रुबी हॉल किडनी प्रत्यारोपण रॅकेटमध्ये डॉ. अजय तावरेही सहभागी, पोर्श अपघात केसनंतर पुन्हा कचाट्यात.

पोलिस आयुक्तालयातील जुन्या गुन्ह्यांचा निपटारा करताना वरिष्ठ पोलिस अधिकाऱ्यांच्या नजरेस किडनी रॅकेट गुन्ह्यातील समितीचा अहवाल आला. त्यात डॉ. तावरेचे नाव असतानाही गुन्हा दाखल नसल्याचे दिसले.‘रुबी हॉल रुग्णालयातील किडनी प्रत्यारोपण रॅकेटमध्ये ससून सर्वोपचार रुग्णालयाचे तत्कालीन वैद्यकीय अधीक्षक डॉ. अजय तावरेचा सहभाग असल्याचे स्पष्ट झाले आहे. या प्रकरणी कोरेगाव पार्क पोलिस ठाण्यात दाखल असलेल्या गुन्ह्यात तावरेला आता सहआरोपी करण्यात येणार आहे,’ अशी माहिती पोलिस आयुक्त अमितेशकुमार यांनी शुक्रवारी दिली.तावरे सध्या पोर्श अपघात प्रकरणात अल्पवयीन कारचालकाच्या रक्त नमुन्यातील अदलाबदली प्रकरणी दाखल गुन्ह्यात गेल्या वर्षभरापासून येरवडा कारागृहात न्यायालयीन कोठडीत आहे. दरम्यान, किडनी रॅकेट प्रकरणात गुन्हे शाखा लवकरच तावरेचा ताबा घेणार आहे.किडनी रॅकेटप्रकरणी कोरेगाव पार्क पोलिस ठाण्यात १५ जणांवर गुन्हा दाखल आहे. यामध्ये रुग्ण, रुग्णाचे नातेवाइक, रुबी हॉल क्लिनिकमधील डॉक्टर व व्यवस्थापनातील व्यक्ती आदींचा समावेश होता. या प्रकरणी आरोग्य सेवा मंडळाचे उपसंचालक डॉ. संजोग सीताराम कदम यांनी तक्रार दिली होती.संबंधित रुग्ण अमित साळुंके याची पत्नी रुग्णालयात त्याची विचारपूस करण्यासाठी येत होती.

त्या वेळी किडनी प्रत्यारोपण झाल्यानंतर किडनी देणाऱ्या महिलेने रुग्णाच्या पत्नीकडे पैशांबाबत विचारणा केली. त्यावर ‘एजंटने चार लाख रूपये देण्याचे मान्य केले आहे,’ असे तिला सांगण्यात आले.

मात्र, ठरल्याप्रमाणे पंधरा लाख रूपये न मिळाल्याने त्यांच्यातील व्यवहार फिस्कटला. त्यानंतर किडनी देणारी महिला आणि तिच्या नातेवाइकांनी कोरेगाव पार्क पोलिस ठाण्यात तक्रार अर्ज दिला. तेथून प्रकरण उघडकीस आले.पोलिस आयुक्तालयातील जुन्या गुन्ह्यांचा निपटारा करताना वरिष्ठ पोलिस अधिकाऱ्यांच्या नजरेस किडनी रॅकेट गुन्ह्यातील समितीचा अहवाल आला. त्यात डॉ. तावरेचे नाव असतानाही गुन्हा दाखल नसल्याचे दिसले. पोलिसांनी प्रकरणाची चौकशी केली. तेव्हा डॉ. तावरे याचीच मुख्य भूमिका असल्याचे उघड झाले. तावरे याला मूत्रपिंडदाते आणि मूत्रपिंडग्राही दोघेही बनावट आहेत हे माहिती होते. प्रकरण उघडकीस आले तेव्हा, ससूनच्या या समितीबाबत संशय निर्माण झाला होता. तेव्हा राज्य सरकारने उच्च न्यायालयाच्या सेवानिवृत्त न्यायधीशांच्या अध्यक्षतेखाली दहा लोकांची समीती स्थापन केली होती. त्या समितीने केलेल्या चौकशीत डॉ. अजय तावरेचा हा प्रकार समोर आला होता,’ अशी माहिती पोलिस आयुक्त अमितेशकुमार यांनी दिली.-डॉ. अजय तावरे यानेच दाता आणि रुग्ण यांच्या मुलाखती घेतल्या होत्या. त्यांनी किडनी देताना सादर केलेल्या कागदपत्रांची पडताळणी तावरेने केली होती. ‘रिजनल ऑथोराझेशन कमिटी’चा तावरे अध्यक्ष होता. आठ सदस्यांची समिती तावरेच्या नियंत्रणाखालीच काम करीत होती. निवृत्त न्यायाधीशांच्या चौकशी समितीने ससूनचा वैद्यकीय अधीक्षक राहिलेल्या डॉ. अजय तावरेचा प्रकरणातील सहभाग निश्चित केला होता. त्याच अहवालही सरकारकडे पाठविण्यात आला होता. मात्र, गुन्हा दाखल होताना रुबी हॉल क्लिनिकचे वैद्यकीय तज्ज्ञ, दलाल, रुग्ण आणि दात्यावर दाखल झाला, अशी माहिती पुणे शहर पोलिस आयुक्त अमितेशकुमार यांनी दिली.