यूपीएससी टॉपर, परराष्ट्र मंत्रालयात अधिकारी; पाक एजंटच्या प्रेमात पडली अन्… कहाणी देशद्रोही माधुरी गुप्ताची.

पाकिस्तानसाठी हेरगिरी केल्याच्या आरोपाखाली पोलिसांनी हरियाणाच्या ज्योती मल्होत्राला अटक केली आहे. या घटनेने माधुरी गुप्ता प्रकरणाची आठवण करुन दिली. माधुरी गुप्तानेही एका पाकिस्तानी एजंटच्या प्रेमात पडून भारताची माहिती पाकिस्तानला पुरवली होती.पाकिस्तानसाठी हेरगिरी केल्याच्या आरोपाखाली अटक करण्यात आलेल्या युट्यूबर ज्योती मल्होत्राची सध्या देशात चर्चा आहे. तिच्याबाबत दररोज नवनवीन गोष्टी उघड होत आहेत. राष्ट्रीय तपास संस्था (NIA), IB आणि मिलिटरी इंटेलिजेंस (MI) चे अधिकारी ज्योतीची चौकशी करत आहेत. ज्योती हिच्या पाकिस्तानी संबंधांबद्दल, दहशतवादासोबतच्या संबंधांबद्दल आणि पाकिस्तान उच्चायुक्तालयातील अहसान-उर-रहीम उर्फ दानिश यांच्याशी असलेल्या तिच्या संपर्काबद्दल चौकशी केली जात आहे. ज्योतीच नाही तर पाकिस्तानसाठी हेरगिरी केल्याच्या आरोपाखाली गेल्या दोन आठवड्यात देशातील वेगवेगळ्या ठिकाणांहून आठ जणांना अटक करण्यात आली आहे.

ज्योती मल्होत्राच्या अटकेनंतर माधुरी गुप्ताची कहाणी पुन्हा एकदा चर्चेत आली आहे. माधुरी गुप्ताने पाकिस्तानी अधिकाऱ्याच्या प्रेमात पडून देशाच्या सुरक्षेशी तडजोड केली होती.माधुरी गुप्ता ही काही सामान्य नागरिक नव्हती. तर, ती परराष्ट्र सेवेतील वरिष्ठ ग्रुप बी अधिकारी होती. तिने जेएनयूमधून शिक्षण घेतलं. त्यानंतर तिने यूपीएससी नागरी सेवा परीक्षा उत्तीर्ण केली आणि परराष्ट्र सचिव झाली. 2007 मध्ये तिला इस्लामाबादमधील भारतीय उच्चायुक्तालयात प्रेस आणि माहिती विभागाची जबाबदारी देण्यात आली होती.

ती इस्लामाबादमध्ये तिचे काम पूर्ण प्रामाणिकपणे करत होती. पण, माधुरीच्या कहाणी ट्विस्ट तेव्हा आला जेव्हा ती इस्लामाबादमधील एका कार्यक्रमात जमशेदला भेटली. 52 वर्षीय माधुरी जमशेदच्या तिच्यापेक्षा निम्म्या वयाच्या जमशेदच्या प्रेमात पडली. जमशेद हा आयएसआय प्रशिक्षित एजंट होता.माधुरी गुप्ता भारत सरकारवर नाराज होती, कारण सरकारने त्यांची रजा रद्द केली होती. तसेच, त्यांचा पगारही सरकारने थांबवला होता. माधुरीच्या या रागाचा फायदा जमशेदने घेतला.जमशेद माधुरीला भारत सरकारविरुद्ध भडकवू लागला. हळूहळू माधुरीने लष्कर आणि गुप्तचर संस्था रॉशी संबंधित गोपनीय माहिती आयएसआयला पाठवायला सुरुवात केली. माधुरीचे जमशेदवर जीवापाड प्रेम करु लागली होती. इतकंच नाही तर तिने इस्लाम धर्म स्वीकारून इस्तंबूल (तुर्की) ला जाण्याचा विचार केला होता.माधुरी आणि जमशेद यांच्यातील नात्याने पाकिस्तानातील काही दूतावास अधिकाऱ्यांचे लक्ष वेधले. यानंतर, अधिकाऱ्यांना माधुरी गुप्ताच्या काही हालचाली संशयास्पद वाटल्या. रॉ आणि इंटेलिजेंस ब्युरोच्या प्रमुखांनी तात्काळ उच्चस्तरीय बैठक बोलावली. माधुरी गुप्तावर पाळत ठेवण्यात आली. हे अभियान इतके गुप्त होते की परराष्ट्र मंत्रालयालाही त्याची माहिती नव्हती. माधुरी गुप्ताला रंगेहाथ पकडण्यासाठी एजन्सीने सापळा रचला. तिला एक खोटी माहिती देण्यात आली. अखेर गुप्तचर संस्थांचा संशय खरा ठरला. माधुरी गुप्ताने ही माहिती पाकिस्तानच्या गुप्तचर संस्थेला पोहोचवली होती. यानंतर, 2010 मध्ये, सार्क परिषदेच्या तयारीच्या नावाखाली माधुरीला दिल्लीला बोलावण्यात आले. माधुरी दिल्लीत पोहोचताच तिला अटक करण्यात आली. 2018 मध्ये न्यायालयाने माधुरीला दोषी ठरवत तिला तीन वर्षांच्या तुरुंगवासाची शिक्षा सुनावण्यात आली.शिक्षा पूर्ण झाल्यानंतर माधुरी राजस्थानातील भिवाडी येथे एकटीच राहायची. 2021 मध्ये वयाच्या 64 व्या वर्षी तिचे निधन झाले.