आगीची धग पाच गावांना; नाशिकच्या ‘जिंदाल’मध्ये अग्नितांडव सुरुच, निम्मा प्रकल्प खाक.

आगीत कंपनीतील १६ पैकी आठ प्रकल्प खाक झाले, तर नव्वद टक्के उत्पादन विभाग भक्ष्यस्थानी पडला आहे. प्रशासनाने तीन किमी परिसरासाठी प्रतिबंधात्मक आदेश लागू केले असून, एक किमी परिसरातील पाच गावे रिकामी केली आहेत.गतपुरीतील मुंढेगावजवळच्या जिंदाल पॉलिफिल्म्स कंपनीला लागलेली आग चाळीस तासांनंतरही आटोक्यात आलेली नाही. उलट गुरुवारी (दि. २२) तिची तीव्रता आणखी वाढली. आगीत कंपनीतील १६ पैकी आठ प्रकल्प खाक झाले, तर नव्वद टक्के उत्पादन विभाग भक्ष्यस्थानी पडला आहे. प्रशासनाने तीन किमी परिसरासाठी प्रतिबंधात्मक आदेश लागू केले असून, एक किमी परिसरातील पाच गावे रिकामी केली आहेत.
जिंदाल पॉलिफिल्म्स कंपनीत बुधवारी पहाटे दीडला आग लागली. कंपनीत पॉलिप्रिपिलिन चिप्सचा अतिज्वलनशील कच्च्या व पक्क्या मालाचा साठा असल्याने या आगीने रौद्र रूप धारण केले व ती विझवण्यात अडचणी येत आहेत. भिवंडी, शहापूर, पिंप्री-चिंचवड, ठाणे, अहिल्यानगर येथून मागवलेल्या सतरा ते वीस अग्निशमन बंबांद्वारे आग आटोक्यात आणण्यासाठी शर्थीचे प्रयत्न सुरू आहेत. मात्र, ही आग पाण्याने विझत नसल्याने फोम व अन्य विशेष अग्निशामक बंब बोलावण्यात आले आहेत. पुणे येथून राष्ट्रीय आपत्ती निवारण दलाच्या (एनडीआरएफ) जवानांच्या तुकडीही दाखल झाली आहे.

याशिवाय औद्योगिक सुरक्षा, महसूल, पोलिस, आरोग्य आदी विभागांकडून प्रयत्न सुरू आहेत. कंपनीत लागलेल्या आगीपासून तीस ते साठ मीटरवर अतिज्वलनशील प्रोपेन गॅसची टाकी असून, तिथपर्यंत आग पोहोचू न देण्याचे व ‘कूलिंग’द्वारे टाकीचे तापमान नियमित राखण्याचे प्रयत्न सुरू आहेत. या टाकीचा स्फोट झाल्यास अडीचशे मीटरपर्यंत ज्वाळा पसरू शकतात, तसेच स्फोटामुळे एक किलोमीटरपर्यंतच्या परिघातील घरांचे नुकसान होऊ शकते. त्यामुळे प्रशासनाने मुंढेगाव, मुंढेगाव वाडी, मुकणे, पाडळी व शेणवड ही पाच गावे रिकामी केली आहेत.जिल्हाधिकारी जलज शर्मा, अप्पर पोलिस अधीक्षक आदित्य मिरखेलकर यांच्यासह अधिकाऱ्यांनी गुरुवारी दुपारी घटनास्थळाची पाहणी केली. दोन ते तीन दिवस आग आटोक्यात येण्याची चिन्हे नसून, आग विझवणे व दुर्घटनेत मानवी हानी टाळणे या बाबींना प्राधान्याने भर दिला आहे. सध्या आगीचा विस्तार व मानवी हानी रोखण्याला प्राधान्य आहे. पंधरा किलोमीटरपर्यंतचा परिसर रिकामा करण्याचे आदेश दिले, ही अफवा आहे. आग विझल्यावर तिची कारणे व अन्य चौकशी केली जाईल, असे जिल्हाधिकारी जलज शर्मा यांनी सांगितले.ग्रामपंचायतीने सूचना केल्यानंतर गावात कोणी थांबलेले नाही. कंपनी परिसरात आमची गायी-म्हशी आदी जनावरे असून, त्यांना हलवणे शक्य नाही. त्यांचे काय करावे, हा प्रश्न पडला आहे. – लखन गतीर, ग्रामस्थ, मुंढेगावगेल्या वेळी कंपनीत झालेल्या स्फोटामुळे घरातील भांडीकुंडी पडली होती. भिंतींना तडे गेले होते. त्यामुळे धोका न पत्करण्याचा निर्णय घेतला आहे. अनेकांना दूरवरच्या नातेवाइकांकडे जावे लागले आहे. -राजेंद्र दळवी, ग्रामस्थ, मुंढेगाव