वरूपात त्यांच्याकडून पैसे उकळले जात.
हे पैसे इंटरनॅशनल हवालाच्या माध्यमातून देशात आणण्यात येत होते. प्राथमिक माहितीनुसार महिन्याला सात ते आठ कोटींची उलाढाल होती.पोलिसांनी दिलेल्या माहितीनुसार, ‘तुमच्या खात्यातून अमली पदार्थाचे व्यवहार झाले आहेत. तुम्हाला पोलिसांकडून अटक केली जाऊ शकते,’ अशी भीती घालून नागरिकांकडून पैसे उकळले जात असल्याची माहिती पोलिसांना मिळाली होती. त्यानुसार शुक्रवारी रात्री साडेदहाच्या सुमारास गुन्हे शाखेसह स्थानिक पोलिसांनी कॉल सेंटरवर छापा टाकला. पोलिसांनी पहाटे सहापर्यंत झडती घेतली. प्राथमिक चौकशीनंतर त्यांच्याकडून काम करून घेणाऱ्या पाच जणांना पोलिसांनी अटक केली. पोलिस आयुक्त अमितेशकुमार, सहआयुक्त रंजनकुमार शर्मा, गुन्हे शाखेचे उपायुक्त निखिल पिंगळे, आर्थिक व सायबर गुन्हे शाखेचे उपायुक्त विवेक मासाळ यांच्या मार्गदर्शनाखाली सहायक आयुक्त गणेश इंगळे, वरिष्ठ निरीक्षक अजय वाघमारे, स्वप्नाली शिंदे, प्रताप मानकर, वाहीद पठाण यांच्या पथकाने ही कारवाई केली.