मृत्यूच्या दिवशीही बेदम मारहाण, १५ जखमा मृत्यूपूर्वी २४ तासांमधील; वैष्णवीच्या बॉडीवरील जखमांवरुन धक्कादायक बाब समोर.

पुण्यात वैष्णवी हगवणे आत्महत्या प्रकरणात मोठा खुलासा झाला आहे. शवविच्छेदन अहवालात तिच्या शरीरावर २९ जखमा आढळल्या आहेत. सासरच्या लोकांनी मारहाण केल्याचा संशय आहे. न्यायालयाने आरोपी पती, सासू आणि नणंद यांच्या पोलिस कोठडीत २८ मे पर्यंत वाढ केली आहे.वैष्णवी हगवणेच्या मृतदेहावर एकूण २९ जखमा आढळल्या असून, त्यापैकी १५ जखमा या तिच्या मृत्यूपूर्वीच्या २४ तासांतील असल्याचे शवविच्छेदन अहवालात निष्पन्न झाले आहे. त्यामुळे वैष्णवीने गळफास घेण्यापूर्वी तिला सासरच्या मंडळीनी बेदम मारहाण केल्याची धक्कादायक बाब समोर आली असून, त्यासाठी वापरलेले हत्यार अथवा वस्तू जप्त करायच्या आहेत, असे बावधन पोलिसांनी सोमवारी न्यायालयात सांगितले. त्यावर वैष्णवीचा पती, सासू व नणंदेच्या पोलिस कोठडीत २८ मेपर्यंत वाढ करण्याचा आदेश प्रथमवर्ग न्यायदंडाधिकारी व्ही. पी. खंदारे यांनी दिला.हुंडा व जमीनखरेदी करण्यासाठी सासरी होणाऱ्या शारीरिक व मानसिक छळाला कंटाळून वैष्णवी शशांक हगवणे (वय २४, रा. मुक्ताई गार्डनजवळ, भुकूम, मुळशी) हिने १६ मे रोजी राहत्या घरात गळफास घेत आत्महत्या केली. या प्रकरणी पती शशांक राजेंद्र हगवण(वय २७), सासू लता राजेंद्र हगवणे (वय ५४) व नणंद करिश्मा राजेंद्र हगवणे (वय ३१, सर्व रा. मुक्ताई गार्डनजवळ, भुकूम, मुळशी) यांना बावधन पोलिसांनी १७ मे रोजी अटक करण्यात आली होती. त्यांच्या पोलिस कोठडीत २६ मेपर्यंत वाढ करण्यात आली होती; तर सासरा राजेंद्र हगवणे आणि दीर सुशील हगवणे यांना २३ मे रोजी अटक करून न्यायालयाच्या आदेशानुसार २८ मेपर्यंत पोलिस कोठडीत ठेवण्यात आले आहे.

दरम्यान, आरोपी पती, सासू व नणंदेच्या पोलिस कोठडीची मुदत संपल्याने तिघांना पुणे न्यायालयात हजर करण्यात आले होते. शवविच्छेदन अहवालात वैष्णवीच्या मृतदेहावर २९ जखमा झाल्या असून, त्यापैकी १५ जखमा तिच्या मृत्यूपूर्वी २४ तासांच्या कालावधीतील आहेत, तर उर्वरित जखमा मृत्यूपूर्वीच्या आठवडाभराच्या कालावधीतील आहेत. त्यामुळे तिला सातत्याने मारहाण होत असल्याचे निदर्शनास आले आहे. या जखमा कठीण, खडबडीत व बोथट शस्त्र किंवा वस्तूने झाल्याचे अहवालात नमूद आहे. त्या पार्श्वभूमीवर वैष्णवीला मारहाण करण्यासाठी आरोपींनी वापरलेले हत्यार जप्त करायचे आहे.वैष्णवीच्या लग्नात हुंडा म्हणून हगवणे कुटुंबियांनी आणखी काही सोन्याचे दागिने, मौल्यवान वस्तू उकळल्या आहेत का, याबाबत तपास करायचा आहे. त्यासाठी आरोपींच्या पोलिस कोठडीत वाढ करण्याची मागणी तपास अधिकारी अनिल विभुते आणि सरकारी वकील नितीन अडागळे यांनी केली. आरोपींतर्फे ॲड. स्वानंद गोविंदवार यांनी बाजू मांडली. पोलिसांनी दिलेली कारणे जुनीच असून, आरोपींच्या पोलिस कोठडीची गरज नाही, असे बचाव पक्षाने सांगितले. दोन्ही बाजूंचे म्हणणे ऐकून घेत न्यायालयाने आरोपींच्या पोलिस कोठडीत दोन दिवसांची वाढ केली. त्यामुळे आता २८ मेच्या दिवशी हगवणे कुटुंबातील सर्व आरोपींना न्यायालयात हजर केले जाणार आहे.

गुन्ह्याच्या तपासात बावधन पोलिसांनी राजेंद्र हगवणेच्या घराची झडती घेतली. शशांक-वैष्णवीच्या लग्नात हुंडा म्हणून घेतलेली चांदीची भांडी, सुशील व शशांकची पिस्तुले व एकूण ९४ काडतुसे जप्त करण्यात आली आहेत. सर्व आरोपींचे पासपोर्ट आणि कागदपत्रे ताब्यात घेण्यात आली आहेत. याशिवाय, आरोपी राजेंद्र व सुशील यांनी पळून जाण्यासाठी वापरलेल्या तीन आलिशान कार आणि मोबाइल जप्त करण्यात आला आहे, अशी माहिती सरकार पक्षातर्फे न्यायालयात देण्यात आली.वैष्णवीच्या दहा महिन्यांच्या मुलाच्या सुरक्षेला धोका निर्माण केल्याप्रकरणी नीलेश रामचंद्र चव्हाण (वय ३४, रा. कर्वेनगर) यालाही या प्रकरणात सहआरोपी करण्यात आले असून, त्याच्यासह सर्व आरोपीविरोधात बाल न्याय कायदा व हुंडा प्रतिबंधक कायद्यानुसार कलमवाढ करण्यात आली आहे. दरम्यान, हुंडा प्रतिबंधक कायद्यात पती व पतीचे नातेवाइक यांना आरोपी करता येते. नीलेश चव्हाण हा हगवणे कुटुंबीयांचा नातेवाइक आहे का, त्याला आरोपी कसे करण्यात आले, याबाबत न्यायालयाने पोलिसांना प्रश्न विचारला. त्यावर शशांक-वैष्णवीचे लग्न ठरविण्यापासून हुंडा मागण्यापर्यंतच्या प्रत्येक टप्प्यात आरोपी नीलेश चव्हाणचा समावेश असल्याचे तपास अधिकाऱ्यांनी न्यायालयात सांगितले.